কৰাচীৰ মার্কিন কনচুলেটত ইৰাণৰ সমর্থনত প্ৰদৰ্শন কৰা বিক্ষোভত প্ৰায় ৮ জন লোকৰ মৃত্যু হোৱা বুলি সংবাদ সংস্থা এ এফ পিয়ে জনাইছে। নিহতসকলৰ অধিকাংশৰে শৰীৰত গুলীৰ আঘাতৰ চিন আছে। অৱশ্যে এই গুলী কোনে চলাইছে সেয়া এতিয়াও স্পষ্ট নহয়। কিন্তু কেইবাটাও প্ৰতিবেদনে দাবী কৰিছে যে পাক সেনাই পৰিস্থিতি নিয়ন্ত্রণ কৰিবলৈ গুলী চলাইছে।
এটা দিনত ১২০০ বোমা নিক্ষেপ
আমেৰিকা-ইজৰাইল বায়ুসেনাই যৌথভাৱে ইৰাণত এটা দিনতে ১২০০ৰো অধিক বোমা নিক্ষেপ কৰিছে। মিনাবত ছোৱালী স্কুল, দক্ষিণ ইৰাণত হৰমোজগান প্রদেশত বোমা নিক্ষেপ কৰা হৈছে। হৰমোজগানত ১৪৮ জনৰ মৃত্যু হৈছে। আনহাতে, এই আক্ৰমণৰ গৰিহণা দি ইৰাণৰ বৈদেশিক মন্ত্রী আব্বাছ আৰাঘচিয়ে প্ৰতিশোধৰ হুংকাৰ দিছে।
কৰাচীত বিক্ষোভ
খামেইনিৰ মৃত্যুৰ প্রতিবাদত পাকিস্তানৰ কৰাচীতো বিক্ষোভ প্ৰদৰ্শন কৰা হৈছে। মার্কিন কনচুলেটত প্ৰৱেশ কৰিছে উত্তেজিত জনতা।
ইৰাণৰ আৰু মন্ত্রী নিহত
ইৰাণৰ সেনাপ্রধান আব্দুল ৰহিম মৌছাভি, প্রতিৰক্ষামন্ত্রী আজিজ নাচিৰজাদেহো শনিবাৰৰ মার্কিন-ইজৰাইল আক্ৰমণত নিহত হৈছে। দেওবাৰে সেই কথা নিশ্চিত কৰিছে তেহৰানৰ চৰকাৰী সংবাদ সংস্থাই।
কাশ্মীৰতো বিক্ষোভ
ইৰাণৰ সর্বোচ্চ ধর্মীয় নেতা খামেইনিৰ মৃত্যুৰ খবৰ লাভ কৰাৰ পিছতো জম্মু-কাশ্মীৰৰ ৰাজপথত বিক্ষোভ প্ৰদৰ্শনৰ বাবে নামি পৰিছে বহু লোক। মার্কিন-ইজৰাইলি আগ্রাসনৰ বিৰুদ্ধে প্ৰতিবাদকাৰীয়ে ক্ষোভ উজাৰি দিয়ে। ইৰাণৰ সমর্থনত খামেইনিৰ ছবি হাতত লৈ শ্রীনগৰ, বান্দিপোৰা আদিতো প্ৰতিবাদ কৰিছে।
দোহাত ইটোৰ পাছত সিটো বিস্ফোৰণ
কাটাৰৰ ৰাজধানী দোহাতো আক্ৰমণ চলাইছে ইৰাণে। ইটোৰ পাছত সিটো বিস্ফোৰণৰ শব্দ শুনা গৈছে। মার্কিন ঘাটিক লক্ষ্য কৰি এই আক্ৰমণ চলোৱা হৈছে।
ট্রাম্পৰ পুনৰ সাৱধানবাণী
ইৰাণৰ বাহিনীয়ে তীব্র প্ৰত্যুত্তৰ দিব বুলি হুংকাৰ দিয়াৰ পিছত সামাজিক মাধ্যমত নতুন বিবৃতি ট্রাম্পৰ। তেওঁ লিখিছে, ‘‘তেওঁলোকে কৈছে প্ৰত্যাক্ৰমণ কৰিবহেনো। সেইটো কৰাৰ সাহস নেদেখুৱাই যেন। যদি কৰে আমি এনেকুৱা আঘাত দিম, যাক পূৰ্বতে কেতিয়াও দেখা নাই।’’
ইজৰাইলত চাইৰেন
খামেইনিৰ মৃত্যুৰ পিছত পশ্চিম এছিয়াত নতুনকৈ ২৭টা মার্কিন ঘাটিতে ইৰাণে আক্ৰমণ আৰম্ভ কৰিছে। আনহাতে, ইজৰাইলত চাইৰেন বাজিছে। টেল আভিভত বাসিন্দাসকলক বাঙ্কাৰত বা নিৰাপদ আশ্রয়ত প্ৰৱেশ কৰিবলৈ কোৱা হৈছে। জৰ্ডানৰ সেনাবাহিনীয়ে এটি ক্ষেপণাস্ত্র ধ্বংস কৰিছে। সেইটো জৰ্ডানৰ আকাশসীমাত প্ৰৱেশ কৰিছিল। অৱশ্যে সেইটো ইৰাণৰ ক্ষেপণাস্ত্র নে ইজৰাইলৰ সেয়া স্পষ্ট নহয়।
ডুবাইত আবদ্ধ পি ভি সিন্ধু
ইৰাণত আমেৰিকা-ইজৰাইলৰ আক্ৰমণৰ ঘটনাত ডুবাই বিমানবন্দৰত আবদ্ধ হৈ পৰে ভাৰতীয় বেডমিণ্টন তাৰকা পিভি সিন্ধু। সামাজিক মাধ্যমত তেওঁ লিখিছে, ‘‘পৰিস্থিতি ক্রমশ ভয়াৱহ হৈ উঠিছে।’’
চীনৰ কঠোৰ বাৰ্তা
ইৰাণত ইজৰাইল আৰু আমেৰিকাৰ যৌথ আক্ৰমণৰ গৰিহণা দিছে চীনে। অবিলম্বে চীনা নাগৰিকসকলক ইৰাণ এৰাৰ নির্দেশ দিছে। বিমান পৰিসেৱা বিঘ্নিত হোৱাত কোন কোন স্থলপথ খোলা আছে সেয়াও কোৱা হৈছে।
খামেইনিৰ কন্যা-জোঁৱায়েকো নিহত
খামেইনিৰ কন্যা, জোঁৱাই আৰু নাতিনীৰো মৃত্যু হৈছে আমেৰিকা-ইজৰাইল বাহিনীৰ যৌথ আক্ৰমণত। মৃত্যু হৈছে খামেইনিৰ প্রধান উপদেষ্টা আৰু ইৰাণৰ প্রতিৰক্ষা কাউন্সিলৰ সচিব আলি ছামকানিৰো।
