নতুন দিল্লীৰ প্ৰধানমন্ত্ৰী নৰেন্দ্ৰ মোদীৰ চৰকাৰী বাসগৃহৰ (PM Residence) সমীপত ৰেচ কোৰ্চ ৰোডত (বৰ্তমান লোক কল্যাণ মাৰ্গ নামেৰে পৰিচিত) অৱস্থিত তিনিটা বস্তি উচ্ছেদ কৰিবলৈ আগবাঢ়িছে চৰকাৰ। কেন্দ্ৰীয় গৃহ নিৰ্মাণ আৰু নগৰ উন্নয়ন মন্ত্ৰালয়ে সংশ্লিষ্ট বাসিন্দাসকলক ৬ মাৰ্চৰ ভিতৰত ঘৰ খালী কৰিবলৈ নিৰ্দেশ দিছে।
উল্লেখ্য যে দিল্লীত বিজেপিয়ে ক্ষমতা দখল কৰাৰ এবছৰ সম্পূৰ্ণ হোৱাৰ পূৰ্বেই এই জাননী জাৰি কৰা হৈছে। ইণ্ডিয়ান এক্সপ্ৰেছত প্ৰকাশিত এক প্ৰতিবেদন অনুসৰি, ৰেচ কোৰ্চ ৰোডৰ ভাই ৰাম কেম্প, মছজিদ কেম্প আৰু ডি আই ডি কেম্পত বাস কৰা মুঠ ৭১৭টা পৰিয়াললৈ এই জাননী প্ৰেৰণ কৰা হৈছে।
জাননীখনত স্পষ্টকৈ উল্লেখ আছে যে নিৰ্দেশনা পালন নকৰিলে সংশ্লিষ্ট পৰিয়ালসমূহৰ বিৰুদ্ধে ‘প্ৰয়োজনীয় আইনী ব্যৱস্থা গ্ৰহণ কৰা হ’ব’। অৱশ্যে উচ্ছেদৰ উপৰি স্থানচ্যুত পৰিয়ালক পুনৰ সংস্থাপনৰ ক্ষেত্ৰতো কেন্দ্র সক্ৰিয় হৈ পৰিছে।
চৰকাৰী সংস্থা ‘দিল্লী নগৰীয়া আশ্ৰয় উন্নয়ন ব’ৰ্ডে’ (DUSIB) ইতিমধ্যে তেওঁলোকৰ বাবে বিকল্প আৱাসৰ ব্যৱস্থা প্ৰস্তুত কৰিছে। কেন্দ্ৰীয় গৃহ নিৰ্মাণ আৰু নগৰ উন্নয়ন মন্ত্ৰালয়ৰ দ্বাৰা পৰিচালিত ভূমি আৰু উন্নয়ন কাৰ্যালয়ে অহা ৬ মাৰ্চৰ ভিতৰত সাৱদা ঘেভৰাৰ DUSIB কলনীত আবণ্টিত ফ্লেটলৈ স্থানান্তৰিত হ’বলৈ ৭১৭টা পৰিয়ালক অনুৰোধ জনাইছে।
কিন্তু দিল্লী উচ্চ ন্যায়ালয়ৰ নিৰ্দেশ অনুসৰি, সাৱদা ঘেভৰাৰ ‘পুনৰ্বাসন পেকেজ’ কল’নীৰ পৰা ৰেচ কোৰ্চ ৰোডলৈ প্ৰায় ৪৫ কিলোমিটাৰ দূৰত্ব। ফলত স্থানচ্যুত হোৱা বহু পৰিয়ালে ক্ষোভ প্ৰকাশ কৰিছে।
