আধাৰ কাৰ্ড (Adhar Card) নাগৰিকত্বৰ একমাত্ৰ প্ৰমাণ হ’ব নোৱাৰে। বিহাৰৰ ৰাজনৈতিক দলবোৰে নিৰ্বাচন আয়োগক এই বিষয়ত নিৰ্দেশ দিয়াৰ যি দাবী তুলিছিল, সেয়া উচ্চতম ন্যায়ালয়ে খাৰিজ কৰে। শীৰ্ষ আদালতৰ পৰ্যবেক্ষণ, আইন অনুসৰি আধাৰৰ মর্যাদা নিৰ্ধাৰণ কৰা হৈছে। সেই মর্যাদা বৃদ্ধি কৰাটো সম্ভৱ নহয়।
ন্যায়াধীশ সূৰ্য কান্ত আৰু জয়মাল্য বাগচীৰ খণ্ড বিচাৰপীঠে ভোটাৰ তালিকাৰ বিশেষ নিবিড় সমীক্ষা (SIR) সম্পৰ্কীয় গোচৰত ইয়াৰ পূৰ্বে জনাইছিল যে ভোটাৰ তালিকাত নাম উঠাবলৈ আন নথিৰ সৈতে আধাৰ কাৰ্ডো পৰিচয়পত্ৰ হিচাপে গণ্য কৰিব পাৰি। সোমবাৰৰ শুনানিত সেইটো অধিক স্পষ্ট কৰি খণ্ড বিচাৰপীঠৰ পৰ্যবেক্ষণ, “পৰীক্ষাৰ বাবে আন নথিৰ ভিতৰত আধাৰো এক নথি হ’ব পাৰে।”
বিহাৰত খচৰা ভোটাৰ তালিকা পৰা ৬৫ লাখ লোকৰ নাম বাদ যোৱা সন্দৰ্ভত শীৰ্ষ আদালতত শুনানি চলি আছে। উচ্চতম ন্যায়ালয়ে পূৰ্বতে জনাইছিল, ১ ছেপ্টেম্বৰলৈ ভোটাৰসকলে অভিযোগ জনাব পাৰিব। তালিকাত নাম বাদ পৰা সন্দৰ্ভত অভিযোগ জনোৱাৰ সময়সীমা বৃদ্ধিৰ আবেদন দাখল কৰি বিহাৰৰ বিৰোধী দলসমূহে ছুপ্ৰিম কোৰ্টৰ দৃষ্টি আকৰ্ষণ কৰিছিল । সোমবাৰে ছুপ্ৰিম কোৰ্টত উক্ত আবেদনৰ শুনানি লয় ন্য়ায়াধীশ সূৰ্য কান্ত আৰু জয়মাল্য বাগচীৰ খণ্ড বিচাৰপীঠে।
লালুপ্ৰসাদ যাদৱৰ দল আৰ জে ডিৰ হৈ শীৰ্ষ আদালতক প্ৰতিনিধিত্ব কৰে অধিবক্তা প্ৰশান্ত ভূষণে। তেওঁ কয়, বিহাৰত খচৰা ভোটাৰ তালিকাৰ পৰা ৬৫ লাখৰ নাম বাদ গৈছে। ছুপ্ৰিম কোৰ্টৰ নিৰ্দেশ থকাৰ পাছতো আধাৰক পৰিচয়ৰ একমাত্ৰ প্ৰমাণ হিচাপে ধৰা হোৱা নাই। তাৰ পিছতেই খণ্ড বিচাৰপীঠৰ পৰ্যবেক্ষণ, “আধাৰ আইনত আধাৰক যি মর্যাদা দিয়া হৈছে, সেয়ে বৃদ্ধি কৰাটো সম্ভৱ নহয়। পূৰ্বৰ নিৰ্দেশত পাঁচ ন্যায়াধীশৰ বিচাৰপীঠে আধাৰ সম্পৰ্কে যি কথা কৈছে, তাৰ বিৰোধিতাও কৰিব নোৱাৰি।”
উল্লেখ্য যে আধাৰ আইনৰ ৯ নম্বৰ ধাৰাত জনোৱা হৈছে যে আধাৰ নম্বৰ বা অথেনটিকেশ্যন নাগৰিকত্ব বা বাসস্থানৰ প্ৰমাণ হ’ব নোৱাৰে। আনহাত, ২০১৮ চনত উচ্চতম ন্যায়ালয়ৰ পাঁচগৰাকী ন্যায়াধীশৰ বিচাৰপীঠে পুত্তস্বামী গোচৰত জনাইছিল যে আধাৰ নম্বৰে কাৰো নাগৰিকত্বৰ অধিকাৰ সাব্যস্ত কৰিব নোৱাৰে।
