ডিজিটেল জগতত তেওঁ অতি জনপ্ৰিয়। কেৱল জনপ্ৰিয় হোৱাই নহয়, এই বিশ্বৰ লগত তেওঁ যে গভীৰভাৱে জড়িত সেই কথা বাৰে বাৰে প্ৰমাণিত হৈছে। এইবাৰ ভাৰতৰ প্ৰধানমন্ত্ৰী নৰেন্দ্ৰ মোদীয়ে (Narendra Modi) সেই সকলোবোৰ অভিলেখ অতিক্ৰম কৰিলে।
বৃহস্পতিবাৰে তেওঁ ইনষ্টাগ্ৰামত ১০ কোটি ফ’ল’ৱাৰ লাভ কৰা বিশ্বৰ প্ৰথমজন ৰাষ্ট্ৰনেতা আৰু ৰাজনীতিবিদ হিচাপে পৰিগণিত হয়। ইয়াৰ দ্বাৰা ডিজিটেল জগতত অনন্য বিশ্ব অভিলেখ গঢ়িলে প্ৰধানমন্ত্ৰীয়ে।
২০১৪ চনত দেশৰ প্ৰধানমন্ত্ৰী হিচাপে দায়িত্ব লোৱাৰ পিছত মোদীয়ে এটা ইনষ্টাগ্ৰাম একাউণ্ট খুলিছিল। তেতিয়াৰে পৰা এই ছ’চিয়েল মিডিয়া প্লেটফৰ্মত তেওঁৰ জনপ্ৰিয়তা যোৱা দশকত অপৰিসীমভাৱে বৃদ্ধি পাইছে। পৰিসংখ্যাই দেখুৱাইছে যে জনপ্ৰিয়তাৰ ক্ষেত্ৰত তেওঁ আমেৰিকাৰ ৰাষ্ট্ৰপতি ড’নাল্ড ট্ৰাম্পক বহু পিছ পেলাই থৈ গৈছে।
বৰ্তমান ট্ৰাম্পৰ অনুগামী ৪ কোটি ৩২ লাখ। কিন্তু মোদীৰ অনুগামীৰ সংখ্যা দুগুণতকৈও অধিক।
ৰাষ্ট্ৰনেতাসকলৰ ভিতৰত মোদী আৰু ট্ৰাম্পৰ পিছত ইণ্ডোনেছিয়াৰ ৰাষ্ট্ৰপতি প্ৰবোধ ছুবিয়ানো এই তালিকাত আছে। তেওঁৰ অনুগামীৰ সংখ্যা ১.৫ কোটি।
তাৰ পিছতে আছে ব্ৰাজিলৰ ৰাষ্ট্ৰপতি লুইজ ইনাচিঅ’ লুলা দা চিলভা (১৪ কোটি ৪ লাখ), তুৰ্কীৰ ৰাষ্ট্ৰপতি ৰেচেপ টাইইপ এৰদোগান (১১ কোটি ১৬ লাখ)। আৰ্জেণ্টিনাৰ ৰাষ্ট্ৰপতি জেভিয়াৰ মিয়েলে (৬৪ লাখ)। ইয়াৰ পৰা স্পষ্ট যে দেশতেই হওক বা বিদেশতেই হওক যুৱক-যুৱতীসকলৰ মাজত মোদীৰ জনপ্ৰিয়তা স্পষ্টভাৱে বেছি।
ইনষ্টাগ্ৰামত জনপ্ৰিয়তাৰ ক্ষেত্ৰত দেশৰ ৰাজনৈতিক আৰু হেভিৱেট নেতাকো চেৰ পেলাই থৈ গৈছে মোদীয়ে। ৰাষ্ট্ৰীয় পৰ্যায়ত মোদীৰ পিছত উত্তৰ প্ৰদেশৰ মুখ্যমন্ত্ৰী যোগী আদিত্যনাথ। তেওঁৰ অনুগামী ১ কোটি ৬১ লাখ। তাৰ পিছত কংগ্ৰেছ নেতা ৰাহুল গান্ধী (১ কোটি ২৬ লাখ)।
