পঞ্চভূতত বিলীন হ’ল আন্তঃৰাষ্ট্ৰীয় খ্যাতিসম্পন্ন বাঁহীবাদক দীপক শৰ্মাৰ (Dipak Sarma) নশ্বৰদেহ। মঙলবাৰে সম্পূৰ্ণ ৰাজ্যিক মৰ্যাদাৰে গুৱাহাটীৰ নৱগ্ৰহ শ্মশানত দীপক শৰ্মাৰ শেষকৃত্য সম্পন্ন হয়।
সোমবাৰে পুৱা ৬.১৫ বজাত চেন্নাইৰ এখন হাস্পতালত ৫৭ বছৰ বয়সত জীৱন নাট সামৰিছিল দীপক শৰ্মাই। যকৃতৰ জটিল ৰোগত আক্ৰান্ত হৈ তেওঁ চেন্নাইত চিকিৎসাধীন হৈ আছিল। মঙলবাৰে পুৱা চেন্নাইৰ পৰা অসম আহি পায় বাঁহীবাদকগৰাকীৰ নশ্বৰদেহ।
বৰঝাৰ বিমানবন্দৰৰ পৰা এখন পুষ্পসজ্জিত বাহনেৰে তেওঁৰ নশ্বৰদেহ গুৱাহাটীৰ অম্বিকাগিৰি নগৰস্থিত বাসগৃহলৈ অনা হয়। তাত বিভিন্ন ব্যক্তিয়ে শেষ শ্ৰদ্ধা জ্ঞাপন কৰাৰ লগতে পৰিয়ালৰ লোকে ধৰ্মীয় নীতি-নিয়ম অনুসৰি অন্তিম ৰীতি-নীতি পালন কৰে।
ইয়াৰ পিছত বহু ছাত্ৰ-ছাত্ৰীয়ে বাঁহী বজাই শেষ শ্ৰদ্ধাঞ্জলি জনোৱাৰ লগতে অম্বিকাগিৰি নগৰৰ সেউজ সংঘৰ বাকৰিত ৰাজহুৱা শ্ৰদ্ধাঞ্জলিৰ বাবে অনা হয়। তাৰ পৰা নৱগ্ৰহ শ্মশানলৈ আনি সম্পূৰ্ণ ৰাজ্যিক মৰ্যাদাৰে শেষকৃত্য সম্পন্ন কৰা হয়।
