সঠিক ভোটাৰ চিনাক্ত কৰিবলৈ ফিংগাৰপ্ৰিণ্ট (Fingerprint) বা আইৰিছ স্কেনিং (Iris scanning) কৰিব লাগে বুলি এইবাৰ উচ্চতম ন্যায়ালয়ত গোচৰ (Case in the Supreme Court) ৰুজু কৰা হৈছে। আবেদনকাৰীৰ আবেদন অনুসৰি আয়োগে লোকসভা বা বিধানসভা নিৰ্বাচনত এই ব্যৱস্থা প্ৰৱৰ্তন কৰক। তেওঁৰ মতে প্ৰতিটো ভোটকেন্দ্ৰতে ভোটাৰৰ আঙুলিৰ চাপ বা আইৰিছ স্কেনিং ব্যৱস্থা প্ৰৱৰ্তন কৰিলে ভুৱা ভোটাৰক ৰোধ (Stop fake voters) কৰিব পৰা যাব। সোমবাৰে অধিবক্তা অশ্বিনী কুমাৰ উপাধ্যায়ে এই জনস্বাৰ্থৰ গোচৰ ৰুজু কৰে। মুখ্য ন্যায়াধীশ সূৰ্য কান্ত আৰু ন্যায়াধীশ জয়মাল্য বাগচীৰ বিচাৰপীঠত তেওঁ বিষয়টোৰ প্ৰতি দৃষ্টি আকৰ্ষণ কৰে।
মুখ্য ন্যায়াধীশৰ বিচাৰপীঠে এই গোচৰৰ শুনানি গ্ৰহণ কৰিবলৈ সন্মত হৈছে। কিন্তু একে সময়তে এই বিষয়টোও স্পষ্ট কৰি দিছে যে বৰ্তমান বিধানসভা নিৰ্বাচন অনুষ্ঠিত হোৱা ৰাজ্যসমূহৰ প্ৰেক্ষাপটত এই গোচৰটো মানি লোৱা হোৱা নাই। পৰৱৰ্তী লোকসভা আৰু বিধানসভা নিৰ্বাচনত এই ব্যৱস্থা প্ৰৱৰ্তন কৰিব পৰা যাবনে নাই সেই বিষয়ে বিবেচনা কৰা হ’ব। মুখ্য ন্যায়াধীশ সূৰ্য কান্তৰ বিচাৰপীঠে পৰ্যবেক্ষণ কৰে যে ইতিমধ্যে কেইবাখনো ৰাজ্যত নিৰ্বাচনী প্ৰক্ৰিয়া আৰম্ভ হৈছে। এই পৰ্যায়ত তাত এনে নতুন ব্যৱস্থা প্ৰৱৰ্তন কৰাটো বাস্তৱিক নহয়।
ইফালে আবেদনকাৰীয়ে লগতে কয় যে তেওঁ বৰ্তমান এই ব্যৱস্থা প্ৰৱৰ্তনৰ দাবী কৰা নাই। তেওঁ বিচাৰে যে আদালতে বিষয়টো সঠিকভাৱে চোৱাচিতা কৰক। লগতে গোচৰৰ প্ৰসংগত সকলো পক্ষলৈ জাননী প্ৰেৰণ কৰিবলৈ অনুৰোধ জনায়। গোচৰৰ অধিবক্তাই কয়, “ঘোচ, প্ৰভাৱ খটোৱা, ছদ্মবেশ, দুবাৰকৈ দিয়া ভোট বা ভুৱা ভোটদান– এই সকলোবোৰে নিৰ্বাচনী প্ৰক্ৰিয়াৰ স্বচ্ছতা আৰু অখণ্ডতা ধ্বংস কৰি আছে।ফলত সাধাৰণ নাগৰিকে বহুত ক্ষতিগ্ৰস্ত হৈছে।”
এই আবেদনৰ পৰিপ্ৰেক্ষিতত উচ্চতম ন্যায়ালয়ে ইতিমধ্যে নিৰ্বাচন আয়োগ, কেন্দ্ৰ আৰু কেইবাখনো ৰাজ্যকে ধৰি সংশ্লিষ্ট সকলো পক্ষলৈ জাননী প্ৰেৰণ কৰিছে। মুখ্য ন্যায়াধীশৰ বিচাৰপীঠৰ মন্তব্য, “পৰৱৰ্তী লোকসভা নিৰ্বাচন আৰু বিধানসভা নিৰ্বাচনৰ পূৰ্বে এনে পদক্ষেপ লোৱা উচিত হয়নে নহয় সেইটো পৰীক্ষা কৰাটো প্ৰয়োজনীয়। সেয়েহে জাননী জাৰি কৰা হৈছে।”
