দিল্লীৰ জৱাহৰলাল নেহৰু বিশ্ববিদ্যালয়ত (Delhi JNU) দুৰ্গা পূজাৰ প্ৰতিমা বিসৰ্জনক লৈ সৃষ্টি হৈছে উত্তেজনাপূৰ্ণ পৰিস্থিতি। অখিল ভাৰতীয় বিদ্যাৰ্থী পৰিষদ (এ বি ভি পি) আৰু বিশ্ববিদ্যালয়খনৰ বাওঁপন্থী ছাত্ৰ সংগঠনৰ মাজত সংঘৰ্ষৰ সৃষ্টি হয়।
শিলগুটি নিক্ষেপ, জোতা নিক্ষেপ কৰা হয়। অভিযোগ অনুসৰি, এ বি ভি পিয়ে জে এন ইউৰ প্ৰাক্তন ছাত্ৰ ওমৰ খালিদ আৰু শ্বাৰ্জিল ইমামক ৰাৱণৰ ৰূপত চিত্ৰিত কৰি দশেৰাৰ বাবে ‘ৰাৱণ-দাহন’ কাৰ্যসূচীৰ আয়োজন কৰিছিল।
বাওঁ সংগঠনসমূহে তাত আক্ৰমণ চলায়। তেওঁলোকে এ বি ভি পিয়ে ধৰ্মক ৰাজনৈতিক উদ্দেশ্যত ব্যৱহাৰ কৰাৰ অভিযোগ উত্থাপন কৰে। দুয়োপক্ষই নিশাৰ ঘটনাৰ ব্যাখ্যা দি বিবৃতি প্ৰকাশ কৰিছে। এই সংঘৰ্ষত বহু ছাত্ৰ-ছাত্ৰী আহত হোৱা বুলি দাবী কৰা হৈছে।
বৃহস্পতিবাৰে নিশা এ বি ভি পিয়ে জে এন ইউত দশেৰাৰ বাবে ‘ৰাৱণ-দাহন’ কাৰ্যসূচীৰ আয়োজন কৰে। এক বিবৃতিত সংঘ পৰিয়ালৰ ছাত্ৰ শাখাটোৱে দাবী কৰিছে যে সন্ধিয়া প্ৰায় ৭ বজাত সাবৰমতী টি-পইণ্টৰ সমীপত বিসৰ্জন সমদলত আইছা, এছ এফ আই, ডি এছ এফকে ধৰি বাওঁপন্থী ছাত্ৰ সংগঠনৰ সদস্যই আক্ৰমণ কৰে।
ইয়াৰ ফলত বহু ছাত্ৰ-ছাত্ৰী আহত হয়। এ বি ভি পিৰ জে এন ইউৰ সভাপতিয়ে কয়, “এয়া কেৱল কোনো ধৰ্মীয় অনুষ্ঠানৰ ওপৰত আক্ৰমণ নহয়, বিশ্ববিদ্যালয় উৎসৱৰ পৰম্পৰা আৰু ছাত্ৰ-ছাত্ৰীৰ আৱেগৰ ওপৰত আক্ৰমণ। এ বি ভি পিয়ে এই আগ্ৰাসনক কোনো ধৰণে সহ্য নকৰে।”
বিসৰ্জন সমদলৰ সময়ত মহিলাসকলক আক্ৰমণ কৰা বুলিও অভিযোগ উত্থাপন হৈছে। তেওঁলোকৰ ওপৰত শিলগুটি নিক্ষেপ কৰা হয়। বাওঁপন্থী ছাত্ৰ-ছাত্ৰীয়ে মূৰ্তিটোৰ সন্মুখত জোতা প্ৰদৰ্শন কৰা বুলিও দাবী কৰে এ বি ভি পিয়ে। জে এন ইউ ছাত্ৰ সন্থাৰ যুটীয়া সম্পাদক বৈভৱ মীনায়ো এই ঘটনাক গৰিহণা দিয়ে।
আনহাতে, বাওঁপন্থীসকলে দাবী কৰিছে যে এ বি ভি পিয়ে বিশ্ববিদ্যালয়খনত ইছলামোফ’বিয়া বিয়পাবলৈ চেষ্টা কৰিছে। আইছা (AISA), ডি এছ এফ (DSF), এছ এফ আই (SFI) আদি সংগঠনে ইয়াৰ বিৰুদ্ধে প্ৰতিবাদ কৰিছে।
আইছাই এক বিবৃতিত কয় যে এ বি ভি পিয়ে ওমৰ আৰু শ্বাৰ্জিলক ৰাৱণ হিচাপে দেখুৱাই ‘ৰাৱণ দাহন’ কৰিছে। তেওঁলোকৰ মতে, “এয়া ইছলামোফ’বিয়াৰ ঘৃণনীয় প্ৰদৰ্শন। ৰাজনৈতিক সুবিধা লাভৰ বাবে ধৰ্মীয় আৱেগক এইদৰে শোষণ কৰা হৈছে।” নাথুৰাম গডছে আৰু ৰাম ৰহিমক কিয় ৰাৱণ হিচাপে বাছনি কৰা নহ’ল, এই প্ৰশ্নও উত্থাপন কৰে আইছাই।
বিবৃতিটোত তেওঁলোকে কয় যে জে এন ইউয়ে ইছলামোফ’বিয়া আৰু ঘৃণাৰ ৰাজনীতি মানি নলয়। ইয়াৰ বিৰুদ্ধে বিশ্ববিদ্যালয়খনৰ সকলো ছাত্ৰ-ছাত্ৰীক একত্ৰিত হ’বলৈ আহ্বান জনাইছে।
অৱশ্যে এই সন্দৰ্ভত এতিয়াও কোনো মন্তব্য কৰা নাই বিশ্ববিদ্যালয় কৰ্তৃপক্ষই।
উল্লেখ্য যে ২০২০ চনত ‘কা’ (CAA) বিৰোধী আন্দোলন আৰু দিল্লী হিংসাৰ ষড়যন্ত্ৰৰ অভিযোগত ওমৰ আৰু শ্বাৰ্জিলক গ্ৰেপ্তাৰ কৰা হৈছিল।
উক্ত হিংসাত ৫৩ জন লোকৰ মৃত্যু হৈছিল। ওমৰ আৰু শ্বাৰ্জিলৰ বিৰুদ্ধে দিল্লী আৰক্ষীয়ে বেআইনী কাৰ্যকলাপ প্ৰতিৰোধ আইনৰ (ইউএপিএ) অধীনত গোচৰ ৰুজু কৰি বিগত পাঁচ বছৰ ধৰি কাৰাগাৰত বন্দী কৰি ৰাখিছে।
