স্বামী পেছাত চিকিৎসক। শহুৰেক এজন অধ্যাপক। উচ্চ শিক্ষিত পৰিয়ালটোত বিয়া দিবলৈ কইনাৰ পৰিয়ালে বহু কষ্ট কৰিবলগা হৈছিল। যৌতুকৰ (Dowry) বাবেও বহু টকা খৰচ হৈছিল। এইবাৰ অধিক যৌতুক দাবী কৰি কইনাক যৌন নিৰ্যাতন চলোৱাৰ অভিযোগ স্বামী আৰু শহুৰেকৰ বিৰুদ্ধে। শেহতীয়াকৈ কৰ্ণাটকৰ বেংগালুৰুত সংঘটিত হৈছে এই ঘটনা।
অভিযোগৰ ভিত্তিত আৰক্ষীয়ে তদন্ত আৰম্ভ কৰিছে। আৰক্ষীৰ সূত্ৰ অনুসৰি, ২০২৩ চনৰ নৱেম্বৰ মাহত ভুক্তভোগীয়ে বেংগালুৰুৰ বাসিন্দা গোৱৰ্ধন নামৰ চিকিৎসকজনৰ সৈতে অতি আড়ম্বৰেৰে বিবাহপাশত আবদ্ধ হয়।
কিন্তু অভিযোগ অনুসৰি, বিয়াৰ পিছত শহুৰেকে তেওঁৰ ওপৰত যৌতুক দাবী কৰি বিভিন্ন ধৰণে হেঁচা প্ৰয়োগ কৰিবলৈ আৰম্ভ কৰে। এফ আই আৰত মহিলাগৰাকীয়ে লিখিছে যে তেওঁৰ পিতৃ-মাতৃয়ে নিজৰ সামৰ্থ্যৰ বাহিৰলৈ গৈ বিয়াৰ বাবে দামী সোণ-ৰূপৰ গহনা আৰু যৌতুকৰ সকলো খৰচ বহন কৰিছিল।
এই বিয়াখনৰ বাবে পৰিয়ালটোৱে মুঠ ২৫ লাখ টকা ব্যয় কৰে। লগতে দৰাক সোণৰ হেণ্ডবেগ, ডিঙিৰ চেইন, আঙঠিকে ধৰি বিভিন্ন উপহাৰ দিয়া হয়। বিয়াৰ পিছত নৱদম্পতিয়ে বেংগালুৰুৰ পৰা প্ৰায় ২৫০ কিলোমিটাৰ নিলগৰ উচাংগীৰ ওচৰত ভাড়াঘৰত থাকিবলৈ আৰম্ভ কৰে। তাৰ পৰাই আৰম্ভ হয় অত্যাচাৰ।
দাবী অনুসৰি, বিয়াৰ ১৫ দিনৰ ভিতৰতে গোৱৰ্ধনে শহুৰেকৰ আধা সম্পত্তি দাবী কৰি পত্নীক হেঁচা প্ৰয়োগ কৰিবলৈ আৰম্ভ কৰে। কেৱল সেয়াই নহয়, পত্নীৰ পিতৃ-মাতৃয়েও মাহিলি ঘৰভাড়া দিব লাগে বুলিও দাবী জনায়। প্ৰতিদিনে গভীৰ নিশা স্বামীয়ে কামৰ পৰা উভতি অহাৰ অভিযোগ কইনাৰ।
তেওঁৰ লগত কথা নাপাতে। অভিযোগ অনুসৰি, কেৱল চৰকাৰী চিকিৎসালয়ত কাম কৰা স্বামীয়েই নহয়, শহুৰেক তথা অধ্যাপক নাগাৰাজুৱেও নিয়মীয়াকৈ প্ৰহাৰ কৰিবলৈ আৰম্ভ কৰিছিল। যৌতুকৰ দাবীত বোৱাৰীৰ ওপৰত যৌন নিৰ্যাতন কৰে আৰু এই সকলোবোৰ সংঘটিত হৈছিল যুৱতীগৰাকীৰ স্বামীৰ সন্মুখতে।
শহুৰেকে অশ্লীল মন্তব্য আৰু যৌন নিৰ্যাতন কৰাৰ অভিযোগ উত্থাপন কৰিছে বোৱাৰীয়েকে। যৌতুক দাবী কৰি হাৰাশাস্তিৰ গোচৰো দাখিল কৰিছে তেওঁ। ঘটনা সন্দৰ্ভত আৰক্ষীয়ে তদন্ত আৰম্ভ কৰিছে।
