নাগৰিকত্ব সংশোধনী আইনৰ (CAA) অধীনত নাগৰিকত্বৰ বাবে আবেদনৰ সময়সীমা আৰু ১০ বছৰ বৃদ্ধি কৰিছে কেন্দ্ৰই। সোমবাৰে নিশা কেন্দ্ৰীয় গৃহ মন্ত্ৰালয়ে এক অধিসূচনা জাৰি কৰি কয় যে ২০২৪ চনৰ ৩১ ডিচেম্বৰলৈকে পাকিস্তান, আফগানিস্তান আৰু বাংলাদেশৰ পৰা ধৰ্মীয় ভিত্তিত ভাৰতত প্ৰৱেশ কৰা হিন্দু, শিখ, বৌদ্ধ, জৈন, পাৰ্চী আৰু খ্ৰীষ্টানসকলে CAAৰ অধীনত নাগৰিকত্বৰ বাবে আবেদন কৰিব পাৰিব। ইয়াৰ পূৰ্বে এই সময়সীমা আছিল ২০১৪ চনৰ ৩১ ডিচেম্বৰলৈকে।
নৰেন্দ্ৰ মোদী চৰকাৰে ২০১৯ চনৰ ডিচেম্বৰ মাহত নাগৰিকত্ব সংশোধনী আইন গৃহীত কৰিছিল। সেই আইন অনুসৰি বাংলাদেশ, পাকিস্তান, আফগানিস্তানৰ দৰে মুছলমান দেশৰ ধৰ্মীয় সংখ্যালঘু লোকে যদি ধৰ্মীয় নিৰ্যাতনৰ বাবে দেশত আশ্ৰয় বিচাৰে তেন্তে ভাৰতে সেই আইনত মঞ্জুৰ কৰিব। কিন্তু যদিও ‘কা’ত হিন্দু, শিখ, জৈন, বৌদ্ধ, পাৰ্চী আৰু খ্ৰীষ্টান শৰণাৰ্থীক নাগৰিকত্ব দিয়াৰ কথা উল্লেখ আছে, কিন্তু ইয়াত মুছলমান সম্প্ৰদায়ৰ লোকৰ কথা উল্লেখ কৰা হোৱা নাই।
এই আইনখনে নাগৰিকত্বৰ বাবে আবেদন কৰাৰ পূৰ্বে কমেও এবছৰ আৰু পূৰ্বৰ ১৪ বছৰৰ ভিতৰত কমেও পাঁচ বছৰ ভাৰতত বাস কৰাসকলেহে নাগৰিকত্বৰ যোগ্যতা অৰ্জন কৰে। অৱশ্যে এই আইনখনে অসম, মেঘালয়, ত্ৰিপুৰা আৰু মিজোৰামৰ বাসিন্দাসকলৰ বাবে কিছু ৰেহাইৰ ব্যৱস্থা কৰিছে।
২০১৯ চনৰ ডিচেম্বৰ মাহত এই আইনখন কাৰ্যকৰী ঘোষণা কৰা হৈছিল। কিন্তু তেতিয়াও এই আইনৰ অধীনত নিৰ্দিষ্ট নিয়ম প্ৰণয়ন কৰা হোৱা নাছিল। সেই নিয়মাৱলী প্ৰৱৰ্তনৰ কাম ২০২৪ চনত সম্পূৰ্ণ হৈছিল। তাৰ পিছত বহু লোকে ‘কা’ৰ অধীনত নাগৰিকত্বৰ আবেদন দাখিল কৰিবলৈ আৰম্ভ কৰে।
