সমগ্ৰ বিশ্বতে উদ্বেগ বাঢ়িছে। পশ্চিম এছিয়াৰ সংঘাত (West Asia conflect)ৰ পৰিস্থিতি জটিল। ইৰাণ আৰু আমেৰিকাই দুয়োৱে দুয়োকে হুঙ্কাৰ দিছে। এই সকলোবোৰৰ মাজতে ইৰাণৰ পৰিণতিক লৈ কান্দিছে বহু কাশ্মীৰীয়ে (Kashmir)। বুডগাম অঞ্চলৰ স্থানীয় বাসিন্দাসকলে চলি থকা সংকটৰ ফলত ক্ষতিগ্ৰস্ত লোকসকলক সহায় কৰিবলৈ সোণ, ৰূপ আৰু নগদ ধন আগবঢ়াইছে।
সংবাদ সংস্থা এ এন আয়ে প্ৰকাশ কৰা ভিডিঅ’ ফুটেজ অনুসৰি, শেহতীয়াকৈ বুডগামৰ স্থানীয় লোকসকলে ইৰাণৰ প্ৰতি সমৰ্থনৰ প্ৰতীক হিচাপে মূল্যৱান সামগ্ৰী আৰু আৰ্থিক সাহায্য দান কৰিবলৈ একত্ৰিত হয়। ভিডিঅ’টোত দেখা গৈছে যে এটা কমিউনিটি চেণ্টাৰত একত্ৰিত হৈ বহুমূলীয়া গহনা আৰু নগদ ধন এঠাইত জমা কৰি ৰাখিছে। বুডগামৰ এই অঞ্চলটোৰ পৰা পোৱা অনুদানক সামূহিক মানৱীয় সঁহাৰিৰ প্ৰতিফলন হিচাপে বৰ্ণনা কৰা হৈছে।
আনহাতে, বুডগামৰ বিধায়ক মুন্তাজিৰ মেহদীয়েও এই মানৱীয় প্ৰচেষ্টাত যোগদান কৰিছে। তেওঁ ইৰাণৰ সৈতে সংহতি প্ৰকাশ কৰিছে। সাহায্যৰ কামত সহায় কৰিবলৈ এমাহৰ দৰমহা আগবঢ়াব বুলি ঘোষণা কৰিছে বিধায়কগৰাকীয়ে।
“#KashmirWithIran” আৰু “#StandWithIran”ৰ দৰে হেজটেগ ব্যৱহাৰ কৰি এটা পোষ্টত বুডগামৰ বিধায়ক মুন্তাজিৰ মেহদীয়ে লিখিছে, “এই কঠিন সময়ত মই ইৰাণৰ জনসাধাৰণৰ সৈতে থিয় দিছোঁ। সমৰ্থনৰ সৰু চিন হিচাপে মই মোৰ এমাহৰ দৰমহা সাহায্য প্ৰচেষ্টালৈ দান কৰিছোঁ। মানৱতা সকলোতকৈ ওপৰত হ’ব লাগে।”
এই অনুদানৰ প্ৰতি সঁহাৰি জনাই ভাৰতত থকা ইৰাণৰ দূতাবাসে নিজৰ এক্স হেণ্ডেলত কয়, “কৃতজ্ঞতাৰে ভৰা হৃদয়েৰে আমি কাশ্মীৰৰ সৌজন্যশীল জনসাধাৰণক আন্তৰিক কৃতজ্ঞতা প্ৰকাশ কৰিছোঁ, মানৱীয় সাহায্য আৰু গভীৰ সংহতিৰে ইৰাণৰ জনসাধাৰণৰ সৈতে থিয় দিয়াৰ বাবে; এই দয়া কেতিয়াও পাহৰিব নোৱাৰি। ধন্যবাদ ভাৰত।”
এই ঘটনাই স্পষ্টভাৱে দেখুৱাইছে যে আন্তঃৰাষ্ট্ৰীয় সংঘাতসমূহে ৰাষ্ট্ৰীয় সীমাৰ বাহিৰত কেনেকৈ সুদূৰপ্ৰসাৰী প্ৰভাৱ পেলাইছে আৰু মানৱীয় উদ্বেগৰ প্ৰতি সঁহাৰি জনাই ব্যক্তি আৰু গোটসমূহক আগবাঢ়ি আহিবলৈ অনুপ্ৰাণিত কৰিছে।
বৰ্তমান তীব্ৰ সামৰিক কাৰ্য আৰু বিশ্ব কূটনৈতিক উত্তেজনাৰ বিষয় হৈ পৰা ইৰাণৰ সংঘাতে সমগ্ৰ বিশ্বৰ মানুহৰ দৃষ্টি আকৰ্ষণ কৰিছে। একে সময়তে ক্ষতিগ্ৰস্ত জনসাধাৰণৰ প্ৰতি শান্তি আৰু সমৰ্থনৰ আহ্বান অধিক শক্তিশালী হৈ আহিছে।
