বিগত পাঁচ বছৰত দেশত দুই লাখৰো অধিক ব্যক্তিগত খণ্ডৰ কোম্পানী বন্ধ হৈ পৰিছে। কেন্দ্ৰীয় চৰকাৰে সোমবাৰে সংসদত এই কথা অৱগত কৰে। প্ৰতিবছৰে কিমানটা ব্যক্তিগত খণ্ডৰ কোম্পানী বন্ধ হৈ গৈছে তাৰ পৰিসংখ্যাও সংসদত দাখিল কৰা হয়।
সোমবাৰৰ পৰা আৰম্ভ হোৱা সংসদৰ শীতকালীন অধিৱেশনত কেন্দ্ৰক সোধা হৈছিল যে বিগত পাঁচ বছৰত কিমানটা ব্যক্তিগত খণ্ডৰ সংস্থা বন্ধ হৈ গৈছে।
সেই সংস্থাসমূহ বন্ধ হোৱাৰ বাবে চাকৰি হেৰুওৱা লোকসকলক পুনৰ সংস্থাপনৰ বাবে কিবা পদক্ষেপ লৈছে নেকি বুলিও প্রশ্ন কৰা হয়৷ সোমবাৰে লোকসভাত কৰ্প’ৰেট পৰিক্ৰমা ৰাজ্যিক মন্ত্ৰী হৰ্ষ মালহোত্ৰাই উক্ত প্ৰশ্নৰ লিখিত উত্তৰ দিয়ে। তেওঁ কয় যে বিগত পাঁচ বছৰত দেশত ২,০৪,২৬৮টা ব্যক্তিগত খণ্ডৰ সংস্থা বন্ধ হৈ আছে। অৱশ্যে নিবনুৱাসকলৰ পুনৰ সংস্থাপনৰ বাবে চৰকাৰৰ হাতত কোনো প্ৰস্তাৱ নাই।
বিগত পাঁচ বছৰত প্ৰতিটো বিত্তীয় বৰ্ষত কিমান সংস্থা বন্ধ হৈ গৈছে তাৰ পৰিসংখ্যাও সংসদত দাখিল কৰে কেন্দ্ৰই। ইয়াৰ পৰা দেখা গৈছে যে যোৱা বিত্তীয় বৰ্ষত (২০২৪-২৫) ২০,৩৬৫ টা সংস্থা বন্ধ হৈছিল। সৰ্বাধিক সংখ্যক বন্ধ হৈছে কোভিড আৰু কোভিড পৰৱৰ্তী সময়ছোৱাত। ২০২১-২২ বিত্তীয় বৰ্ষত দেশত ৬৪,০৫৪ টা কোম্পানী বন্ধ হৈছিল।
ইয়াৰ পিছৰ বিত্তীয় বৰ্ষত ৮৩,৪৫২ টা কোম্পানী বন্ধ হৈ পৰে। বিগত পাঁচ বছৰৰ পৰিসংখ্যা মতে, এই সময়ছোৱাত তুলনামূলকভাৱে অধিক সংখ্যক কোম্পানী বন্ধ হৈছিল। কিন্তু কেন্দ্রৰ প্রত্যুত্তৰত এই সময়ছোৱাত ইমান বৃহৎ সংখ্যক ব্যক্তিগত কোম্পানী কিয় বন্ধ হৈ গ’ল সেই কথাৰ উত্তৰ নাই৷
কেন্দ্ৰীয় মন্ত্ৰীগৰাকীয়ে প্ৰদান কৰা তথ্য অনুসৰি, ২০২০-২১ চনত ১৫,২১৬টা আৰু ২০২৩-২৪ চনত ২১,১৮১টা কোম্পানী বন্ধ হৈছিল। অৰ্থাৎ চৰকাৰী পৰিসংখ্যাৰ পৰা স্পষ্ট যে বিগত পাঁচ বছৰত বিশেষকৈ কোভিড আৰু কোভিড পৰৱৰ্তী সময়ছোৱাত আৰু বহু কোম্পানী বন্ধ হৈ গৈছে।
মন্ত্ৰীগৰাকীয়ে কয় যে এই দুই লাখৰো অধিক কোম্পানীৰ ভিতৰত কিছুমান ক্ষেত্ৰত কোম্পানীটো আন এটা কোম্পানীত একত্ৰিত হৈছে, কোনোবা কোম্পানীক আন এটা নামলৈ ৰূপান্তৰিত কৰা হৈছে বা কোনো কোম্পানী সম্পূৰ্ণৰূপে নাইকিয়া হৈছে। কোম্পানী আইন, ২০১৩ৰ অধীনত তালিকাৰ পৰা আঁতৰাই দিয়া হৈছে।
সাধাৰণতে যদি কোনো কোম্পানীয়ে দীৰ্ঘদিন ধৰি কোনো ব্যৱসায়িক কাৰ্যকলাপ চলাই নাথাকে তেন্তে কোম্পানী আইন অনুসৰি ৰেকৰ্ডৰ পৰা আঁতৰাই পেলোৱা হয়। ইয়াৰ উপৰি এটা কোম্পানীয়ে প্ৰয়োজনীয় চৰ্ত পূৰণ কৰি নিজাববীয়াকৈ নাম আঁতৰোৱাৰ বাবেও আবেদন কৰিব পাৰে। আন এক লিখিত উত্তৰত মন্ত্ৰীগৰাকীয়ে কয় যে ২০২১-২২ বিত্তীয় বৰ্ষৰ পৰা চলিত বিত্তীয় বৰ্ষৰ ১৬ জুলাইলৈকে মুঠ ১,৮৫,৩৫০টা কোম্পানী বন্ধ হৈ আছে।
