আগন্তুক হজযাত্ৰাত (Hajj Pilgrims) আৰু কোনো বাধা-নিষেধ নাথাকিব। এইবাৰ ১৫০ খন দেশৰ ১৬ লাখ মুছলমানে হজলৈ যাব পাৰিব। তাৰ ভিতৰত ভাৰতীয়ও আছে। ছৌদি চৰকাৰে হজ তীৰ্থযাত্ৰাৰ ক্ষেত্ৰত জাৰি কৰা বাধা-নিষেধ উঠাই লৈছে।
এইবাৰ ভাৰতৰ পৰা ১.৭৫ লাখ মুছলমানে হজযাত্ৰাৰ বাবে নাম পঞ্জীয়ন কৰিছে। তাৰে ভিতৰত আটাইকেইজনে হজযাত্ৰা কৰিব পাৰিব বুলি খবৰ পোৱা গৈছে। কেন্দ্ৰই কয় যে ছৌদি চৰকাৰে এই নিষেধাজ্ঞা উঠাই লোৱাৰ পিছত তেওঁলোকে সকলো ধৰণৰ ব্যৱস্থা কৰি আছে। এইবাৰৰ হজযাত্ৰা ঐতিহাসিক হ’ব।
উল্লেখ্য যে ছৌদি আৰবে ভাৰতকে ধৰি ১৪ খন দেশৰ নাগৰিকৰ বাবে কিছুমান ভিছা প্ৰদান সাময়িকভাৱে বন্ধ কৰি দিছিল। ছৌদি কৰ্তৃপক্ষই কৈছিল যে জুন মাহৰ মাজভাগলৈকে উমৰাহ, ব্যৱসায়িক আৰু পৰিয়ালৰ ভিছা প্ৰদান নকৰে। অৰ্থাৎ হজ শেষ নোহোৱালৈকে ভিছা প্ৰদান বন্ধ থাকিব।
ভাৰতৰ বাহিৰেও ভিছাৰ বাবে যোগ্য নোহোৱা দেশৰ তালিকাত পাকিস্তান, বাংলাদেশ, ইজিপ্ত, ইণ্ডোনেছিয়া, ইৰাক, নাইজেৰিয়া, জৰ্ডান, আলজেৰিয়া, চুডান, ইথিওপিয়া, টিউনিছিয়া, য়েমেন আৰু মৰক্কোৰ নাগৰিক অন্তৰ্ভুক্ত আছিল।
ছৌদি আৰবে প্ৰতিবছৰে প্ৰতিখন দেশৰ বাবে নিৰ্দিষ্ট সংখ্যক তীৰ্থযাত্ৰী নিৰ্ধাৰণ কৰে। এই ব্যৱস্থাটো হৈছে ভিৰ নিয়ন্ত্ৰণৰ বাবে। কিন্তু একাংশ লোকে এই ব্যৱস্থা উলংঘা কৰি হজলৈ যায়। বিগত সময়ত বহু ক্ষেত্ৰত দেখা গৈছে যে চৰকাৰী অনুমোদন অবিহনে উমৰাহ বা ফেমিলি ভিছাত বিদেশীয়ে ছৌদি আৰবত প্ৰৱেশ কৰি হজ কৰে।
ইয়াৰ ফলত অতিমাত্ৰা ভিৰ হয়। ছৌদি আৰবৰ তীব্ৰ উত্তাপত অতিমাত্ৰা ভিৰ হোৱাৰ বাবে তীৰ্থযাত্ৰীৰ জীৱন বিপদত পৰে। ২০২৪ চনৰ হজৰ সময়ত এনে এটা ঘটনাত কমেও ১২০০ হজযাত্ৰী পদপিষ্ট হৈ মৃত্যু হৈছিল। এনে ঘটনা যাতে পুনৰ সংঘটিত নহয় তাৰ বাবে ছৌদি কৰ্তৃপক্ষই এই পদক্ষেপ গ্ৰহণ কৰিছিল। অৱশ্যে উমৰাহ ভিছা থকাসকলে ১৩ এপ্ৰিললৈকে ছৌদি আৰবত প্ৰৱেশ কৰিব পাৰিব।
ইয়াৰ বাহিৰেও ছৌদি আৰবৰ এই পদক্ষেপৰ আঁৰৰ আন এটা ডাঙৰ কাৰণ আছিল অবৈধ নিয়োগ ৰোধ কৰা। ছৌদি কৰ্তৃপক্ষৰ মতে, বিদেশী নাগৰিকে প্ৰায়ে ব্যৱসায়িক বা পৰিয়ালৰ ভিছাৰে ছৌদি আৰবত প্ৰৱেশ কৰে আৰু দেশখনত বিভিন্ন ধৰণৰ কামত নিয়োজিত হয়। ইয়াৰ ফলত ছৌদি শ্ৰম বজাৰত সমস্যাৰ সৃষ্টি হৈছে।
