মক্কাৰ পৰা মদিনালৈ যোৱাৰ পথত মুফ্ৰিহাটৰ সমীপত সংঘটিত বাছ দুৰ্ঘটনাত ৪৫ জন ভাৰতীয় উমৰাহ হজযাত্ৰীৰ মৃত্যু হয়। বাছখনত থকা মাত্ৰ এজন ব্যক্তিৰহে প্ৰাণৰক্ষা পৰে। কিন্তু কাকতালীয়ভাৱে এই ভয়ানক দুৰ্ঘটনাৰ পৰা আন ৮ জন ব্যক্তিৰ জীৱন ৰক্ষা পৰে। কিন্তু কেনেকৈ?
ভাৰতৰ পৰা ছৌদি আৰবলৈ হজৰ বাবে গৈ দুৰ্ঘটনাত পতিত হোৱা দলটোত মুঠ ৫৪ জন লোক আছিল। তাৰে ভিতৰত দুৰ্ঘটনাৰ দিনা ৪৬ জন লোক মদিনালৈ গৈছিল। অৱশ্যে এই দলটোত থকা আন আঠজন লোকে একেলগে মক্কালৈ যাত্ৰা কৰিছিল যদিও তেওঁলোকে দলটোৰ লগত একেলগে মদিনালৈ যোৱা নাছিল। ফলত এই লোককেইজন দুৰ্ঘটানত পতিত হোৱা লোককেইজনৰ সৈতে নাছিল। যাৰবাবে তেওঁলোক আঠজনেই অক্ষত অৱস্থাত থাকে।
৫৪ জনীয়া দলটো ৯ নৱেম্বৰত ভাৰতৰ পৰা জেদ্দালৈ একেলগে উৰা মাৰিছিল। তেওঁলোক একেলগে ঘূৰি অহাৰো কথা আছিল। ২৩ নৱেম্বৰত তেওঁলোক ভাৰতলৈ ঘূৰি অহাৰ কথা আছিল। মক্কা হৈ মদিনালৈ যোৱাৰ পৰিকল্পনা কৰিছিল। একেজন ট্ৰেভেল এজেণ্টৰ লগত কথা পাতি মদিনালৈ যাবলৈ বাছৰ ব্যৱস্থা কৰে। কিন্তু শেষ মুহূৰ্তত আঠজন লোকে নিজৰ পৰিকল্পনা সলনি কৰে।
হায়দৰাবাদ আৰক্ষী আয়ুক্ত ভি চি সজ্জানাৰে জনোৱা মতে, আঠজন লোকৰ ভিতৰত চাৰিজন লোকে সুকীয়া গাড়ীৰ ব্যৱস্থা কৰি দেওবাৰে মদিনালৈ যায়। বাকী চাৰিজনেও একে পৰিকল্পনা কৰে। অৱশ্যে তেওঁলোকে দেওবাৰে যাত্ৰা কৰা নাছিল, মক্কাতে আছিল। তেওঁ কয়, “আমি ৪৬ জন লোকৰ তালিকা লাভ কৰিছো। তেওঁলোকক চিনাক্ত কৰাৰ প্ৰক্ৰিয়া চলি আছে। সেই প্ৰক্ৰিয়া সম্পূৰ্ণ হ’লে বিষয়টোৰ সবিশেষ দিয়া সম্ভৱ হ’ব।”
উল্লেখ্য যে দেওবাৰে মাজনিশা (ভাৰতীয় সময় অনুসৰি) উমৰাহ হজযাত্ৰীসকলে মক্কাৰ পৰা মদিনালৈ বাছত যাত্ৰা কৰি আছিল। বাছখনত ৪৬ জন লোক আছিল। নিশা প্ৰায় ১.৩০ বজাত মুফ্ৰিহাটৰ সমীপত এখন ডিজেল টেংকাৰৰ সৈতে বাছখনৰ মুখামুখি সংঘৰ্ষ হয়। ইয়াৰ পিছতে বাছখনত অগ্নিকাণ্ড সংঘটিত হয়। ফলত ৪২ জন উমৰাহ হজযাত্ৰীৰ শুই থকা অৱস্থাতে অগ্নিদগ্ধ হৈ মৃত্যু হয়। আন চাৰিজনক উদ্ধাৰ কৰি চিকিৎসালয়লৈ লৈ যোৱা হয়। ইয়াৰে তিনিজনৰ মৃত্যু হোৱাৰ বিপৰীতে এজন জীয়াই আছে। অৱশ্যে তেওঁৰ অৱস্থা সংকটজনক।
২৪ বছৰীয়া মহম্মদ আব্দুল শ্বোয়েবে চালকৰ কাষৰ আসনত বহি আছিল।
উদ্ধাৰকাৰীয়ে জনোৱা মতে, বাছখন সম্পূৰ্ণৰূপে জ্বলি গৈছে। মৃতকক চিনাক্ত কৰিব পৰা হোৱা নাই। মাত্ৰ ৪৬ টা নামহে পোৱা গৈছে। অৱশ্যে তেওঁলোকৰ পৰিচয় এতিয়াও নিশ্চিত হোৱা নাই বুলি স্থানীয় সূত্ৰই প্ৰকাশ কৰিছে।
দুৰ্ঘটনা সংঘটিত হোৱাৰ সময়ত আটাইকেইজন যাত্ৰী শুই আছিল। ফলত সংঘৰ্ষৰ পিছতে বাছখনত অগ্নিকাণ্ড সংঘটিত হোৱাৰ সময়ত যাত্ৰীসকলে বাছৰ পৰা নামিবলৈ সুযোগ নাপালে। যাৰবাবে এই শোকাৱহ দুৰ্ঘটনাটো সংঘটিত হয়।
