ASSAM TIMES POST
ছাইদুল ইছলামৰ বিশেষ প্ৰতিবেদন
৪৬ সংখ্যক কাৰবি যুৱ মহোৎসৱৰ তাৰালাংছৰ বাকৰিত এইবাৰ এক ব্যতিক্ৰমী কাৰ্যসূচী হিচাপে কাৰবি আংলং জিলাৰ ডিফু কাৰাগাৰত বন্দীত্ব জীৱন যাপন কৰা কয়দী সকলৰ হস্তনিৰ্মিত কেতবোৰ বাঁহ-বেতৰ সামগ্ৰী প্ৰদৰ্শন কৰা পৰিলক্ষিত হয় ৷
তাৰালাংচত বাতৰি সংগ্ৰহ কৰিবৰ বাবে ঘূৰা-ফুৰা কৰি থকা অৱস্থাত জিলা উদ্যোগ আৰু বাণিজ্য কেন্দ্ৰৰ স্থায়ী প্ৰদৰ্শনী গৃহত ডিফু জেলৰ কাৰাবন্দী সকলে নিজ হাতেৰে নিখুত, মসৃণ আৰু সুন্দৰভাবে সাজি উলিওৱা বাঁহ -বেতৰ সামগ্ৰী সমূহৰ ওপৰত দৃষ্টি গোছৰ হয় এই প্ৰতিবেদকৰ ৷
জানিব পৰা মতে অলপতে কাৰবি আংলং স্বায়ত্ত শাসিত পৰিষদৰ সহযোগত ডিফু কাৰাগাৰত জিলা আইন সেৱা প্ৰাধিকৰণে আয়োজন কৰা আৰু জিলা উদ্যোগ আৰু বাণিজ্য কেন্দ্ৰই প্ৰদান কৰা এক বিস্তৃত প্ৰশিক্ষণ কাৰ্যসূচীৰ জৰিয়তে কাৰাবন্দী সকলক হস্তশিল্পৰ দক্ষতামূলক প্ৰশিক্ষণ প্ৰদান কৰি কয়দী সকলৰ নিজ হাতেৰেই বিভিন্ন সামগ্ৰী সাজি উলিওৱাৰ কাম সম্পন্ন কৰা হয় ৷
জিলা আইন সেৱা প্ৰাধিকৰণৰ সম্পাদক এন আহমেদৰ পৰা এই বিষয়ে জানিব পাৰি আমি তাৰালাংচৰ মহোৎসৱথলীত উপস্থিতহৈ জিলা উদ্যোগ আৰু বাণিজ্য বিভাগৰ অতিৰিক্ত সঞ্চালক ৰাজেন লাংগাছুক সাক্ষাত কৰাত তেওঁ এই প্ৰতিবেদকৰ সৈতে হোৱা বাৰ্তালাপত কয়যে, ‘মেক ইন্ডিয়া’, আৰু অসম চৰকাৰ ‘বেম্ব মিছন’ৰ আঁত ধৰি জিলা উদ্যোগ আৰু বাণিজ্য বিভাগে পূব আৰু পশ্চিম কাৰবি আংলঙত বিভিন্ন আঁচনিৰ জৰিয়তে বেম্ব মিচনত গুৰুত্ব প্ৰদান কৰি আহিছে ৷
হস্ত শিল্পৰ বিভিন্ন প্ৰশিক্ষণৰ জৰিয়তে জিলা দুখনৰ বিভিন্ন নিবণুৱা যুৱক -যুৱতীক চাকৰি নিবিচাৰি চাকৰি দিয়াৰ অৰ্হতা অৰ্জন কৰাৰ লগতে বিত্তিমুখী হবলৈ উদ্বোদ্ধ কৰাই জিলা উদ্যোগ আৰু বাণিজ্য বিভাগৰ লক্ষ্য আৰু উদ্দেশ্য বুলি কয় ৷ ডিফু কাৰাগাৰতো কাৰাবন্দী সকলক হস্তশিল্পত উচিত প্ৰশিক্ষণৰ জৰিয়তে হস্তশিল্পৰ বিভিন্ন সামগ্ৰী নিৰ্মাণ কাৰ্যত দক্ষ আৰু নিপুণ কৰি তোলা হৈছে ৷
তাৰ ফলস্বৰূপে ৪৬ সংখ্যক কাৰবি যুৱ মহোৎসৱত কয়দী সকলে নিজ হাতে নিৰ্মাণ কৰা সামগ্ৰী সমূহ প্ৰদৰ্শন কৰিবলৈ সক্ষম হৈছে ৷
কাৰাবন্দী সকলে জেলৰ পৰা মুক্তি পোৱাৰ পিছত যাতে স্বাৱলম্বী হৈ সৎ আৰু স্বচ্ছ জীৱন যাপন কৰিব পাৰে এয়াই জিলা আইন সেৱা প্ৰাধিকৰণ, জিলা উদ্যোগ আৰু বাণিজ্য বিভাগ আৰু ডিফু জেল কৰ্তৃপক্ষৰ প্ৰয়াস বুলি জানিব পৰা গৈছে ৷
