ইৰাণৰ আক্ৰমণ (Iran Attack)ত ব্ৰিটেইন কোনো ধৰণে জড়িত নাই (Britain is not involved)। এই দাবী ব্ৰিটিছ প্ৰধানমন্ত্ৰী কেইৰ ষ্টাৰমাৰ (British Prime Minister Keir Starmer)ৰ। তেওঁ কয় যে আমেৰিকান বাহিনীয়ে ইৰাণৰ ক্ষেপণাস্ত্ৰ স্থানত আক্ৰমণ কৰিবলৈ কিছুমান ব্ৰিটিছ ঘাটি ব্যৱহাৰ কৰি আছে। কিন্তু সেই ঘাটিসমূহৰ ব্যৱহাৰ সীমিত উদ্দেশ্যত কেৱল ‘আত্মৰক্ষা’ৰ বাবে ব্যৱহাৰ কৰাৰ বিশেষ অনুমতি দিয়া হৈছে। এই প্ৰসংগত ষ্টাৰমাৰে ইৰাক যুদ্ধৰ কথাও উল্লেখ কৰে।
ব্ৰিটিছ প্ৰধানমন্ত্ৰীয়ে কয়, “মই অতি স্পষ্টকৈ ক’ব বিচাৰো যে আমি সকলোৱে ইৰাকৰ ভুলবোৰ মনত ৰাখিছো। আৰু আমি সেইবোৰৰ পৰা শিকিছো। ইৰাণৰ আক্ৰমণৰ লগত আমি জড়িত নাই। এতিয়াও আমি কোনো আগ্ৰাসী ব্যৱস্থা গ্ৰহণ নকৰো।” দৰাচলতে দুটা দশকৰ আগতে ২০০৩ চনত আমেৰিকা আৰু ব্ৰিটেইনে যৌথভাৱে ইৰাকৰ প্ৰাক্তন ৰাষ্ট্ৰপতি ছাদ্দাম হুছেইনৰ বিৰুদ্ধে সামৰিক অভিযান আৰম্ভ কৰিছিল। সেই সামৰিক অভিযানক পিছলৈ আন্তঃৰাষ্ট্ৰীয় পৰ্যায়ত সমালোচনা কৰা হৈছিল। এই ক্ৰমবৰ্ধমান সমালোচনাক ২০০৭ চনত ব্ৰিটিছ প্ৰাক্তন প্ৰধানমন্ত্ৰী টনি ব্লেয়াৰে পদত্যাগ কৰাৰ অন্যতম কাৰণ হিচাপেও বিবেচিত হৈছে।
অৱশ্যে ষ্টাৰমাৰে স্পষ্ট কৰি দিছে যে পশ্চিম এছিয়াত যি পৰিস্থিতিৰ সৃষ্টি হয়, সেই পৰিস্থিতিত ব্ৰিটেইনে প্ৰতিৰক্ষামূলক ব্যৱস্থা গ্ৰহণ কৰি যাব। তেওঁ কয়, “আমি এই আক্ৰমণত যোগদান কৰা নাই। কিন্তু আমি নিজকে ৰক্ষাৰ বাবে প্ৰয়োজনীয় পদক্ষেপ গ্ৰহণ কৰি যাম।” লগতে তেওঁ কয় যে সম্প্ৰতি পশ্চিম এছিয়াৰ আকাশত ব্ৰিটিছ যুদ্ধবিমান আছে। সেইবোৰ প্ৰতিৰক্ষামূলক উদ্দেশ্যে পশ্চিম এছিয়াত আছে। সেই যুঁজাৰু বিমানবোৰে ইৰাণৰ কেইবাটাও আক্ৰমণ ৰোধ কৰাত সফলো হৈছে। ষ্টাৰমাৰে দাবী কৰে যে ইৰাণৰ পৰা অহা আক্ৰমণৰ ভাবুকি ৰোধ কৰাৰ একমাত্ৰ উপায় হ’ল তেওঁলোকৰ ক্ষেপণাস্ত্ৰ ঘাটি ধ্বংস কৰা। ষ্টাৰমাৰে দাবী কৰে যে আমেৰিকাৰ সেনাবাহিনীক কেৱল প্ৰতিৰক্ষামূলক উদ্দেশ্যত ব্ৰিটিছ ঘাটি ব্যৱহাৰ কৰিবলৈ অনুমতি দিয়া হৈছে।
যোৱা শনিবাৰে আমেৰিকা আৰু ইজৰাইলে ইৰাণক আক্ৰমণ কৰাৰ পিছত সমগ্ৰ পশ্চিম এছিয়াত যুদ্ধৰ পৰিস্থিতি বিয়পি পৰে। ইৰাণে ইজৰাইলৰ ওপৰত প্ৰত্যাক্ৰমণ চলায়। পশ্চিম এছিয়াত আমেৰিকাৰ ঘাটি থকা সকলো দেশকে আক্ৰমণ কৰে তেহৰাণে। আনকি ব্ৰিটিছ ঘাটিকো লক্ষ্য কৰি আক্ৰমণ চলাইছে। এই পৰিস্থিতিত ষ্টাৰমাৰৰ মন্তব্য যথেষ্ট তাৎপৰ্যপূৰ্ণ। সোমবাৰে এক ভিডিঅ’ বাৰ্তাত ব্ৰিটিছ প্ৰধানমন্ত্ৰীয়ে কয়, “যোৱা দুদিন ধৰি ইৰাণে পশ্চিম এছিয়াত আক্ৰমণ নকৰা দেশসমূহৰ ওপৰত ধাৰাবাহিকভাৱে আক্ৰমণ চলাই আহিছে। ইৰাণে ব্ৰিটিছ নাগৰিক থকা হোটেল আৰু বিমানবন্দৰসমূহত আক্ৰমণ চলাইছে। এইটো এটা অতি বিপজ্জনক পৰিস্থিতি। পশ্চিম এছিয়াত কমেও দুই লাখ ব্ৰিটিছ নাগৰিক আছে।”
