একেৰাহে চাৰিদিন ধৰি একেই আছে দিল্লীৰ প্ৰদূষণৰ (Delhi Pollution) পৰিস্থিতি। কিন্তু পৰিস্থিতি আৰু অধিক ভয়াৱহ হ’ব পাৰে বুলি আশংকা কৰা হৈছে। মঙলবাৰে ৰাজধানীৰ বায়ুৰ গুণাগুণ সূচকাংক (এ কিউ আই) হৈছে ৩১১। সোমবাৰে এ কিউ আই আছিল ৩০৯।
বতৰ বিজ্ঞানীসকলে কয় যে ইয়াৰ ফলত বতাহৰ গতি কমি যাব। পশ্চিমীয়া বতাহৰ বাবে বুধবাৰৰ পৰা বতাহ শান্ত হ’ব। ফলত প্ৰদূষণৰ ছবিখন আৰু বেয়া হোৱাৰ সম্ভাৱনা আছে। কেন্দ্ৰীয় প্ৰদূষণ নিয়ন্ত্ৰণ ব’ৰ্ডৰ (চি পি চি বি) তথ্য অনুসৰি, বুৰাৰীত এ কিউ আই ৪০০, যিটো ‘গুৰুতৰ’ স্তৰত পৰে। ৱাজিৰপুৰৰ হৈছে ৩৯০। ইয়াৰ বাহিৰেও ৰাজধানীৰ ২৩টা প্ৰদূষণ নিৰীক্ষণ কেন্দ্ৰৰ এ কিউ আই ‘অতি বেয়া’।
এই পৰিস্থিতি বৃহস্পতিবাৰলৈকে অব্যাহত থাকিব বুলি চি পি চি বিৰ সূত্ৰই প্ৰকাশ কৰিছে। চি পি চি বিৰ সমীৰ এপৰ তথ্য অনুসৰি, মঙলবাৰে ৰাজধানী চহৰখনৰ কেইবাটাও স্থানত বায়ুৰ গুণাগুণ ‘গুৰুতৰ’ স্তৰত উপনীত হয়। ইয়াৰ ভিতৰত আলিপুৰ (৪২১), আনন্দ বিহাৰ (৪১২), বাৱানা (৪০২)।
বতৰ বিজ্ঞানী নৱদীপ দাহিয়াই কয় যে পশ্চিমীয়া বতাহৰ বাবে বায়ুৰ গুণাগুণ প্ৰভাৱিত হৈছে। ফলত ৫ নৱেম্বৰলৈকে ৰাজধানীখন ধোঁৱাৰ আৱৰণেৰে আবৃত হৈ থাকিব। পশ্চিমীয়া বতাহৰ বাবে পঞ্জাৱ আৰু হাৰিয়ানাৰ একাংশ ঠাইত মঙলবাৰে নিশা আৰু বুধবাৰে বৰষুণ পৰিব পাৰে। কিন্তু দিল্লী আৰু উত্তৰ প্ৰদেশত বৰষুণৰ সম্ভাৱনা নাই।
