পশ্চিমবংগ (West Bengal)ৰ বিশিষ্ট ৰাজনীতিবিদ মুকুল ৰয়ৰ দেহাৱসান (Mukul Roy passway)। মৃত্যুৰ সময়ত তেওঁৰ বয়স আছিল ৭১ বছৰ। একাধিক শাৰীৰিক সমস্যাৰ বাবে দীৰ্ঘদিন ধৰি ছল্ট লেকৰ এখন ব্যক্তিগত চিকিৎসালয়ত ভৰ্তি হৈ আছিল প্ৰবীণ নেতাগৰাকী। দেওবাৰে মাজনিশা তাতেই তেওঁ শেষ নিশ্বাস ত্যাগ কৰে। তেওঁৰ অৱসানে ৰাজনৈতিক মহলত শোকৰ ছাঁ পেলাইছে। মুকুল ৰয়ৰ মৃত্যুত শোক প্ৰকাশ কৰিছে প্ৰধানমন্ত্ৰী নৰেন্দ্ৰ মোদী, বংগৰ মুখ্যমন্ত্ৰী মমতা বেনাৰ্জী, তৃণমূলৰ সাধাৰণ সম্পাদক অভিষেক বেনাৰ্জীয়ে।
একালৰ ‘বংগ ৰাজনীতিৰ চাণক্য’গৰাকীয়ে বৃক্কৰ ৰোগকে ধৰি একাধিক শাৰীৰিক সমস্যাৰ বাবে দীৰ্ঘদিন ধৰি অসুস্থ হৈ আছিল। মাজে মাজে তেওঁক চিকিৎসালয়ত ভৰ্তি কৰিবলগা হৈছিল। দেওবাৰে মাজনিশা ছল্ট লেকৰ এখন ব্যক্তিগত চিকিৎসালয়ত চিকিৎসাধীন হৈ থকা অৱস্থাত হাৰ্ট এটেকৰ বাবে তেওঁ শেষ নিশ্বাস ত্যাগ কৰে। তেওঁৰ মৃত্যুৰ খবৰ পোৱাৰ পিছতে তেওঁৰ ঘৰৰ সন্মুখত তৃণমূলৰ নেতা, কৰ্মী আৰু সমৰ্থক গোট খায়। তৃণমূল কংগ্ৰেছৰ পৰা বিজেপিলৈ দল সলনি কৰাৰ পিছত ২০২১ চনত কৃষ্ণনগৰ উত্তৰ সমষ্টিৰ পৰা বিজেপিৰ টিকটত প্ৰতিদ্বন্দ্বিতা কৰা মুকল ৰয় জয়ী হৈ বিধায়ক হিচাপে নিৰ্বাচিত হয়।
পিছত তেওঁ পুনৰ তৃণমূলত যোগদান কৰে। অৱশ্যে বিধায়ক পদৰ পৰা পদত্যাগ কৰা নাছিল। ফলত তৃণমূলত যোগদান কৰাৰ পিছতো মুকুল ৰয় কাৰ্যভাৰত বিজেপিৰ বিধায়ক হৈয়েই থাকিল। লগতে তেওঁক পাব্লিক একাউণ্টছ কমিটীৰ অধ্যক্ষ হিচাপে নিযুক্তি দিয়া হয়। ইফালে তেওঁক বিধায়ক পদৰ পৰা অযোগ্য ঘোষণা কৰাৰ গোচৰ আদালতত উপস্থিত হয়। যদিও কলিকতা উচ্চ ন্যায়ালয়ে অযোগ্যতাৰ সপক্ষে ৰায় দিয়ে, উচ্চতম ন্যায়ালয়ে উক্ত সিদ্ধান্তৰ ওপৰত অন্তৱৰ্তীকালীন স্থগিতাদেশ জাৰি কৰে।
কংগ্ৰেছৰ জৰিয়তে ৰাজনীতিত প্ৰৱেশ কৰিছিল মুকুল ৰয়ে। তেওঁ তৃণমূল কংগ্ৰেছৰ এগৰাকী প্ৰতিষ্ঠাপক সদস্য আছিল। এটা সময়ত তেওঁ ৰাজ্যসভাৰ সদস্য পদতো অধিষ্ঠিত আছিল। জাহাজ মন্ত্ৰী পদত অধিষ্ঠিত হোৱাৰ পিছত তেওঁ ৰে’ল মন্ত্ৰী পদতো অধিষ্ঠিত হয়। অৱশ্যে একালৰ ‘বংগ ৰাজনীতিৰ চাণক্য’গৰাকীয়ে ৰাজনৈতিক ক্ষেত্ৰখনত ‘বিধায়ক’ হিচাপেই যাত্ৰাৰ অন্ত পেলায়।
