মঙলবাৰে উচ্চতম ন্যায়ালয়ে (Suprem Court) ৱাটছএপ (WhatsApp) আৰু এই এপটোৰ মালিক মেটাক তেওঁলোকৰ ডাটা শ্বেয়াৰিং আৰু প্ৰাইভেচী পলিচিক লৈ কঠোৰ সতৰ্কবাণী জাৰি কৰে। শীর্ষ আদালতে স্পষ্ট কৰি দিছে যে ব্যৱহাৰকাৰীৰ তথ্য কোনো ধৰণে বাণিজ্যিক উদ্দেশ্যত ব্যৱহাৰ কৰিব নোৱাৰিব৷ মঙলবাৰে শুনানিৰ সময়ত মুখ্য ন্যায়াধীশ সূৰ্য কান্তে আমেৰিকাৰ কোম্পানীটোক কঠোৰভাৱে ধমক দি কয়, “আপোনালোকে আমাৰ নাগৰিকৰ গোপনীয়তাৰ সৈতে খেলিব নোৱাৰে। আমি আপোনালোকক এটা তথ্যও শ্বেয়াৰ কৰিবলৈ নিদিওঁ। যদি আপোনালোকে ভাৰতীয় আইন মানি নচলে, তেন্তে দেশ এৰিবলগীয়া হ’ব পাৰে।” এই শুনানিত ন্যায়াধীশসকলে একেলগে একাধিক আবেদনৰ শুনানি গ্ৰহণ কৰে। ইয়াৰ ভিতৰত আছিল ৱাটছএপ, মেটা আৰু চি চি আইৰ (কম্পিটিচন কমিছন অব ইণ্ডিয়া) দ্বাৰা দাখিল কৰা আবেদন।
জানিব পৰা মতে, ২০২৫ চনত ডাটা শ্বেয়াৰিং আৰু বজাৰত আধিপত্যৰ ক্ষেত্ৰত ৰাষ্ট্ৰীয় কোম্পানী আইন আপীল ন্যায়াধিকৰণৰ নিৰ্দেশক প্ৰত্যাহ্বান জনাই ৱাটছএপ আৰু মেটাই আবেদন দাখিল কৰিছিল। শুনানিৰ সময়ত জ্যেষ্ঠ অধিবক্তা মুকুল ৰোহতগী আৰু অন্যান্য অধিবক্তাই বিষয়টোৰ আইনী জটিলতাৰ ওপৰত আলোকপাত কৰে। আনহাতে, চি চি আয়ে কয় যে কোম্পানীসমূহে ব্যৱহাৰকাৰীৰ তথ্য ব্যৱহাৰ কৰি অন্যায়ভাৱে বজাৰত নিজৰ স্থান শক্তিশালী কৰি তুলিছে।
তথাকথিত ‘ইনফৰ্মড্ কনচেণ্ট’ৰ দাবীক লৈ মুখ্য ন্যায়াধীশগৰাকীয়ে প্ৰশ্ন উত্থাপন কৰি কয়, “এজন গাঁৱৰ সাধাৰণ মানুহে বা এজন ৰাজপথৰ ব্যৱসায়ীয়ে ইমান জটিল গোপনীয়তা নীতি কেনেকৈ বুজিব?”
তেওঁ আমেৰিকা যুক্তৰাষ্ট্ৰৰ কোম্পানী দুটাক লগতে কয়, “হয়তো আপুনি লিখিতভাৱে জনাই দিব লাগিব যে কোনো তথ্য শ্বেয়াৰ কৰা নহ’ব। নহ’লে সমগ্ৰ আবেদন নাকচ কৰা হ’ব।” ৱাটছএপে দাবী কৰে যে ইয়াৰ গোপনীয়তা নীতি আন্তঃৰাষ্ট্ৰীয় মানৰ। মেটাই লগতে কয় যে ডাটা শ্বেয়াৰিং কেৱল মূল কোম্পানীটোৰ মাজতে সীমাবদ্ধ। অৱশ্যে এই যুক্তিত আদালত সন্তুষ্ট নহ’ল। বিভাগীয় বিচাৰপীঠে স্পষ্ট কৰি দিয়ে যে ব্যৱহাৰকাৰীৰ আড্ডাৰ আৰ্হিৰ ওপৰত ভিত্তি কৰি বিজ্ঞাপন লক্ষ্য কৰি লোৱাটোৱে গোপনীয়তাৰ মৌলিক অধিকাৰ উলংঘা কৰে।
উদাহৰণ হিচাপে আদালতে চিকিৎসকৰ সৈতে চিকিৎসা সম্পৰ্কীয় ব্যক্তিগত কথা-বতৰাৰ পিছতহে প্ৰাসংগিক বিজ্ঞাপন দেখুওৱাৰ গোচৰটো উল্লেখ কৰে। এনে ঘটনাই তথ্য মুদ্ৰাকৰণক লৈ গুৰুতৰ প্ৰশ্ন উত্থাপন কৰে। অন্তৱৰ্তীকালীন আদেশ হিচাপে উচ্চতম ন্যায়ালয়ে কয় যে গোচৰৰ চূড়ান্ত নিষ্পত্তি নোহোৱালৈকে ৱাটছএপে মেটাৰ সৈতে কোনো ব্যৱহাৰকাৰীৰ তথ্য শ্বেয়াৰ কৰিব নোৱাৰিব। ছলিচিটৰ জেনেৰেল তুষাৰ মেহতা আৰু চি চি আইৰ অধিবক্তাই আদালতত কয় যে এনক্ৰিপচন সত্ত্বেও ব্যৱহাৰকাৰীৰ তথ্য ব্যৱসায়িকভাৱে ব্যৱহাৰ কৰা হৈছে। ডিজিটেল পাৰ্ছনেল ডাটা প্ৰটেকচন (ডি পি ডি পি) আইন কাৰ্যকৰী কৰি মেটাৰ তথ্য আৰু ব্যৱহাৰকাৰীৰ সন্মতি সুৰক্ষিত কৰাটো প্ৰয়োজনীয়। ভাৰতৰ গোপনীয়তাৰ আন্তঃগাঁথনি আৰু ইউৰোপীয় নিয়মৰ মাজত ডাঙৰ পাৰ্থক্য আছে বুলিও আদালতে কয়।
তথ্যৰ বাণিজ্যিক ব্যৱহাৰ কোনো কাৰণতে আওকাণ কৰিব নোৱাৰি বুলিও উল্লেখ কৰে। উল্লেখ্য যে গোচৰটো তিনিজনীয়া বিচাৰপীঠলৈ প্ৰেৰণ কৰা হৈছে। সকলো পক্ষকে তথ্যৰ গোপনীয়তা, আচৰণ বিশ্লেষণ আৰু ডি পি ডি পি আইন মানি চলাৰ ওপৰত বিশদ বিৱৰণ দাখিল কৰিবলৈ কোৱা হৈছে। ইলেক্’ট্ৰনিকছ আৰু তথ্- প্ৰযুক্তি মন্ত্ৰালয়ক মেটা ডাটা সুৰক্ষাৰ ক্ষেত্ৰত নিৰ্দেশনা দিবলৈ কোৱা হৈছে। এই গোচৰৰ পৰৱৰ্তী শুনানি হ’ব ৯ জানুৱাৰীত।
