জুবিন গাৰ্গ (Zubeen Garg)ৰ বিৰুদ্ধে সামাজিক মাধ্যমত বিতৰ্কি (Controversial on social media)ত মন্তব্য আগবঢ়োৱাৰ অভিযোগত গ্ৰেপ্তাৰ তথাকথিত নেত্ৰী শিখা শৰ্মাক। গৰিমা গাৰ্গৰ অভিযোগৰ ভিত্তিত গ্ৰেপ্তাৰ কৰা হয় সততে বিতৰ্কৰ সৈতে জড়িত হৈ অহা শিখা শৰ্মাক।
উল্লেখযোগ্য যে সোমবাৰে পুৱা ক্ৰাইম ব্ৰান্সত উপস্থিত হৈ জুবিন গাৰ্গৰ বিৰুদ্ধে সামাজিক মাধ্যমত বহু বিতৰ্কিত মন্তব্য কৰি থকা শিখা শৰ্মা (Sikha Sarma)ৰ বিৰুদ্ধে গৰিমা শইকীয়া গাৰ্গে এজাহাৰ দাখিল কৰিছিল। তেওঁৰ এজাহাৰ ভিত্তিত আৰক্ষীয়ে ভাৰতীয় ন্যায় সংহিতাৰ ১৫২/১৯৬/২৯৯/৩৫১/৩৫২/৩৫৩/৩৫৬ ধাৰাৰ অধীনত থানাত ২/২৬ নম্বৰত গোচৰ ৰুজু কৰি পাথৰকুঁৱেৰিস্থিত নীলাচল এপাৰ্টমেণ্টৰ বাসগৃহৰ পৰা অপৰাধ শাখাই শিখা শৰ্মাক গ্ৰেপ্তাৰ কৰে।
ইফালে শিখা শৰ্মাক গ্ৰেপ্তাৰৰ পিছতে গৰিমা গাৰ্গে অসম আৰক্ষীক ধন্যবাদ জনাই সামাজিক মাধ্যমত এটা পোষ্ট দি কয় যে শিখা শৰ্মাই জুবিন গাগৰ্ক জনমানসত হেয় কৰাৰ চেষ্টা চলাইছে।
আনহাতে, এজাহাৰ দাখিলৰ পিছত সংবাদ মাধ্যমৰ আগত গৰিমা শইকীয়া গাৰ্গে কয় যে এগৰাকী মানসিক ৰোগী বুলি ভাবি ইমানদিনে আওকাণ কৰা হৈছিল, কিন্তু সহ্যৰ এটা সীমা থাকে। এজন মানুহ আমাৰ মাজৰ পৰা গুচি গৈছে। তেওঁৰ সত্তাটো কি অসমৰ মানুহে জানে । অসমৰ লগতে এতিয়া সমগ্ৰ বিশ্বই জানে যে জুবিন গাৰ্গে অসমৰ সমাজ-সংস্কৃতিৰ বাবে কি কৰি থৈ গৈছে। সেইজন ব্যক্তিক কোনো অৱতাৰণা নোহোৱাকৈ অভদ্ৰ, অশালীন ভাষাৰে দিনে-ৰাতিয়ে কটু মন্তব্য কৰি চৰিত্ৰহনন, অশালীন ব্যৱহাৰ কোনোবাই কৰিব পাৰেনে। সেই কাম অসমৰ কোনো মানুহে নকৰে। এনে এগৰাকী মহিলা যিয়ে না অসম, অসমীয়াক, অসমীয়া মানসিকতাক বা অসমীয়া আৱেগক ভালপায়। তেওঁ কৈ থকা কথাবোৰ সঁচাকৈয়ে অসহ্য কৰ হৈ পৰাত আমি আইনী ব্যৱস্থা লোৱাৰ কথা ভাবিলো। এতিয়া আইনে ব্যৱস্থা ল’ব।
লগতে শিখা শৰ্মাক অসমৰ এগৰাকী শত্ৰু আখ্যা দি গৰিমা শইকীয়া গাৰ্গে কয় যে জুবিন গাৰ্গক শেষ কৰা মানুহক যদি তেওঁ সহযোগ কৰিছে তেন্তে তেওঁ কেনেকৈ এগৰাকী অসমীয়া হ’ব পাৰে।
