গুজৰাটৰ ৰাজকোটত এগৰাকী ছয় বছৰীয়া কিশোৰীক ধৰ্ষণৰ প্ৰচেষ্টা। অভিযোগ অনুসৰি, ধৰ্ষণত ব্যৰ্থ হোৱাৰ বাবে অভিযুক্তই যৌনাংগত ৰড সুমুৱাই দিয়ে। চিকিৎসালয়ত জীৱন-মৃত্যুৰে বৰ্তমান যুঁজি আছে শিশুটিয়ে। আনহাতে, আৰক্ষীয়ে গ্ৰেপ্তাৰ কৰিছে অভিযুক্তক।
আৰক্ষীৰ সূত্ৰ অনুসৰি, যোৱা ৪ ডিচেম্বৰত ঘটনাটো সংঘটিত হৈছিল। নিৰ্যাতিতাৰ পিতৃ-মাতৃ কৃষক। সেইদিনাও তেওঁলোক কামলৈ গৈছিল। ৬ বছৰীয়া শিশুটিয়ে খেলপথাৰত খেলি আছিল। তাৰ পৰাই ৩৫ বছৰীয়া যুৱক এজনে তেওঁক ডাঙি নিৰ্জন ঠাইলৈ লৈ যায়। তাতে তেওঁক ধৰ্ষণৰ চেষ্টা কৰে।
ইফালে শিশুটিয়ে সমস্ত শক্তিৰে পলাবলৈ চেষ্টা কৰে। অভিযুক্তৰ পৰা মুক্ত হ’বলৈ তেওঁ চিঞৰে। সেই সময়ত আশে-পাশে থকা মানুহ আহিব বুলি আশংকা কৰি অভিযুক্তই শিশুটিক ধৰ্ষণ নকৰে যদিও খঙত তেওঁ শিশুটিৰ যৌনাংগত লোহাৰ ৰড এডাল সুমুৱাই দি পলাই যায়। ইফালে তেজেৰে লুতুৰি-পুতুৰি হৈ তীব্ৰ বিষত শিশুটিয়ে কান্দিবলৈ ধৰে।
কান্দোনৰ শব্দ শুনি স্থানীয় একাংশ লোকে গৈ তেওঁক উদ্ধাৰ কৰে। লগতে পিতৃ-মাতৃকো খবৰ দিয়েল। সংকটজনক অৱস্থাত তেওঁক ৰাজকোটৰ এখন চিকিৎসালয়ত ভৰ্তি কৰোৱা হয়। গুজৰাট আৰক্ষীয়ে অভিযুক্তক গ্ৰেপ্তাৰ কৰিবলৈ ১০টা দল গঠন কৰে।
প্ৰায় ১০০ জন লোকক সোধা-পোছা কৰাৰ অন্তত ৯-১০ জন সন্দেহযুক্ত লোকক গ্ৰেপ্তাৰ কৰা হয়। ইয়াৰ পিছতে আৰক্ষীয়ে মূল অভিযুক্তক উদ্ধাৰ কৰে। ধৃত ব্যক্তিজন পেছাত ঠিকাভিত্তিক শ্ৰমিক। অৱশ্যে তেওঁ গুজৰাটৰ বাসিন্দা নে আন ৰাজ্যৰ তদন্ত অব্যাহত ৰাখিছে আৰক্ষীয়ে। গুজৰাট আৰক্ষীয়ে জনোৱা মতে, কিশোৰীগৰাকী আৰু তেওঁৰ পৰিয়াল মধ্যপ্ৰদেশৰ বাসিন্দা।
জীৱিকাৰ সন্ধানত গুজৰাটলৈ আহিছিল পৰিয়ালটো। এতিয়ালৈকে তদন্তকাৰীৰ মতে মাত্ৰ এজন ব্যক্তিয়েহে এই ঘটনা সংঘটিত কৰিছে। ইতিমধ্যে তেওঁক গ্ৰেপ্তাৰ কৰি আদালতত হাজিৰ কৰা হৈছে।
