ইজৰাইল – আমেৰিকা আৰু ইৰাণৰ মাজৰ (Iran War) সংঘাতে চতুৰ্থ সপ্তাহত ভৰি দিয়াৰ লগে লগে বিভ্ৰান্তি বাঢ়িছে। ইয়াৰ মাজতে আমেৰিকাৰ ৰাষ্ট্ৰপতি ড’নাল্ড ট্ৰাম্পে যুদ্ধলৈ যোৱাৰ সিদ্ধান্তৰ নতুন ব্যাখ্যা আগবঢ়াইছে।
আমেৰিকাৰ ৰাষ্ট্ৰপতিগৰাকীৰ মন্তব্যক কেন্দ্ৰ কৰি কেইবাটাও প্ৰশ্ন উত্থাপিত হৈছে। সোমবাৰে টেনেচিত অনুষ্ঠিত এক ঘূৰণীয়া মেজমেলত ট্ৰাম্পে যুদ্ধ আৰম্ভ কৰাৰ দায়িত্ব সম্পূৰ্ণৰূপে নিজৰ চৰকাৰৰ প্ৰতিৰক্ষা মন্ত্ৰীৰ ওপৰত অৰ্পণ কৰে।
তেওঁৰ দাবী যে সামৰিক ব্যৱস্থা গ্ৰহণৰ সিদ্ধান্তৰ বিষয়ে প্ৰথমে মাত মাতিছিল প্ৰতিৰক্ষা সচিব পিট হেছাণ্টে। কাষত বহি ট্ৰাম্পে কয়, “পিট, মই ভাবোঁ তুমিয়েই প্ৰথমে কৈছিলা, আমি এইটো কৰিব লাগিব, আমি তেওঁলোকক পাৰমাণৱিক অস্ত্ৰ লাভ কৰিবলৈ দিব নোৱাৰো।”
এই যুদ্ধৰ কেইবাটাও কাৰণ ইতিমধ্যে প্ৰশাসনে দাঙি ধৰিছে। ইয়াৰ ভিতৰত ট্ৰাম্পৰ মন্তব্যই নতুন বিতৰ্কৰ সূচনা কৰিছে। বিশেষজ্ঞসকলৰ মতে, যুদ্ধৰ কাৰণ সন্দৰ্ভত আমেৰিকা প্ৰশাসনৰ ভিতৰত মতানৈক্যৰ সৃষ্টি হৈছে। প্ৰতিজন ব্যক্তিয়ে এই সংঘাতৰ কাৰণ কি সেই বিষয়ে মন্তব্য কৰি আছে।
প্ৰশাসনৰ এটা অংশই দাবী কৰে যে যিহেতু ইজৰাইলে যিকোনো সময়তে আক্ৰমণ কৰিব পাৰিলেহেঁতেন, গতিকে আমেৰিকা জড়িত থকাটো প্ৰায় অনিবাৰ্য আছিল। আন এটা অংশৰ মতে ইৰাণে প্ৰায় পাৰমাণৱিক অস্ত্ৰ নিয়োগৰ সীমাত উপনীত হৈছিল।
আনহাতে, ড’নাল্ড ট্ৰাম্পে নিজেই যুদ্ধৰ নিৰ্ণায়ক মুহূৰ্তৰ বিষয়ে বেলেগ বৰ্ণনা দিছে। তেওঁ কয়, “মই পিটক ফোন কৰিলোঁ, মই জেনেৰেল কেইনক ফোন কৰিলোঁ আৰু বহুতকে কৰিলোঁ। আমি ভাবিলোঁ, মধ্যপ্ৰাচ্যত এটা ডাঙৰ সমস্যা আছে। আমি হয় মনে মনে থাকিব পাৰো, নহয় আমি এই সমস্যাটো সমাধান কৰিব পাৰো।”
বিগত কিছুদিনৰ চৰম উত্তেজনাৰ পিছত সোমবাৰে আমেৰিকা-ইৰাণৰ সংঘাতে নাটকীয় ৰূপ ধাৰণ কৰে। আমেৰিকাৰ ৰাষ্ট্ৰপতি ড’নাল্ড ট্ৰাম্পে কয় যে ইৰাণৰ বিদ্যুৎ কেন্দ্ৰ আৰু শক্তি আন্তঃগাঁথনিৰ ওপৰত পৰিকল্পিত সকলো সামৰিক আক্ৰমণ সম্প্ৰতি স্থগিত ৰখাৰ নিৰ্দেশ দিছে।
ট্ৰাম্পে দাবী কৰিছে যে আমেৰিকাই তেহৰাণৰ সৈতে “গভীৰ আৰু গঠনমূলক” আলোচনাত মিলিত হৈছে, যাৰ লক্ষ্য হৈছে মধ্যপ্ৰাচ্যত দীৰ্ঘদিনীয়া শত্ৰুতা শেষ কৰা। অৱশ্যে ইৰাণে ৱাশ্বিংটনৰ এই দাবীক নাকচ কৰি আমেৰিকা “পিছুৱাই যোৱা” বুলি উল্লেখ কৰিছে।
