বুধবাৰে প্ৰতিৰক্ষা মন্ত্ৰী ৰাজনাথ সিঙৰ নেতৃত্বত সংসদীয় পৰিক্ৰমা বিভাগৰ কেবিনেট কমিটীয়ে সংসদৰ আগন্তুক বাজেট অধিৱেশনৰ গুৰুত্বপূৰ্ণ তাৰিখসমূহত অনুমোদন জনায়।
সূত্ৰ অনুসৰি, বিত্তমন্ত্ৰী নিৰ্মলা সীতাৰমণে সংসদীয় কেলেণ্ডাৰ অনুসৰি অহা ১ ফেব্ৰুৱাৰী অৰ্থাৎ দেওবাৰে ২০২৬-২৭ বৰ্ষৰ কেন্দ্ৰীয় বাজেট দাখিল কৰিব। শেহতীয়া ইতিহাসত প্ৰথমবাৰৰ বাবে দেওবাৰে কেন্দ্ৰীয় বাজেট দাখিল কৰা হ’ব।
সূত্ৰই জনোৱা মতে, সংসদৰ যৌথ অধিৱেশনত ৰাষ্ট্ৰপতিৰ ভাষণেৰে ২৮ জানুৱাৰীৰ পৰা বাজেট অধিৱেশন আৰম্ভ হ’ব। ২৯ জানুৱাৰীত সংসদত দাখিল কৰা হ’ব অৰ্থনৈতিক জৰীপৰ প্ৰতিবেদন।
স্বাধীনতাৰ পিছত ২০২৬ চনৰ বাজেটখন ৮০ সংখ্যক বাজেট হ’বলৈ গৈ আছে। বিত্তমন্ত্ৰী নিৰ্মলা সীতাৰমণে একেৰাহে নৱমবাৰৰ বাবে কেন্দ্ৰীয় বাজেট দাখিল কৰিব। কেন্দ্ৰীয় বাজেট প্ৰতিবছৰে ১ ফেব্ৰুৱাৰীত দাখিল কৰা হয়, যাতে বিত্তীয় বৰ্ষৰ আৰম্ভণিৰে পৰা সংশোধনী আৰু ইয়াৰ কাৰ্যকৰীকৰণৰ বাবে পৰ্যাপ্ত সময় থাকে।
অৱশ্যে ছুটীৰ দিনত বাজেট দাখিল কৰাটো কোনো অভূতপূৰ্ব কথা নহয়। শনিবাৰে বিত্তমন্ত্ৰীগৰাকীয়ে ২০১৯ বৰ্ষৰ বাজেট দাখিল কৰিছিল। আনহাতে, প্ৰাক্তন বিত্তমন্ত্ৰী অৰুণ জেটলীয়ে ২০১৫ আৰু ২০১৬ বৰ্ষৰ ২৮ ফেব্ৰুৱাৰীত দাখিল কৰা দুয়োখন কেন্দ্ৰীয় বাজেট শনিবাৰে দাখিল কৰিছিল।
সীতাৰমণে একেৰাহে ৯ বাৰ কেন্দ্ৰীয় বাজেট দাখিল কৰা প্ৰথমগৰাকী বিত্তমন্ত্ৰী হৈ ইতিহাস ৰচনা কৰিব। প্ৰাক্তন প্ৰধানমন্ত্ৰী মোৰাৰজী দেশায়ে গঢ়া অভিলেখৰ ওচৰ চাপিব তেওঁ।
মোৰাৰজীয়ে দুটা ভিন্ন সময়ছোৱাত মুঠ ১০ খন বাজেট দাখিল কৰিছিল। ১৯৫৯ চনৰ পৰা ১৯৬৪ চনৰ ভিতৰত ছখন আৰু ১৯৬৭ চনৰ পৰা ১৯৬৯ চনৰ ভিতৰত চাৰিখন বাজেট দাখিল কৰিছিল । শেহতীয়া বিত্তমন্ত্ৰীসকলৰ ভিতৰত পি চিদাম্বৰমে ৯ খন বাজেট আৰু প্ৰণৱ মুখাৰ্জীয়ে বিভিন্ন প্ৰধানমন্ত্ৰীৰ অধীনত ৮ খন বাজেট দাখিল কৰে।
সাধাৰণতে দেওবাৰে সংসদৰ অধিৱেশন নহয়। ২০১৭ চনলৈকে ফেব্ৰুৱাৰী মাহৰ শেষৰ দিনটোত বাজেট দাখিল কৰা হৈছিল। পিছত মোদী চৰকাৰে এই প্ৰথা সলনি কৰে। ২০১৭ চনৰ পৰা ১ ফেব্ৰুৱাৰীত বাজেট দাখিল কৰা হয়। সেই প্ৰথা বজাই ৰখা হৈছে। ফলত ১ ফেব্ৰুৱাৰী দেওবাৰ হ’লেও সেইদিনা সংসদৰ অধিৱেশন হ’ব।
ইয়াৰ পূৰ্বে ২০১২ আৰু ২০২০ চনত দেওবাৰে সংসদৰ অধিৱেশন চলিছিল। ২০২০ চনত কৰ’না পৰিস্থিতিৰ বাবে জৰুৰীকালীন ভিত্তিত সংসদৰ অধিৱেশন হৈছিল। ইয়াৰ পূৰ্বে সংসদৰ প্ৰথম অধিৱেশনৰ ৬০ বছৰীয়া জয়ন্তী উপলক্ষে ১৩ মে’, দেওবাৰে সংসদৰ বিশেষ অধিৱেশন অনুষ্ঠিত হয়। ৬ বছৰৰ পাছত পুনৰ দেওবাৰে সংসদৰ অধিৱেশন অনুষ্ঠিত হ’বলৈ গৈ আছে।
২০১৭ চনৰ পৰা ১ ফেব্ৰুৱাৰীত কেন্দ্ৰীয় বাজেট দাখিল কৰা হৈছে, যাতে বিত্তীয় বৰ্ষৰ আৰম্ভণিৰ পৰা অৰ্থাৎ ১ এপ্ৰিলৰ পৰা বিত্ত বিধেয়কখন ক্ষিপ্ৰতাৰে গৃহীত কৰি কাৰ্যকৰী কৰাটো নিশ্চিত কৰিব পৰা যায়। ২০২০ আৰু ২০২৫ দুয়োটা বছৰতে সীতাৰমণে ১ ফেব্ৰুৱাৰীত বাজেট দাখিল কৰে, যিটো কাকতলীয়াভাৱে শনিবাৰ আছিল।
