মহিলাৰ ছাৰ্ভাইকেল কেন্সাৰ (Cancer) অৰ্থাৎ জৰায়ুমুখৰ কৰ্কট ৰোগ প্ৰতিৰোধৰ ক্ষেত্ৰত অধিক সক্ৰিয় হৈ পৰিছে কেন্দ্ৰীয় চৰকাৰ। কেন্দ্ৰীয় চৰকাৰৰ এক সূত্ৰই মঙলবাৰে প্ৰকাশ কৰা অনুসৰি, শীঘ্ৰে সমগ্ৰ দেশতে হিউমেন পেপিলোমা ভাইৰাছ (এইচ পি ভি) টীকাকৰণ আঁচনি আৰম্ভ হ’ব। ১৪ বছৰ বয়সৰ ছোৱালীক এই ভেকচিন দিয়া হ’ব।
সূত্ৰটোৱে জনোৱা মতে, এই আঁচনিখনত এইচ পি ভি ভেকচিন গাৰ্ডাচিলৰ একক ড’জ দিয়া হ’ব। এই ভেকচিনে এইচ পি ভি প্ৰকাৰ ১৬ আৰু ১৮ প্ৰতিৰোধ কৰাত সক্ৰিয় ভূমিকা পালন কৰে। এই ভাইৰাছে ছাৰ্ভাইকেল কেন্সাৰ বা জৰায়ুমুখৰ কৰ্কট ৰোগ সৃষ্টি কৰিব পাৰে।
এগৰাকী বিষয়াই কয় যে বিশ্বৰ লগতে ভাৰতৰ বিজ্ঞানীসকলে নিশ্চিত কৰিছে যে এই ভেকচিনৰ একক ড’জ মহিলাক নিৰ্দিষ্ট বয়সত দিলে সুৰক্ষা লাভ কৰিব। ১৪ বছৰ বয়সত ছোৱালীক এই ভেকচিন দিয়াটোৱে সৰ্বাধিক সুৰক্ষা প্ৰদান কৰিব।
কাৰণ তেনে ছোৱালী এতিয়াও কৰ’না ভাইৰাছৰ সংস্পৰ্শলৈ অহা নাই। মুকলি বজাৰত গাৰ্ডাচিল-৪ৰ এটা ড’জৰ দাম ৩,৯২৭ টকা। ১৫ বছৰৰ তলৰ ছোৱালীক মুঠ দুটা ড’জ দিব লাগে। ১৫ বছৰৰ ওপৰৰ ছোৱালীক এই ভেকচিনৰ তিনিটা ড’জ দিব লাগে।
এম এছ ডি ইণ্ডিয়াই এই ভেকচিন প্ৰস্তুত কৰে। অৱশ্যে চৰকাৰী আঁচনিৰ অধীনত ১৪ বছৰীয়া ছোৱালীয়ে এই ভেকচিন বিনামূলীয়াকৈ লাভ কৰিব। ভেকচিন লোৱাৰ ফলত ভৱিষ্যতে ছাৰ্ভাইকেল কেন্সাৰ হোৱাৰ সম্ভাৱনা বহু পৰিমাণে হ্ৰাস পাব বুলি বিশ্বাস কৰা হয়।
২০০৬ চনত এই ভেকচিন প্ৰৱৰ্তন কৰা হৈছিল। তেতিয়াৰে পৰা বিশ্বজুৰি ৫০ কোটি ড’জ দিয়া হৈছে। এই টীকাকৰণ ইতিমধ্যে ১৬০ খন দেশত ৰাষ্ট্ৰীয় প্ৰকল্প হিচাপে স্বীকৃতি লাভ কৰিছে। এইবাৰ ভাৰততো প্ৰৱৰ্তন কৰা হ’ব। এইচ পি ভি ভেকচিনৰ এটা ড’জ ৯০ খন দেশত দিয়া হয়।
পৰিসংখ্যা অনুসৰি, ভাৰতত মহিলাসকলৰ যিধৰণৰ কেন্সাৰ হয়, ছাৰ্ভাইকেল কেন্সাৰ দ্বিতীয় স্থানত আছে। প্ৰতি বছৰে প্ৰায় ৮০ হাজাৰ মহিলা নতুনকৈ ইয়াৰ দ্বাৰা আক্ৰান্ত হয়। প্ৰতি বছৰে প্ৰায় ৪২ হাজাৰ মহিলাৰ এই কৰ্কট ৰোগত মৃত্যু হয়।
