প্ৰধানমন্ত্ৰী নৰেন্দ্ৰ মোদীয়ে (PM Modi) কৰোনা যুগৰ কথা মনত পেলাই দেশবাসীক পুনৰ ঘৰৰ পৰাই কাম কৰিবলৈ আহ্বান জনায়। তেওঁ লগতে উল্লেখ কৰে যে পশ্চিম এছিয়াৰ যুদ্ধ পৰিস্থিতিয়ে ভাৰতত ‘গভীৰ প্ৰভাৱ’ পেলাইছে।
এনে পৰিস্থিতিত প্ৰধানমন্ত্ৰীয়ে দেশবাসীক অনুৰোধ জনায় যে দেশৰ বৈদেশিক মুদ্ৰাৰ মজুত ৰাহি কৰিবলৈ পেট্ৰ’ল-ডিজেলৰ ব্যৱহাৰ হ্ৰাস কৰিব লাগে। লগতে তেওঁ ৰন্ধন প্ৰণালীত ব্যৱহাৰ কৰা তেল কম ব্যৱহাৰ কৰিবলৈ অনুৰোধ জনায়।
এই সামগ্ৰীসমূহৰ এটা বৃহৎ অংশ পেট্ৰ’ল, ডিজেল, ৰন্ধন গেছ, খোৱা তেল, সোণ, তাম, ৰাসায়নিক সাৰ আদি ভাৰতে বহিঃৰাষ্ট্ৰৰ পৰা আমদানি কৰিবলগীয়া হয়। দেশৰ বৈদেশিক মুদ্ৰাৰ মজুতত হেঁচা পৰিছে। বৰ্তমানৰ পৰিস্থিতিয়ে বিশ্বজুৰি এই সামগ্ৰীসমূহৰ যোগানৰ ওপৰত প্ৰভাৱ পেলাইছে। আন্তঃৰাষ্ট্ৰীয় বজাৰত বৃদ্ধি পাইছে দাম।
এনে পৰিস্থিতিত প্ৰধানমন্ত্ৰীয়ে দেশবাসীক এই সামগ্ৰীসমূহ পৰিমিতভাৱে ব্যৱহাৰ কৰিবলৈ অনুৰোধ জনায়। মোদীয়ে দেশবাসীক আগন্তুক এবছৰৰ বাবে বিদেশ ভ্ৰমণ বন্ধ কৰিবলৈ আহ্বান জনায়। তেওঁৰ অনুৰোধ যে ঘৰতে যি অনুষ্ঠান অনুষ্ঠিত নহওক কিয়, এবছৰৰ বাবে কোনো সোণৰ গহনা কিনিব নালাগে।
লগতে কৃষকৰ কৃষিভূমিত ৰাসায়নিক সাৰৰ ব্যৱহাৰ আধালৈ হ্ৰাস কৰিবলৈ অনুৰোধ জনায়। দেওবাৰে তেলেংগানাৰ ছিকন্দৰাবাদত এক সমাৱেশত ভাষণ দি মোদীয়ে কয়, “ভাৰত কেতবোৰ ডাঙৰ প্ৰত্যাহ্বানৰ সন্মুখীন হৈছে। কৰোনাকালত আন্তঃৰাষ্ট্ৰীয় বাণিজ্যৰ যোগান শৃংখলে এক বৃহৎ সংকটৰ সন্মুখীন হ’বলগীয়া হৈছিল।
কৰোনাৰ পিছত ইউক্ৰেইনত যুদ্ধ আৰম্ভ হৈছিল। ইয়াৰ ফলত বিশ্বৰ সমস্যা আৰু অধিক বৃদ্ধি পাইছিল। খাদ্য, ইন্ধন আৰু সাৰত ইয়াৰ ব্যাপক প্ৰভাৱ পৰিছে। যোৱা পাঁচ-ছয় বছৰ ধৰি আমাৰ চৰকাৰে অবিৰত প্ৰচেষ্টা চলাই আহিছে। ভাৰতত বৃহৎ তেলৰ কূপ নাই।
আমি নিজৰ প্ৰয়োজনৰ বাবে পেট্ৰ’ল, ডিজেল, গেছ আন দেশৰ পৰা বৃহৎ পৰিমাণে আমদানি কৰিব লাগিব। যুদ্ধৰ ফলত সমগ্ৰ বিশ্বতে পেট্ৰ’ল, ডিজেল, গেছ, সাৰৰ দাম বৃদ্ধি পাইছে। চুবুৰীয়া দেশসমূহৰ পৰিস্থিতি কেনেকুৱা হৈছে আপোনালোকে বাতৰিকাকতত দেখিব পাৰে।”
প্ৰধানমন্ত্ৰীয়ে কয় যে আন্তঃৰাষ্ট্ৰীয় বাণিজ্যৰ যোগান শৃংখলত অবিৰত সংকটজনক পৰিস্থিতিৰ সৃষ্টি হৈছে। এই পৰিস্থিতিত চৰকাৰে যিমানেই চেষ্টা নকৰক কিয় সমস্যা বাঢ়ি গৈ থাকে।
সেয়েহে এই পৰিস্থিতিৰ সৈতে মোকাবিলা কৰিবলৈ সমগ্ৰ দেশবাসীক একত্ৰিতভাৱে যুঁজিবলৈ মোদীয়ে আহ্বান জনায়। তেওঁ কয়, “দেশৰ বাবে মৃত্যু কেৱল দেশপ্ৰেম নহয়। দেশৰ বাবে জীয়াই থকা আৰু দেশৰ প্ৰতি নিজৰ কৰ্তব্য পালন কৰাটোও দেশপ্ৰেম।” বিশ্ব অশান্তিৰ এই মুহূৰ্তত দেশক মনত ৰাখি দৃঢ়তাৰে আহ্বান জনায় মোদীয়ে।
