পহেলগাম সন্ত্ৰাসবাদী আক্ৰমণৰ প্ৰতিক্ৰিয়া স্বৰূপে ভাৰতীয় বায়ুসেনাৰ ৰাফেল যুদ্ধ বিমানে (Indian Air Force) যোৱা বছৰ ৭ মে’ৰ নিশা পাকিস্তানৰ তিনিটা সন্ত্ৰাসবাদী আত্মগোপন কৰা স্থানত আক্ৰমণ কৰে। ২৫ মিনিটৰ ‘অপাৰেচন সিন্দুৰ’ৰ মূল অস্ত্ৰ আছিল ক্ৰুজ মিছাইল স্কেল্প আৰু প্ৰিচিচন গাইডেড বোমা হামাৰ।
প্ৰতিৰক্ষা মন্ত্ৰী ৰাজনাথ সিঙৰ নেতৃত্বত ‘ডিফেন্স একুইজিচন কাউন্সিল’-এ ভাৰতীয় বায়ুসেনাৰ দীৰ্ঘ দূৰত্বৰ আক্ৰমণৰ ক্ষমতা বৃদ্ধিৰ বাবে ফ্ৰান্সৰ পৰা আৰু ১৫০টা স্কেল্প মিছাইল ক্ৰয় কৰাৰ সিদ্ধান্ত গ্ৰহণ কৰিছে ।
ইউৰোপীয় বিশ্বত ‘ষ্টৰ্ম শ্বেড’ নামেৰে পৰিচিত এই স্কেল্প মিছাইল। এই দীৰ্ঘ দূৰত্বৰ ‘আকাশৰ পৰা ভূমিলৈ’ ক্ৰুজ মিছাইলটো এনেদৰে ডিজাইন কৰা হৈছে যে ই ‘নিখুঁত’ আক্ৰমণ কৰিব পাৰে।
ৰাডাৰৰ চোৰাংচোৱাগিৰি এৰাই চলি গোপনে আক্ৰমণ কৰাৰ ক্ষমতাৰ বাবেও স্কেল্প পৰিচিত। ৫০০ কিলোমিটাৰ দূৰত্বৰ টাৰ্বোজেট ইঞ্জিনযুক্ত এই মিছাইলত তিনি ধৰণৰ নেভিগেচন চিষ্টেম আছে, যিয়ে লক্ষ্য সঠিকভাৱে চিনাক্ত কৰি সঠিকভাৱে আঘাত কৰিব পাৰে।
বিশ্বৰ বিভিন্ন দেশৰ প্ৰতিৰক্ষা বাহিনীয়ে মূলতঃ এই কাৰণেই স্কেল্প ব্যৱহাৰ কৰে। তদুপৰি, এই ক্ষেপণাস্ত্ৰৰ এটা বৈশিষ্ট্য হ’ল ইয়াক দিনে-নিশাই আৰু সকলো ধৰণৰ বতৰত ব্যৱহাৰ কৰিব পৰা যায়। কেৱল সেয়াই নহয়, স্কেল্পৰ শক্তিশালী বাংকাৰ উৰুৱাই দিয়াৰ ক্ষমতাও আছে।
যোৱা বছৰ ইউক্ৰেইনৰ সেনাই প্ৰথমবাৰৰ বাবে এই ধৰণৰ অস্ত্ৰ ব্যৱহাৰ কৰি ৰাছিয়াৰ ভিতৰত আক্ৰমণ কৰিছিল। ইয়াৰ পিছত ভাৰতে এই ক্ষেপণাস্ত্ৰৰ সহায়ত ‘অপাৰেচন সিন্দুৰ’ত পাকিস্তানৰ এটা সন্ত্ৰাসবাদী ঘাটি বিস্ফোৰণ কৰে।
অত্যাধুনিক চেন্সৰেৰে সজ্জিত এই ক্ষেপণাস্ত্ৰই লক্ষ্যত উপনীত হোৱাৰ পিছত ইয়াৰ লগত সংলগ্ন ‘ইমেজিং ইনফ্ৰাৰেড ছিকাৰ’-এ নিজাববীয়াকৈ লক্ষ্য চিনাক্ত কৰিবলৈ সক্ষম হয়। যদি ছবিখন লক্ষ্যৰ সৈতে মিল খায়, তেন্তে ই কেৱল ইয়াক ধ্বংস কৰে। ফলত চাৰিওফালৰ অঞ্চলৰ ক্ষতি নকৰাকৈ শত্ৰুৰ ঘাটি ধ্বংস কৰা সম্ভৱ। কেৱল সেয়াই নহয়, শত্ৰুৰ বাবেও এই ক্ষেপণাস্ত্ৰ ধৰা পেলোৱাটোও অতি কঠিন।
কাৰণ, যুঁজাৰু বিমানৰ পৰা নিক্ষেপ কৰিলে স্কেল্প অতি নিম্ন স্তৰত উৰি যায়, যাৰ ফলত শত্ৰুৱে ইয়াক ৰাডাৰত ধৰা পেলোৱাটো প্ৰায় অসম্ভৱ হৈ পৰে। ডি এ চিৰ বৈঠকত সিদ্ধান্ত লোৱা হৈছে যে এই পৰ্যায়ত স্কেল্প ক্ৰয়ৰ বাবে ৩২০০ কোটি টকা ব্যয় কৰা হ’ব।
