ভাৰতত চলি থকা আন্তঃৰাষ্ট্ৰীয় নৌসেনাৰ অনুশীলনত (Naval Exercise) বাংলাদেশেও যোগদান কৰিছে। বুধবাৰে অন্ধ্ৰপ্ৰদেশৰ বিশাখাপট্টনমত অনুষ্ঠিত আন্তঃৰাষ্ট্ৰীয় নৌবহৰ পৰ্যালোচনা অনুশীলনত বাংলাদেশৰ নৌসেনাই যোগদান কৰে।
বিশ্বৰ বিভিন্ন প্ৰান্তৰ পৰা মুঠ ৭০ খন দেশে নিজ নিজ যুদ্ধ জাহাজ লৈ এই অনুশীলনলৈ আহিছে। একাংশৰ মতে, বাংলাদেশৰ উপস্থিতিয়ে এই অনুশীলনত এক বেলেগ মাত্ৰা সংযোজন কৰিছে।
বাংলাদেশে ভাৰতলৈ আনিছে যুদ্ধ জাহাজ ‘সমুদ্ৰ অভিযান’।
সোমবাৰে তেওঁলোকে এই অনুশীলনত যোগদান কৰিবলৈ দেশত উপস্থিত হয়। ভাৰতৰ ৰাষ্ট্ৰপতি দ্ৰৌপদী মুৰ্মুৱে বুধবাৰে নৌসেনাৰ অনুশীলনৰ পৰ্যালোচনা কৰে। তেওঁৰ মতে, এই অনুশীলন আচলতে ‘দেশসমূহৰ আস্থা, ঐক্য আৰু সামুদ্ৰিক ঐতিহ্যৰ প্ৰতি সন্মানৰ প্ৰতিফলন’।
মুৰ্মুৱে কয়, “এই সকলোবোৰ জাহাজে বিভিন্ন পতাকা উৰুৱাই আৰু বিভিন্ন দেশৰ নাৱিকসকলে ঐক্যৰ মনোভাবক উজ্জ্বল কৰি তুলিছে। আমাৰ অনুশীলনৰ বিষয়বস্তু হৈছে সামুদ্ৰিক ঐক্য। ইয়াক সুন্দৰকৈ চিত্ৰিত কৰা হৈছে। এই সংযুক্ত নৌসেনাৰ সংকল্পই সকলো বাধা অতিক্ৰম কৰিব পাৰে। বিশ্ব সমাজৰ বাবে এয়া এক ইতিবাচক বাৰ্তা।”
আন্তঃৰাষ্ট্ৰীয় সামুদ্ৰিক নীতিৰ ক্ষেত্ৰত ভাৰতৰ স্থিতি ব্যাখ্যা কৰি ৰাষ্ট্ৰপতিগৰাকীয়ে কয়, “আমি সকলোৱে সাগৰত শান্তি, স্থিতিশীলতা আৰু সহযোগিতা বজাই ৰখাৰ বাবে প্ৰতিশ্ৰুতিবদ্ধ। আন্তঃৰাষ্ট্ৰীয় সম্পৰ্কত ভাৰতে ‘বিশ্ব পৰিয়াল’ নীতিত বিশ্বাস কৰে।” এই নীতিৰ জৰিয়তেহে সামুদ্ৰিক সুৰক্ষা, স্থায়িত্ব আৰু স্থিতিশীলতা নিশ্চিত কৰিব পৰা যাব বুলি ৰাষ্ট্ৰপতিগৰাকীয়ে বিশ্বাস কৰে।
উল্লেখ্য যে বাংলাদেশৰ বাহিৰেও বুধবাৰে ইণ্ডোনেছিয়া, সংযুক্ত আৰব আমিৰশ্বাহী, অষ্ট্ৰেলিয়া, শ্ৰীলংকা, থাইলেণ্ডকে ধৰি বহু দেশে এই অনুশীলনত যোগদান কৰিছে। ভাৰতৰ হৈ বিশাখাপট্টনমত আছে যুদ্ধ জাহাজ আই এন এছ বিক্ৰান্ত।
