ব্ৰহ্মছ এৰোস্পেচৰ প্ৰাক্তন বিজ্ঞানী নিশান্ত আগৰৱালৰ বিৰুদ্ধে চোৰাংচোৱাগিৰিৰ অভিযোগত প্ৰায় সাত বছৰ পূৰ্বে তেওঁক গ্ৰেপ্তাৰ কৰা হৈছিল। অভিযোগ আছিল যে তেওঁ পাকিস্তানলৈ স্পৰ্শকাতৰ তথ্য সৰবৰাহ কৰিছিল।
নাগপুৰৰ আদালতে তেওঁক যাৱজ্জীৱন কাৰাদণ্ডৰ শাস্তি প্ৰদান কৰে। ইমান বছৰ ধৰি কাৰাবন্দী হৈ থকাৰ পিছত অৱশেষত বম্বে উচ্চ ন্যায়ালয়ৰ নিৰ্দেশত কাৰাগাৰৰ পৰা মুক্তি পাবলৈ ওলাইছে বিজ্ঞানীগৰাকী।
২০১৮ চনৰ অক্টোবৰ মাহত নিশান্তক গ্ৰেপ্তাৰ কৰা হৈছিল। বিগত বছৰ নাগপুৰৰ আদালতে তেওঁক দোষী সাব্যস্ত কৰিছিল। পাকিস্তানী চোৰাংচোৱাক মিছাইল সম্পৰ্কীয় স্পৰ্শকাতৰ তথ্য সৰবৰাহ কৰাৰ অভিযোগত তেওঁক যাৱজ্জীৱন কাৰাদণ্ডৰ শাস্তি প্ৰদান কৰা হয়।
পিছত নিশান্তে এই ৰায়ক প্ৰত্যাহ্বান জনাই উচ্চ ন্যায়ালয়ৰ কাষ চাপিছিল। সোমবাৰে বম্বে উচ্চ ন্যায়ালয়ৰ নাগপুৰ বিচাৰপীঠে এই গোচৰত ৰায় দিয়ে। ব্ৰহ্মছ এৰোস্পেচৰ প্ৰাক্তন বিজ্ঞানীগৰাকীৰ বিৰুদ্ধে চোৰাংচোৱাগিৰিৰ অভিযোগ খাৰিজ কৰে ন্যায়াধীশ অনিল কিলোৰ আৰু ন্যায়াধীশ প্ৰবীণ পাটিলৰ বিভাগীয় বিচাৰপীঠে।
উচ্চ ন্যায়ালয়ে কয় যে নিশান্তে কেইবাটাও পদ্ধতিগত নিয়ম উলংঘা কৰিছে। কিন্তু ৰাষ্ট্ৰই প্ৰমাণ কৰিব নোৱাৰিলে যে তেওঁ প্ৰকৃততে কোনো স্পৰ্শকাতৰ তথ্য পাকিস্তানলৈ সৰবৰাহ কৰিছিল। সেইবাবেই তেওঁৰ বিৰুদ্ধে চোৰাংচোৱাগিৰিৰ অভিযোগ খাৰিজ কৰিলে আদালতে। কিন্তু চৰকাৰী গোপনীয়তা আইন (OSA) আৰু তথ্য-প্ৰযুক্তি আইনৰ নিৰ্দিষ্ট ধাৰাত তেওঁক দোষী সাব্যস্ত কৰা হয়। তেওঁ নিজৰ ব্যক্তিগত ডিভাইচত অনুমতি অবিহনে গোপন নথি-পত্ৰ ৰাখিছিল।
সেইবাবেই উচ্চ ন্যায়ালয়ে তেওঁক অ’ এছ এৰ নিৰ্দিষ্ট ধাৰাত দোষী সাব্যস্ত কৰে। উক্ত অভিযোগত আদালতে তেওঁক তিনি বছৰৰ কাৰাদণ্ড বিহে। ২০১৮ চনৰ অক্টোবৰৰ পৰা কাৰাগাৰত বন্দী হৈ থকা তেখেতৰ ছবছৰৰো অধিক সময় কাৰাগাৰত আছে। ফলত নিশান্তে ইতিমধ্যে শাস্তি পাৰ কৰিছে।
এই গোচৰত চৰকাৰে দাবী কৰিছিল যে নিশান্ত মধুচক্ৰত আবদ্ধ হৈছিল। পাকিস্তানী এজেণ্টে মহিলাৰ নামত ফেচবুকত ভুৱা প্ৰফাইল খুলি তেওঁক ফান্দত পেলায়। নিশান্তৰ লেপটপৰ পৰা ব্ৰহ্মছ সম্পৰ্কীয় স্পৰ্শকাতৰ তথ্য চুৰি কৰি মেলৱেৰৰ জৰিয়তে বিদেশী ছাৰ্ভাৰলৈ প্ৰেৰণ কৰা বুলি চৰকাৰে অভিযোগ উত্থাপন কৰে।
মহাৰাষ্ট্ৰ আৰক্ষীৰ এ টি এছে দাবী কৰিছে যে পাকিস্তানী এজেণ্টে ‘নেহা শৰ্মা’, ‘পূজা ৰঞ্জন’, ‘ছেজল কাপুৰ’ আদি বিভিন্ন নামেৰে ছ’চিয়েল মিডিয়াত ভুৱা একাউণ্ট খুলিছিল। তেনে এটা একাউণ্টৰ পৰা যোগাযোগ কৰি নিশান্তক ফান্দত পেলায়। অৱশ্যে উচ্চ ন্যায়ালয়ে কয় যে এই দাবীসমূহৰ সমৰ্থনত কোনো উপযুক্ত প্ৰমাণ আদালতত দাখিল কৰা হোৱা নাই।
