নিজৰ সন্তানে অসৎ আচৰণ বা হাৰাশাস্তি কৰিলে জ্যেষ্ঠজনে ঘৰৰ পৰা বাহিৰ কৰি দিব পাৰে। এই পৰ্যবেক্ষণ দিল্লী উচ্চ ন্যায়ালয়ৰ (Delhi Hight Court)। লগতে অভিভাৱকে এই হাৰাশাস্তিৰ কোনো প্ৰমাণ দিব নালাগে বুলিও উল্লেখ কৰে।
উচ্চ ন্যায়ালয়ে অভিভাৱকত্ব আৰু জ্যেষ্ঠ নাগৰিক আইন, ২০০৭ৰ অধীনত এই পৰ্যবেক্ষণৰ কথা প্ৰকাশ কৰিছে।
দিল্লীৰ ৰাজা গাৰ্ডেন অঞ্চলৰ বাসিন্দা পিয়াৰে দাখিল কৰা গোচৰত এই পৰ্যবেক্ষণ কৰিছে দিল্লী উচ্চ ন্যায়ালয়ে। ২০১৪ চনত পিয়াৰে দিল্লীৰ নতুন ৰঞ্জিত নগৰত থকা ঘৰৰ তৃতীয় মহলাত কন্যা, জোঁৱায়েক আৰু নাতি-নাতিনীক থাকিবলৈ অনুমতি দিছিল।
পিয়াৰে অভিযোগ কৰে যে তেওঁৰ কন্যাই ক্ৰমান্বয়ে তেওঁ আৰু তেওঁৰ পত্নীৰ লগত অসৎ আচৰণ কৰিবলৈ আৰম্ভ কৰে। পিয়াৰে ২০২২ চনত জ্যেষ্ঠ নাগৰিক আইন ২০০৭ৰ অধীনত কন্যা আৰু পৰিয়ালৰ বিৰুদ্ধে এজাহাৰ দাখিল কৰিছিল। জিলা দণ্ডাধীশে অভিযুক্ত কন্যাক পিতৃৰ ঘৰৰ পৰা ওলাই যাবলৈ নিৰ্দেশ দিয়ে।
বিচাৰৰ সময়ত কন্যাক পিতৃয়ে ‘তেজ্য কন্যা’ বুলি অভিহিত কৰিছিল। জিলা দণ্ডাধীশৰ নিৰ্দেশৰ বিৰুদ্ধে কন্যাই বিভিন্ন আদালতত আবেদন জনায়। অৱশেষত দিল্লী উচ্চ ন্যায়ালয়ত আবেদন জনায়। তাত উচ্চ ন্যায়ালয়ে কয় যে সন্তানে বেয়া আচৰণ কৰিলে পিতৃ-মাতৃয়ে ঘৰৰ পৰা উলিয়াই দিব পাৰে।
এই নিৰ্দেশ কাৰ্যকৰী হৈছেনে নাই চাবলৈ দিল্লীৰ উপ-আয়ুক্তক কোৱা হয়। এগৰাকী অধিবক্তাই কয় যে উচ্চ ন্যায়ালয়ৰ এই নিৰ্দেশত স্পষ্ট হৈ পৰিছে যে পিতৃ-মাতৃৰ ঘৰত বসবাস কৰা সন্তানৰ স্থায়ী অধিকাৰ থাকিব নোৱাৰে। ২০০৭ চনৰ আইনখনে বয়োজ্যেষ্ঠসকলে নিজৰ ঘৰতে মৰ্যাদাৰে থাকিব পৰাতো সুনিশ্চিত কৰিছে।
