পশ্চিম এছিয়াৰ সংঘাত আৰু ৰাছিয়া-ইউক্ৰেইন যুদ্ধ (Russia-Ukraine war) সন্দৰ্ভত ভাৰতৰ স্থিতি (India’s position) পুনৰ স্পষ্ট কৰিলে প্ৰধানমন্ত্ৰী নৰেন্দ্ৰ মোদীয়ে (Modi)। সামৰিক সংঘাতৰ জৰিয়তে কোনো সমস্যা কেতিয়াও সমাধান নহয় বুলিও তেওঁ কয়। পশ্চিম এছিয়া হওক বা ইউক্ৰেইন, ভাৰত দুয়োটা ক্ষেত্ৰতে স্থিতিশীলতা আৰু স্থায়ী শান্তিৰ পক্ষত। ইউৰোপীয় সংঘৰ অন্যতম সদস্য ৰাষ্ট্ৰ অষ্ট্ৰিয়াৰ চেন্সেলৰ ক্রিষ্টিয়ান ষ্টোকাৰ ভাৰত ভ্ৰমণলৈ আহিছে। বৃহস্পতিবাৰে দিল্লীত মোদীয়ে তেওঁক সাক্ষাৎ কৰে। বৈঠকৰ পাছত দিয়া ভাষণৰ সময়ত প্রধানমন্ত্রীয়ে দ্বিপাক্ষিক সম্পর্কৰ লগতে বিশ্বৰ বিভিন্ন প্রান্তত চলি থকা যুদ্ধ পৰিস্থিতি সন্দর্ভতো মন্তব্য কৰে৷
তেওঁ কয়, “আজি সমগ্ৰ বিশ্বই অতি গুৰুতৰ আৰু উত্তেজনাপূৰ্ণ পৰিস্থিতিৰ মাজেৰে পাৰ হৈ গৈছে।” তেওঁ লগতে উল্লেখ কৰে যে পৃথিৱীৰ সকলোৱে এই পৰিস্থিতি অনুভৱ কৰি আছে। মোদীয়ে কয়, “সামৰিক সংঘাতৰ জৰিয়তে কোনো সমস্যা সমাধান কৰিব নোৱাৰি, ভাৰত আৰু অষ্ট্ৰিয়া দুয়োখনেই এই ক্ষেত্ৰত একমত। আমি বিচাৰোঁ যে ইউক্ৰেইন আৰু পশ্চিম এছিয়াত স্থিতিশীলতা আৰু স্থায়ী শান্তি প্ৰতিষ্ঠা হওক।”
উল্লেখ্য যে যুদ্ধ পৰিস্থিতি সন্দৰ্ভত ভাৰতৰ দীৰ্ঘদিনীয়া স্থিতি এয়াই হৈ আহিছে। ৰাছিয়া-ইউক্ৰেইন যুদ্ধই হওক বা ইৰাণৰ সৈতে জড়িত উত্তেজনাই হওক, ভাৰতে বিগত সময়ছোৱাত সংঘাতৰ পৰিৱৰ্তে আলোচনাৰ জৰিয়তে সমস্যা সমাধানৰ আহ্বান জনাই আহিছে। যোৱা মঙলবাৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে মোদীৰ সৈতে ফোনযোগে কথা পাতিছিল। সেই সময়ছোৱাত দুয়োগৰাকী নেতাই দ্বিপাক্ষিক সম্পৰ্কৰ লগতে পশ্চিম এছিয়াৰ পৰিস্থিতি সন্দৰ্ভত আলোচনা কৰে। এইবাৰ ইউৰোপীয় সংঘৰ এগৰাকী বন্ধুক নিজৰ পক্ষত লৈ নতুন দিল্লীৰ স্থিতি পুনৰ স্পষ্ট কৰি দিলে মোদীয়ে। ৰাছিয়া-ইউক্ৰেইন যুদ্ধ সন্দৰ্ভত ইউৰোপীয় দেশসমূহে আৰম্ভণিৰে পৰাই ইউক্ৰেইনৰ কাষত থিয় দিছে। এনে পৰিস্থিতিত সেই একেই ইউৰোপীয় মিত্ৰজোঁটৰ এগৰাকী নেতাক নিজৰ পক্ষত লৈ মোদীৰ বাৰ্তা আৰু অধিক তাৎপৰ্যপূৰ্ণ হৈ উঠিছে বুলি ধাৰণা কৰা হৈছে।
উল্লেখ্য যে শেহতীয়াকৈ ভাৰতে ইউৰোপীয় সংঘৰ সৈতে মুক্ত বাণিজ্য চুক্তি স্বাক্ষৰ কৰাৰ পাছত অষ্ট্ৰিয়াৰ চেন্সেলৰৰ ভাৰত ভ্ৰমণে অধিক তাৎপৰ্য লাভ কৰিছে । অৱশ্যে এই চুক্তি এতিয়াও কাৰ্যকৰী হোৱা নাই। প্ৰধানমন্ত্ৰী মোদীয়ে কয় যে অষ্ট্ৰিয়াৰ চেন্সেলৰৰ ভাৰত ভ্ৰমণে বাণিজ্য আৰু বিনিয়োগৰ ক্ষেত্ৰত এক নতুন দিশ দেখুৱাব।
