সোমবাৰৰ পৰা আৰম্ভ হৈছে কাৰ্বি যুৱ মহোৎসৱ (Karbi Youth Festival)। উত্তৰ-পূৰ্বাঞ্চলৰ ভিতৰতে সৰ্ববৃহৎ ৫২ সংখ্যক (52 No) কাৰ্বি মহোৎসৱক কেন্দ্ৰ কৰি পুৱাৰে পৰা উদুলি-মুদুলি ডিফু (Diphu)ৰ সমীপৰ তাৰালাংছ’ৰ কাৰ্বি পিপ’লছ হল (Karbi Peoples Hall)ৰ বাকৰি৷ সৃষ্টি হৈছে এক বৰ্ণিল পৰিৱেশৰ। কাৰ্বি পৰম্পৰাগত সাজ-পাৰেৰে উত্তৰ-পূৰ্বাঞ্চলৰ বিভিন্ন প্ৰান্তৰ ৩৪টা মণ্ডলৰ প্ৰায় ১০ হাজাৰোধিক শিল্পীৰ মনোমোহা সাংস্কৃতিক শোভাযাত্ৰাই কাৰ্বি সংস্কৃতিক উজ্জীৱিত কৰি তোলে।
টাইৱান, হাংগেৰী আৰু নেপালৰ দূতাবাসৰ প্ৰতিনিধিয়ে অংশগ্ৰহণ কৰা এই কাৰ্বি মহোৎসৱৰ কাৰ্যসূচী আনুষ্ঠানিকভাৱে উদ্বোধন কৰে কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে ৷ ইয়াৰ উপৰি কেৰালা আৰু অন্ধ্ৰপ্ৰদেশৰ এটা সাংস্কৃতিক গৱেষকৰ দলেও অনুষ্ঠানত অংশগ্ৰহণ কৰে৷ উল্লেখ্য যে ১৬ ফেব্ৰুৱাৰীৰ পৰা আৰম্ভ হোৱা কাৰ্বি যুৱ মহোৎসৱ অহা ১৯ ফেব্ৰুৱাৰীলৈকে বিভিন্ন বৰ্ণাঢ্য কাৰ্যসূচীৰে অনুষ্ঠিত হ’ব৷
কাৰ্বি কালচাৰেল চ’ছাইটীৰ সভাপতি হোমছিং বে’য়ে পুৱা পতকা উত্তোলনেৰে কাৰ্যসূচীৰ শুভাৰম্ভ কৰাৰ পিছত কাৰ্বি সংস্কৃতিৰ সৃষ্টিকৰ্তাৰূপে গণ্য কৰা ৰাংছিনা ছাৰপ’লৈ নৈবদ্য আগবঢ়াই বাকী কাৰ্যসূচীসমূহ শুভাৰম্ভ কৰা হয়৷ ইফালে বিয়লিৰ পৰা তাৰালাংছ’ৰ লংমিৰজেং, ছেংমিৰজেং মুকলি মঞ্চত বিভিন্ন প্ৰতিযোগিতাসমূহ আৰম্ভ হয়৷ আনহাতে, কাৰ্বি যুৱ মহোৎসৱ উপলক্ষে জনজাতীয় গাঁও, বিভিন্ন বিভাগৰ প্ৰদৰ্শনীৰ লগতে বাণিজ্যমেলাও অনুষ্ঠিত হৈছে৷
এই চাৰিদিনীয়া কাৰ্যসূচীত কাৰ্বি লোক-সংস্কৃতি, নৃত্য-গীত আৰু বিভিন্ন খেল-ধেমালিৰ প্ৰতিযোগিতা অনুষ্ঠিত হ’ব। ১৯ ফেব্ৰুৱাৰীৰ অন্তিম দিনৰ সাংস্কৃতিক সন্ধিয়াৰ মুখ্য আকৰ্ষণ হ’ব উজবেকিস্তানৰ সংগীত শিল্পীৰ দল । ইয়াৰ উপৰি ইণ্ডিয়ান আইডল খিতাপ বিজয়ী পৱনদ্বীপৰ সংগীতানুষ্ঠানো থাকিব৷
