গুৱাহাটীৰ টাটা ইনষ্টিটিউট অব ছ’চিয়েল ছায়েন্স ইউনিভাৰ্চিটীত (TISS Guwahati) মহিলা হোষ্টেলৰ স্নানাগাৰত এটা গোপন কেমেৰা লগোৱা সন্দৰ্ভত এজাহাৰ দাখিল কৰা হৈছে। আৰক্ষীয়ে এজাহাৰ লাভ কৰাৰ পিছত বুধবাৰে তাৰ পৰা কেমেৰাটো উদ্ধাৰ কৰে।
সমগ্ৰ ঘটনাৰ তদন্ত অব্যাহত আছে। এই ঘটনাৰ পিছত ছাত্ৰ-ছাত্ৰীৰ সুৰক্ষাক লৈ প্ৰশ্ন উত্থাপন হৈছে। জানিব পৰা মতে, বুধবাৰে পুৱা এগৰাকী ছাত্ৰীয়ে হোষ্টেলৰ তৃতীয় মহলাৰ স্নানাগাৰত চাবোনৰ পেকেটৰ ভিতৰত লুকুৱাই থোৱা কেমেৰাটো উদ্ধাৰ কৰে।
ইয়াৰ পিছতে জালুকবাৰী আৰক্ষী থানাত এফ আই আৰ দাখিল কৰে। আৰক্ষীৰ প্ৰাৰম্ভিক তদন্তৰ অন্তত কেমেৰাটোৱে ভিডিঅ’ ৰেকৰ্ডিং কৰি থকা বুলি জানিব পৰা গৈছে আৰু সম্ভৱতঃ পাঁচ দিন তাত ৰখা হৈছিল।
এই ঘটনাৰ লগত কোন বা কিয় জড়িত তাৰ তদন্ত আৰক্ষীয়ে অব্যাহত ৰাখিছে। এই সন্দৰ্ভত গুৱাহাটীৰ ডিচিপি নোমল মহন্তই কয়, “আমি কেমেৰাটো উদ্ধাৰ কৰি ফৰেনছিক পৰীক্ষাৰ বাবে প্ৰেৰণ কৰিছোঁ, আমি সমগ্ৰ বিষয়টোৰ তদন্ত কৰি আছোঁ।”
ইফালে এই ঘটনাক তীব্ৰ গৰিহণা দিছে টি আই এছ এছ প্ৰশাসনে। তেওঁলোকে আৰক্ষীক সম্পূৰ্ণ সহযোগিতা আগবঢ়োৱাৰ আশ্বাস দিছে। এই ঘটনাৰ পিছতে হোষ্টেলৰ ছাত্ৰীসকলে কেম্পাছত প্ৰতিবাদ সাব্যস্ত কৰে। নিৰাপত্তাৰ অভাৱক লৈ তেওঁলোকে প্ৰশ্ন উত্থাপন কৰে। বাহিৰৰ লোকৰ প্ৰৱেশ নিয়ন্ত্ৰণৰ লগতে হোষ্টেলত চিচিটিভি কেমেৰা বৃদ্ধিৰ দাবী উত্থাপন কৰে।
