এদিনীয়া ভ্ৰমণসূচীৰে শনিবাৰে অসমলৈ আহিছে প্ৰধানমন্ত্ৰী নৰেন্দ্ৰ মোদী (Narendra Modi) । শনিবাৰে পুৱা ডিব্ৰুগড়ৰ চাবুৱাৰ বায়ুসেনা ছাউনিত উপস্থিত হয় প্ৰধানমন্ত্ৰী। তাৰ পৰা তেওঁ C-130J aircraft ত উঠি মৰাণৰ ৩৭ নং ৰাষ্ট্ৰীয় ঘাইপথৰ এটা অংশত অৱতৰণ কৰি নৱনির্মিত বায়ুসেনাৰ জৰুৰীকালীন অৱতৰণ সুবিধা ELF (Emergency Landing Facility) উদ্বোধন কৰে।
উল্লেখযোগ্য যে মৰাণ ৰাষ্ট্ৰীয় ঘাইপথত ৪.২ কিলোমিটাৰ দৈৰ্ঘ্যৰ এই ইমাৰজেন্সী লেণ্ডিং ফিল্ডে বায়ুসেনাৰ যুঁজাৰু বিমান আৰু পৰিবহণ বিমানৰ বাবে কৌশলগত আৰু বহুমুখী ৰানৱে হিচাপে কাম কৰিব বুলি বায়ুসেনাৰ সূত্ৰত প্ৰকাশ।
এই কাৰ্যসূচীত প্ৰধানমন্ত্ৰী মোদীৰ সৈতে উপস্থিত থাকে মুখ্যমন্ত্ৰী ডঃ হিমন্ত বিশ্ব শৰ্মা, কেন্দ্ৰীয় মন্ত্ৰী সৰ্বানন্দ সোণোৱাল আৰু বায়ুসেনাৰ চীফ মাৰ্শ্বাল এ পি সিং। আনহাতে, প্ৰধানমন্ত্ৰী মোদীক এখন গামোচা, এটি ফুলাম জাপি আৰু চুতীয়া ৰাজ্যৰ অন্তিমগৰাকী ৰাণী সতী সাধনীৰ এখনি প্ৰতিচ্ছবিৰে আদৰণি জনায় মুখ্যমন্ত্ৰীয়ে। এই কাৰ্যসূচী সম্পন্ন কৰি মৰাণ ELF ৰ পৰাই গুৱাহাটীলৈ ৰাওনা হয় প্ৰধানমন্ত্ৰী।
গুৱাহাটীত উপস্থিত হৈ প্ৰধানমন্ত্ৰীয়ে আনুষ্ঠানিভাৱে উদ্বোধন কৰে গুৱাহাটী-উত্তৰ গুৱাহাটী সংযোগী কুমাৰ ভাস্কৰ বৰ্মা সেতু। অত্যাধুনিক প্ৰযুক্তিৰে নিৰ্মাণ কৰা এই দলংখন মুকলি কৰি প্ৰধানমন্ত্ৰীয়ে কিছু দূৰ খোজকাঢ়ি যায়।
ইয়াৰ পিছত তেওঁ লাচিত ঘাটত উপস্থিত হৈ ৰাইজক সম্বোধন কৰাৰ লগতে তাৰ পৰায়ে ভাৰ্চুৱেল মাধ্যমেৰে বঙৰাত নিৰ্মাণ কৰা আই আই এম গুৱাহাটীৰ অস্থায়ী চৌহদ মুকলি কৰে। উল্লেখযোগ্য যে আই আই এম গুৱাহাটী স্থায়ীভাৱে নিৰ্মাণ হ’ব পলাশবাৰীত। ইয়াৰ উপৰি প্ৰধানমন্ত্রীয়ে আমিনগাঁৱত এন আই চিয়ে নিৰ্মাণ কৰা ডাটা চেণ্টাৰো আনুষ্ঠানিকভাৱে মুকলি কৰে।
লগতে কেন্দ্ৰীয় চৰকাৰে গুৱাহাটীৰ বাবে প্ৰদান কৰা ১০০ খন ইলেক্ট্ৰ’নিক বাছ আনুষ্ঠানিকভাৱে উদ্বোধন কৰে। আনহাতে, লাচিত ঘাটত এই অনুষ্ঠান সামৰি প্ৰধানমন্ত্রী খানাপাৰালৈ ৰাওনা হয়। খানাপাৰাত তেওঁ বিজেপিৰ ‘বুথ বিজয় সন্মিলন’ত অংশগ্ৰহণ কৰি নতুন দিল্লী অভিমুখে ৰাওনা হ’ব।
