‘ডিজিটেল গ্ৰেপ্তাৰ’ (Digital Arrest) ৰ সৈতে জড়িত সকলো অভিযোগৰ তদন্ত চিবিআইক অৰ্পণ কৰিছে দেশৰ শীৰ্ষ আদালতে। সোমবাৰে উচ্চতম ন্যায়ালয়ৰ মুখ্য ন্যায়াধীশ সূৰ্য কান্তৰ বিচাৰপীঠে কয় যে দেশত ‘ডিজিটেল গ্ৰেপ্তাৰ’ৰ সৈতে জড়িত সকলো অভিযোগ চিবিআয়ে তদন্ত কৰিব।
সমগ্ৰ দেশতে ইয়াৰ সৈতে জড়িত সকলো অভিযোগৰ পৰিপ্ৰেক্ষিতত মুখ্য ন্যায়াধীশৰ বিচাৰপীঠে চিবিআইক এক ব্যাপক তদন্ত আৰম্ভ কৰিবলৈ কয়। এই সন্দৰ্ভত কেন্দ্ৰীয় তদন্তকাৰী সংস্থাক প্ৰয়োজনীয় সন্মতি দিবলৈও ৰাজ্য চৰকাৰসমূহক অনুৰোধ জনাইছে আদালতে।
অনলাইন প্ৰৱঞ্চনা ৰোধৰ বাবে ভাৰতীয় ৰিজাৰ্ভ বেংকক কেইবাটাও পৰামৰ্শ প্ৰদান কৰিছে আদালতে। মুখ্য ন্যায়াধীশ সূৰ্য কান্ত আৰু ন্যায়াধীশ জয়মাল্য বাগচিৰ বিচাৰপীঠে কৃত্ৰিম বুদ্ধিমত্তাৰ সহায় লৈ চাইবাৰ অপৰাধীৰ বেংক একাউণ্ট বিচাৰি উলিয়াই ফ্ৰীজ কৰাৰ প্ৰস্তাৱ আগবঢ়াইছে। আদালতে প্ৰশ্ন কৰিছে যে ৰিজাৰ্ভ বেংকে এতিয়াও কিয় এনে কামত এ আই ব্যৱহাৰ কৰা নাই। উচ্চতম ন্যায়ালয়ে ৰিজাৰ্ভ বেংকলৈ জাননী প্ৰেৰণ কৰি ইয়াৰ উত্তৰ বিচাৰিছে।
শেহতীয়াকৈ ‘ডিজিটেল গ্ৰেপ্তাৰ’ৰ ফান্দ পাতি দেশৰ বিভিন্ন প্ৰান্তত বহু লোকক প্ৰতাৰণা কৰা হৈছে। স্থানীয় আৰক্ষী, কেন্দ্ৰীয় তদন্তকাৰী সংস্থা, আনকি প্ৰধানমন্ত্ৰী নৰেন্দ্ৰ মোদীয়েও এই সন্দৰ্ভত দেশবাসীক সকীয়াই দিছে।
দেশবাসীক বুজাই দিয়া হৈছে যে দেশত এনেদৰে কাকো অনলাইনত গ্ৰেপ্তাৰ কৰাৰ কোনো ব্যৱস্থা নাই। ইয়াৰ পিছতো প্ৰৱঞ্চকৰ জালত পৰাটো বন্ধ হোৱা নাই। কিছু মাহ পূৰ্বে প্ৰৱঞ্চকে হাৰিয়ানাৰ আম্বালাৰ এজন বৃদ্ধক ভুৱা আদালতৰ আদেশ দেখুৱাই ‘ডিজিটেলি গ্ৰেপ্তাৰ’ কৰিছিল।
চাইবাৰ প্ৰৱঞ্চকসকলে তেওঁৰ পৰা ১.৫ কোটি টকা আদায় কৰিছিল। ঘটনাটো পোহৰলৈ অহাৰ লগে লগে উচ্চতম ন্যায়ালয়ে স্বতঃপ্ৰণোদিত পদক্ষেপ গ্ৰহণ কৰে। ইয়াৰ পূৰ্বে শুনানিৰ সময়ত আদালতে এই প্ৰৱঞ্চনাৰ ফান্দক লৈ উদ্বেগ প্ৰকাশ কৰে।
উচ্চতম ন্যায়ালয়ে ‘ডিজিটেল গ্ৰেপ্তাৰ’ সন্দৰ্ভত কোনখন ৰাজ্যত কিমান এফ আই আৰ দাখিল কৰা হৈছে সেই সন্দৰ্ভতো সকলো ৰাজ্য আৰু কেন্দ্ৰীয়শাসিত অঞ্চলৰ পৰা তথ্য বিচাৰে। উচ্চতম ন্যায়ালয়ে চিবিআইক এনেধৰণৰ জালিয়াতিৰ গোচৰৰ তদন্ত কেনেদৰে কৰিব সেই সন্দৰ্ভত এক নিৰ্দিষ্ট পৰিকল্পনা আদালতত দাখিল কৰিবলৈও কয়।
