হাণ্টা ভাইৰাছৰ (Hantavirus) আশংকা ক্ৰমাৎ বাঢ়িছে। আৰ্জেণ্টিনাৰ পৰা আটলাণ্টিক মহাসাগৰৰ কাবো ভাৰ্ডেলৈ যোৱা এম ভি হণ্ডিয়াছ ক্ৰুজ জাহাজখনত দুজন ভাৰতীয় নাগৰিক এই ভাইৰাছত আক্ৰান্ত হোৱা বুলি জানিব পৰা গৈছে।
অৱশ্যে দেওবাৰে স্পেইনত থকা ভাৰতীয় দূতাবাসে প্ৰকাশ কৰে যে এম ভি হণ্ডিয়াছ জাহাজত আক্ৰান্ত ভাৰতীয় নাগৰিক দুজন লক্ষণবিহীন আৰু সুস্থ। দূতাবাসে এক বিবৃতিত কয় যে হাণ্টা ভাইৰাছত আক্ৰান্ত জাহাজখনত ক্ৰু মেম্বাৰ হিচাপে কাম কৰা ভাৰতীয় নাগৰিক দুজনক নেদাৰলেণ্ডলৈ স্থানান্তৰ কৰা হৈছে আৰু স্বাস্থ্য সুৰক্ষাৰ নিয়ম অনুসৰি আছুতীয়াকৈ ৰখা হৈছে।
বিবৃতিটোত লগতে কোৱা হৈছে, “স্পেনিছ কৰ্তৃপক্ষই ভাৰতীয় নাগৰিক দুজনৰ সৈতে ঘনিষ্ঠ যোগাযোগত আছে। ভাৰতীয় নাগৰিকৰ মংগল আৰু সুৰক্ষা নিশ্চিত কৰিবলৈ পৰিস্থিতি নিয়মিতভাৱে নিৰীক্ষণ কৰা হৈছে।” ফ্ৰান্সে প্ৰকাশ কৰা অনুসৰি, জাহাজখনত থকা পাঁচজন ফ্ৰান্স যাত্ৰীৰ ভিতৰত এজন হাণ্টা ভাইৰাছত আক্ৰান্ত হৈছে।
দেওবাৰে তেওঁৰ লক্ষণ দেখা যায়। ফ্ৰান্সৰ প্ৰধানমন্ত্ৰী চেবাষ্টিয়ান লে কৰ্ন’ৱেলে টেলিভিছনৰ ভাষণত কয় যে প্ৰতি পাঁচজন লোকৰ ভিতৰত এজন আক্ৰান্ত হৈছে। পৰৱৰ্তী জাননী নিদিয়া পৰ্যন্ত তাৎক্ষণিকভাৱে কোৱাৰেণ্টাইনত ৰখা হৈছে এই পাঁচজন যাত্ৰীক।
ইতিমধ্যে বিশ্ব স্বাস্থ্য সংস্থাৰ মহামাৰী বিজ্ঞানৰ সঞ্চালক ডাঃ মাকিয়া ভান কেৰখোভে হাণ্টা ভাইৰাছ কৰ’না ভাইৰাছৰ দৰে একে নহয় বুলি ইতিমধ্যে আশ্বাস দিছে। গতিকে সংক্ৰমণৰ মাত্ৰা তাৰ কাষ চাপিব পৰাৰ কোনো কাৰণ নাই। আমেৰিকাৰ ৰাষ্ট্ৰপতি ড’নাল্ড ট্ৰাম্পে এই বিষয়টোক গুৰুত্বসহকাৰে লৈছে বুলি মন্তব্য কৰিছে।
ইফালে এই সন্দৰ্ভত ১২ খন দেশলৈ হুৱে সকীয়নি আগবঢ়াইছে। সংক্ৰমণ সংঘটিত হোৱা জাহাজখনৰ যাত্ৰীসকলে আতংকিত হৈ গন্তব্যস্থান পোৱাৰ পূৰ্বে নামি আহিছিল।
আমেৰিকা, কানাডা, ডেনমাৰ্ক, জাৰ্মানী, নেদাৰলেণ্ড, নিউজীলেণ্ড, ছেইণ্ট কিটছ এণ্ড নেভিছ, ছিংগাপুৰ, ছুইডেন, ছুইজাৰলেণ্ড, তুৰস্ক, ব্ৰিটেইন আদি দেশৰ জৰিয়তে এই ভাইৰাছ বিয়পিব পাৰে বুলি সকীয়াই দিয়া হৈছে। এম ভি হণ্ডিয়াছ নামৰ ক্ৰুজ জাহাজখন আৰ্জেণ্টিনাৰ পৰা আটলাণ্টিক মহাসাগৰৰ কাবো ভাৰ্ডেলৈ গৈ আছিল।
হুৱে জনোৱা মতে, জাহাজখনত হাণ্টা ভাইৰাছত আক্ৰান্ত আঠজন লোক চিনাক্ত কৰা হৈছে। ইয়াৰে তিনিজনৰ মৃত্যু হৈছে। পৰীক্ষাগাৰত জাহাজখনত থকা পাঁচজন লোক আক্ৰান্ত হোৱা বুলি নিশ্চিত কৰা হৈছে। এই পৰ্যন্ত তিনিজন লোকৰ নিশ্চিতিৰ ৰিপোৰ্ট পোৱা হোৱা নাই।
৬ এপ্ৰিলত জাহাজখনত থকা প্ৰথমজন আক্ৰান্ত ব্যক্তিক উদ্ধাৰ কৰা হয়। ১১ এপ্ৰিলত তেওঁৰ মৃত্যু হয়। পিছত লোকজনৰ পত্নীও আক্ৰান্ত হয়। তেওঁ চেণ্ট হেলেনাত নামি যায়। পৰৱৰ্তী সময়ত তেওঁৰ অৱস্থাৰ অৱনতি ঘটে। ২৫ এপ্ৰিলত দক্ষিণ আফ্ৰিকাৰ জোহান্সবাৰ্গত তেওঁৰ মৃত্যু হয়।
গেব্ৰেইছাছে কয় যে আক্ৰান্ত এন্দুৰ বা অনুৰূপ প্ৰাণীৰ প্ৰস্ৰাৱ, লালটি, নাক বা চকুৰ পৰা নিৰ্গত হোৱা পানীৰ জৰিয়তে এই সংক্ৰমণ বিয়পে। এই ভাইৰাছৰ সংক্ৰমণৰ ঘটনা প্ৰধানকৈ লেটিন আমেৰিকাত দেখা গৈছে।
হুৱে কয় যে কোনোবাই সংক্ৰমিত ব্যক্তিৰ সৈতে দীৰ্ঘদিন ধৰি সংস্পৰ্শলৈ আহিলেহে আক্ৰান্ত হ’ব পাৰে। এই ক্ষেত্ৰত যদি তেওঁলোক আক্ৰান্ত ব্যক্তিৰ সৈতে একেটা ঘৰতে থাকে, তেওঁলোকৰ সংগী বা যত্ন লোৱা ব্যক্তি হয় তেন্তে সেই ব্যক্তিজনো আক্ৰান্ত হ’ব পাৰে।
