নাবালক আৰু কিশোৰৰ এটা দলৰ যৌন কামনাৰ (Minor Rape Case) বলি হ’ল এগৰাকী ১৩ বছৰীয়া কিশোৰী। চাৰিজনে হঠাতে তেওঁৰ সৈতে বন্ধুত্ব পাতি লজলৈ লৈ যায়। তাত তেওঁক দলবদ্ধভাৱে ধৰ্ষণ কৰা হয়। ঘটনাৰ বিৱৰণী শুনি আৰক্ষীয়ো স্তম্ভিত হৈ পৰে।
সংবাদ মাধ্যমৰ সূত্ৰ অনুসৰি, এই ঘটনা সংঘটিত হৈছে তেলেংগানাত। আৰক্ষীয়ে জনোৱা মতে, ১৩ বছৰীয়া কিশোৰীগৰাকীক দলবদ্ধ ধৰ্ষণৰ অভিযোগ উত্থাপন হৈছে চাৰিজনৰ বিৰুদ্ধে। অভিযুক্ত দুজন নাবালক।
অভিযোগ অনুসৰি কিশোৰীগৰাকীক লজলৈ লৈ গৈ তেওঁলোকে যৌন নিৰ্যাতন চলায়। আৰক্ষীয়ে লগতে কয় যে এই ঘটনাটো ৮ ডিচেম্বৰত সংঘটিত হৈছিল। ছেকেন্দ্ৰাবাদত কিশোৰীগৰাকীক অকলে দেখা পাই অভিযুক্ত চাৰিজনে তেওঁৰ কাষ চাপে।
ইয়াৰ পিছতে লজলৈ লৈ গৈ চাৰিওজনে দলবদ্ধ ধৰ্ষণ কৰে। তেতিয়াৰ পৰাই সন্ধানহীন হৈ আছিল তেওঁ। ৫ ডিচেম্বৰত ভুক্তভোগীৰ পৰিয়ালে সাংগাৰেড্ডী জিলা আৰক্ষী থানাত নিৰুদ্দেশৰ এজাহাৰ দাখিল কৰে। ইয়াৰ পিছতে আৰক্ষীয়ে তালাচী অভিযান আৰম্ভ কৰে। ইফালে কিছুদিন পিছত ভুক্তভোগীয়ে আৰক্ষীক ফোন কৰি তেওঁৰ ঠিকনা দিয়ে।
আৰক্ষীয়ে লজত উপস্থিত হৈ কিশোৰীগৰাকীক উদ্ধাৰ কৰে। তেতিয়াই পোহৰলৈ আহে দলবদ্ধ ধৰ্ষণৰ ঘটনাটো। অভিযোগৰ ভিত্তিত আৰক্ষীয়ে দুজনক গ্ৰেপ্তাৰ কৰে। বাকী নাবালক দুজনক গ্ৰেপ্তাৰ কৰি পৰ্যবেক্ষণ গৃহলৈ প্ৰেৰণ কৰা হয়।
