বিগত চাৰিদিন ধৰি সমগ্ৰ দেশত ইণ্ডিগ’ৰ বিমান (Indigo Flight) সেৱা ব্যাহত হৈ আছে। বাতিল কৰা হৈছে শ শ বিমান সেৱা। বিমানবন্দৰত আবদ্ধ হৈ আছে হাজাৰ হাজাৰ লোক। কৰ্তৃপক্ষৰ তৰফৰ পৰা বাৰে বাৰে ক্ষমা বিচৰাৰ পিছতো দুখ কমা নাই যাত্ৰীৰ। খবৰ অনুসৰি, শনিবাৰেও ১০০০ ইণ্ডিগ’ৰ বিমান বাতিল কৰা হয়।
সেৱাসমূহ স্বাভাৱিক অৱস্থালৈ ঘূৰি আহিবলৈ আৰু কেইদিনমান লাগিব। এনে পৰিস্থিতিত বাতিল হোৱা বিমানৰ টিকটৰ ধন ঘূৰাই কেনেকৈ পাব তাক লৈ বহুতে চিন্তিত হৈ পৰিছে। ইণ্ডিগ’ৱে জনাইছে যে যাত্ৰীসকলক কেৱল বাতিল কৰাই নহয়, পুনৰ নিৰ্ধাৰিত বিমানৰ বাবেও সম্পূৰ্ণ ধন ঘূৰাই দিয়া হ’ব। কেইটামান সহজ পদক্ষেপ অনুসৰণ কৰি আপুনি দ্ৰুততাৰে ধন ঘূৰাই পাব পাৰে।
প্ৰথমে ইণ্ডিগ’ৰ ৱেবছাইটত গৈ ‘ৰিফাণ্ড’ (https://www.goindigo.in/refund.html)ত ক্লিক কৰিব লাগিব। টিকটৰ সবিশেষ (পি এন আৰ বা বুকিং নম্বৰ, ই-মেইল আইডি) দিব লাগিব। ইয়াৰ পিছত ‘Flight cancellation or booking’ ত ক্লিক কৰি ৰিফাণ্ডৰ পৰিমাণ চাব।
আপুনি যিটো পদ্ধতিৰ জৰিয়তে টকাখিনি ঘূৰাই পাব বিচাৰে সেইটো বাছি ল’ব লাগিব। ইয়াৰ পিছত ‘Proceed’-ত ক্লিক কৰি ‘Refund’ নিশ্চিত কৰক। স্ক্ৰীণত দেখা যাব, ‘আপোনাৰ বুকিং বাতিল কৰা হৈছে’।
অন্তৰ্দেশীয় বিমানৰ ক্ষেত্ৰত যদি আপুনি নগদ ধন ঘূৰাই পাব বিচাৰে তেন্তে বিমানবন্দৰৰ নিৰ্দিষ্ট কাউণ্টাৰৰ পৰা লাভ কৰিব পাৰিব। কিন্তু যদিহে এই ধন আন্তঃৰাষ্ট্ৰীয় কাউণ্টাৰত দিয়া হৈছিল তেন্তে ইণ্ডিগ’ক ইমেইল কৰি ধন ঘূৰাই লʼব লাগিব
যদিহে ইণ্ডিগ’ৰ বিমানৰ টিকট কোনো ট্ৰেভেল এজেন্সীৰ জৰিয়তে ক্ৰয় কৰা হৈছে, তেন্তে সেই এজেন্সীৰ একাউণ্টলৈ ধন ঘূৰাই দিয়া হ’ব। সেই ক্ষেত্ৰত ইণ্ডিগ’ কৰ্তৃপক্ষই এজেন্সীটোৰ সৈতে যোগাযোগ কৰি ধন লাভ কৰিবলৈ পৰামৰ্শ দিছে।
বিমান সেৱা আৰু যাত্ৰীৰ সংখ্যাৰ ক্ষেত্ৰত ইণ্ডিগ’ দেশৰ সৰ্ববৃহৎ বিমান সংস্থা। কোম্পানীটোৰ সেৱাত ব্যাঘাত জন্মাত লাখ লাখ যাত্ৰী আবদ্ধ হৈ পৰে।
ইণ্ডিগ’ৱে শুকুৰবাৰে গোটেই দিনটোত ১০০০ৰো অধিক বিমান আৰু বৃহস্পতিবাৰে মুঠ ৫৫০খন বিমান বাতিল কৰে। শনিবাৰেও এশৰো অধিক বিমান বাতিল কৰিবলগীয়া হৈছে। যাত্ৰীসকলে অভিযোগ কৰে যে তেওঁলোকে উপযুক্ত খাদ্য আৰু বাসস্থান নোহোৱাকৈ ঘণ্টাৰ পিছত ঘণ্টা বিমানবন্দৰত অপেক্ষা কৰি আছিল।
কিন্তু নিজৰ নিৰ্দিষ্ট গন্তব্যস্থানলৈ যোৱা বিমানসমূহ কিমান সময়ত যাত্ৰা কৰিব সেয়া স্পষ্ট হোৱা নাই। উচ্চতম ন্যায়ালয়েও বিষয়টোৰ দৃষ্টি আকৰ্ষণ কৰিছে। ইতিমধ্যে দেশৰ বিমান নিয়ন্ত্ৰক ডি জি চি এয়ে এই ব্যাঘাতৰ কাৰণ জানিবলৈ উচ্চ পৰ্যায়ৰ তদন্তৰ নিৰ্দেশ দিছে।
