বাংলাদেশৰ আন্তঃৰাষ্ট্ৰীয় ন্যায়াধিকৰণত ৰায় ঘোষণা কৰাৰ পূৰ্বে প্ৰাক্তন প্ৰধানমন্ত্ৰী শ্বেখ হাছিনাই (Sheikh Hasina) দেশবাসী আৰু আৱামী লীগৰ সমৰ্থকসকলক এক অডিঅ’ বাৰ্তা প্ৰদান কৰে। ৰায়দানৰ প্ৰতি কোনো পৰোৱা নকৰে বুলিও কয় তেওঁ।
কাৰণ হিচাপে কয়, “আল্লাহে জীৱন দিছে, আল্লাহেই ল’ব।” হাছিনাই ঘোষণা কৰে যে অনাগত দিনত তেওঁৰ দলে বাংলাদেশত অধিক শক্তিশালী হৈ ঘূৰি আহিব।
যোৱা বছৰৰ জুলাই মাহত বাংলাদেশত হাছিনাৰ চৰকাৰৰ বিৰুদ্ধে তীব্ৰ আন্দোলন চলিছিল। গণ আন্দোলনৰ হেঁচাত হাছিনাই পদত্যাগ কৰিবলগীয়া হৈছিল। দেশৰ পৰা পলায়ন কৰি ভাৰতলৈ আহে।
তেতিয়াৰ পৰাই তেওঁ ভাৰতত আছে। তেওঁ মাজে মাজে ইয়াৰ পৰাই অডিঅ’ মেছেজ দিয়ে। আৱামি লীগৰ ছ’চিয়েল মিডিয়া পেজত সেয়া প্ৰকাশ পায়। সোমবাৰে আন্তঃৰাষ্ট্ৰীয় ন্যায়াধিকৰণৰ ৰায়দানৰ কেইঘণ্টামান পূৰ্বে হাচিনাই এনে বাৰ্তা প্ৰদান কৰে। বৰ্তমানৰ অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছক সমালোচনা কৰে।
বাংলাদেশত জুলাই মাহৰ প্ৰতিবাদৰ সময়ত চৰকাৰ আৰু প্ৰতিবাদকাৰীৰ মাজত হোৱা সংঘৰ্ষত কমেও ১৫০০ লোকৰ মৃত্যু হয়। মানৱতাৰ বিৰুদ্ধে অপৰাধৰ অভিযোগত হাছিনাৰ বিৰুদ্ধে গোচৰ ৰুজু হৈছে।
তেওঁৰ দল আৱামী লীগৰ ৰাজনৈতিক কাৰ্যকলাপত নিষেধাজ্ঞা আৰোপ কৰা হৈছে। হাছিনাৰ বিৰুদ্ধে গোচৰৰ অন্যতম অভিযুক্ত বাংলাদেশৰ আৰক্ষী সঞ্চালক প্ৰধান আল-মামুন ৰাজসাক্ষী হৈ পৰিছে। চৰকাৰে একাধিক প্ৰমাণ দাখিল কৰি হাছিনাৰ মৃত্যুদণ্ড বিচাৰিছে।
আৱামি লীগৰ সমৰ্থকসকলে অনুমান কৰিছে যে আন্তঃৰাষ্ট্ৰীয় ন্যায়াধিকৰণে সোমবাৰে হাছিনাক দোষী সাব্যস্ত কৰিব। মৃত্যুদণ্ডও দিয়া হ’ব পাৰে। সমৰ্থকসকললৈ হাছিনাই দিয়া বাৰ্তা হৈছে, “মই জীয়াই আছো। মই জীয়াই থাকিম। মই পুনৰ ৰাইজৰ সুবিধাৰ্থে কাম কৰিম। মই বাংলাদেশৰ ভূমিৰ সৈতে ন্যায় কৰিম।”
তেওঁৰ পুত্ৰ ছাজিব ৱাজেদ জয়ো হাছিনাৰ মৃত্যুদণ্ডক লৈ চিন্তিত নহয়। আমেৰিকাৰ পৰা তেওঁ কয় যে তেওঁৰ মাতৃক মৃত্যুদণ্ডৰ শাস্তি দিয়া হ’ব পাৰে। কিন্তু ভাৰতত তেওঁ সুৰক্ষিত। ভাৰত চৰকাৰে তেওঁৰ নিৰাপত্তাৰ ব্যৱস্থা কৰিছে। অডিঅ’ বাৰ্তাটোত হাচিনাই ইউনুছৰ বিৰুদ্ধে গণহত্যাৰ অভিযোগ উত্থাপন কৰিছে।
তেওঁ কয়, “বাংলাদেশৰ সংবিধানত কোৱা হৈছে যে গণতান্ত্ৰিকভাৱে নিৰ্বাচিত প্ৰতিনিধিক পদৰ পৰা আঁতৰোৱাটো শাস্তিযোগ্য অপৰাধ। ইউনুছে তেনেকুৱাই কৰিছিল। তেওঁক শাস্তি দিয়া উচিত আছিল। তেৱেঁই হত্যাৰ নিৰ্দেশ দিছিল।” হাছিনাৰ ওপৰত উত্থাপিত মূল অভিযোগ এই যে তেওঁ প্ৰতিবাদকাৰীক গুলীচালনাৰ নিৰ্দেশ দিছিল।
এই অভিযোগ অস্বীকাৰ কৰিছে বাংলাদেশৰ প্ৰাক্তন প্ৰধানমন্ত্ৰীগৰাকীয়ে। তেওঁ দাবী কৰে যে তেওঁ প্ৰত্যক্ষভাৱে কাকো হত্যাৰ নিৰ্দেশ দিয়া নাছিল। অডিঅ’ মেছেজত হাছিনাই দাবী কৰে যে আৰক্ষীয়ে ৰবৰৰ গুলী নিক্ষেপ কৰিছিল, প্ৰাণনাশক নহয়। মৃতদেহবোৰৰ মৰণোত্তৰ পৰীক্ষাৰ প্ৰতিবেদন দেখাৰ পিছতহে বুজিব পাৰি যে কেনেকৈ হত্যা কৰা হ’ল।
সাক্ষীসকলৰ বক্তব্য কিয় ৰাজহুৱা কৰা নহ’ল সেয়াও প্ৰশ্ন উত্থাপন কৰে হাছিনাই। তেওঁ কয়, “ইউনুছে আৱামি লীগ ধ্বংস কৰিব বিচাৰে। কিন্তু ইমান সহজ নহয়। আৱামি লীগ তৃণমূল পৰ্যায়ৰ পৰাই ওলাই আহিছে। কোনো ক্ষমতা দখলকাৰীৰ পকেটৰ পৰা নহয়।” হাছিনাই তেওঁৰ বিৰুদ্ধে উত্থাপিত মানৱতাৰ বিৰুদ্ধে অপৰাধৰ অভিযোগ সন্দৰ্ভতো মাত মাতিছে।
তেওঁ কয়, “তেওঁলোকে কৈছে যে মই মানৱতাৰ বিৰুদ্ধে অপৰাধ কৰিছো। মই ১০ লাখ ৰোহিংগীয়াক আশ্ৰয় দিলোঁ। সেয়া মানৱতাৰ বিৰুদ্ধে অপৰাধ নেকি? সোমবাৰৰ ৰায় সন্দৰ্ভত হাছিনাই কয়, “তেওঁলোকে ৰায় ঘোষণা কৰক। মই একো পৰোৱা কৰা নাই। আল্লাহে মোক এই জীৱন দিছে। আল্লাহে ল’ব। মই জনসাধাৰণৰ বাবে কাম কৰি যাম।”
