তেওঁ য’তেই নাথাকক কিয়, তেওঁক বিচাৰি উলিয়াই হত্যা কৰা হ’ব। ইৰাণৰ সৰ্বোচ্চ নেতা মোজতাবা খামেইনিৰ (Moztaba Khameini) মস্কো যাত্ৰাৰ জল্পনা-কল্পনাৰ মাজতে পুনৰ হত্যাৰ ভাবুকি (Threat of murder) দিছে ইজৰাইলে (Israel)। দেশখনৰ সেনাবাহিনী ইজৰাইল প্ৰতিৰক্ষা বাহিনীৰ মুখপাত্ৰ ব্ৰিগেডিয়াৰ জেনেৰেল এফি ডেফ্ৰিনে সকীয়াই দিয়ে যে আমি তেওঁক (মোজতাবা) বিচাৰি উলিয়াম।”
দ্য টাইমছ অব ইজৰাইলৰ এক প্ৰতিবেদন অনুসৰি, আই ডি এফৰ মুখপাত্ৰগৰাকীয়ে কয়, “তেওঁৰ (মোজতাবা) কোনো সন্ধান নাই। তেওঁক ক’তো দেখা পোৱা নাই। কি হৈছে নাজানো।” তাৰ পিছত তেওঁ সকীয়াই দিয়ে, “তেওঁ কিমান দিন লুকাই থাকিব? আমি তেওঁক বিচাৰি উলিয়াম, তাৰ পিছত আমি তেওঁক হত্যা কৰিম।” উল্লেখযোগ্য যে সোমবাৰে কুৱেইটৰ সংবাদ সংস্থা আল জাৰিদাৰ এক প্ৰতিবেদনত দাবী কৰা হৈছে যে মোজতাবাক চিকিৎসাৰ বাবে মস্কোলৈ বিমানেৰে লৈ যোৱা হৈছে। ইৰাণৰ ৰাষ্ট্ৰপতি মাছুদ পেস্কোভে ৰাছিয়াৰ ৰাষ্ট্ৰপতি ভ্লাদিমিৰ পুটিনৰ সৈতে কথা পাতি মস্কোত মোজতাবাৰ চিকিৎসাৰ ব্যৱস্থা কৰিছে। অৱশ্যে এই তথ্য সন্দৰ্ভত ৰাছিয়াৰ পৰা কোনো মন্তব্য কৰা হোৱা নাই। ৰাছিয়াৰ চৰকাৰী সংবাদ সংস্থা টাছক ৰাষ্ট্ৰপতিগৰাকীৰ প্ৰেছ সচিব দিমিত্ৰী পেস্কোভে কয় যে আমি এনে বাতৰি সন্দৰ্ভত কোনো মন্তব্য নকৰো। মোজতাবা মস্কো যাত্ৰাৰ জল্পনা-কল্পনাৰ মাজতে ইজৰাইলে পুনৰ তেওঁক হত্যাৰ ভাবুকি দিছে।
ইফালে আই ডি এফৰ মুখপাত্ৰ ডেফ্ৰিনে কয় যে ইৰাণৰ প্ৰতি ইজৰাইলৰ মনোভাব সলনি নহ’ব। তেওঁ কয়, “ইজৰাইলৰ সাৰ্বভৌমত্বক বিপদত পেলাবলৈ চেষ্টা কৰাসকলৰ ভাগ্য আমি লিখিম। যিয়ে আমাৰ বিৰুদ্ধে হাত তুলিবলৈ চেষ্টা কৰিব, তাক উপযুক্ত উত্তৰ দিয়া হ’ব।” আই ডি এফৰ মুখপাত্ৰই ইংগিত দিয়ে যে তেওঁলোকৰ অভিযান কেৱল ইৰাণৰ শীৰ্ষ নেতাসকলৰ মাজতে সীমাবদ্ধ নাথাকিব। ইৰাণৰ সৈতে সহযোগিতা কৰা সকলো সশস্ত্ৰ সংগঠনৰ বিৰুদ্ধেও এই অভিযান অব্যাহত থাকিব। তেওঁ কয়, “আমি সকলোকে বিচাৰি উলিয়াম। যিমানেই সময় নালাগক কিয়।”
উল্লেখযোগ্য যে ইজৰাইল আৰু আমেৰিকাৰ আক্ৰমণত মোজতাবা আহত হোৱা বুলি বিভিন্ন সূত্ৰই দাবী কৰিছে। আকৌ এই তথ্যও প্ৰচাৰ হৈ আছে যে মোজতাবা জীয়াই আছেনে? ২৮ ফেব্ৰুৱাৰীৰ পৰা ৰাজহুৱা স্থানত মোজতাবাক দেখা পোৱা নাই। তাৰ পৰাই জল্পনা-কল্পনা অধিক শক্তিশালী হ’বলৈ আৰম্ভ কৰিছে। অৱশ্যে ইৰানে বাৰে বাৰে দাবী কৰি আহিছে যে মোজতাবা জীয়াই আছে আৰু সুস্থ হৈ আছে।
