বকলীয়াঘাটৰ বিষ্ফোৰণত জড়িত ডিএনএলএ কেডাৰ দলদলীত আটক

ASSAM TIMES POST
ডিফুঃ বিগত কেইবাটাও মাহ ধৰি কাৰবি আংলঙৰ সীমান্তঞ্চলৰ কেতবোৰ স্থানত কুটাঘাত আৰু ধনদাবী কৰি সন্ত্ৰাস সৃষ্টি কৰি অহা ডিমাছা উগ্ৰপন্থী সংগঠন ডিএনএলএৰ বিৰুদ্ধে কাৰবি আংলং জিলা আৰক্ষীয়ে কেইবাটাও সফল অভিযান চলাইছে ৷

সংগঠনটোৰ স্বয়ম্ভূ সেনাধ্যক্ষ গৰাকীক আৰক্ষীয়ে অলপতে আটক কৰাৰ পিছত ডিএনএলএৰ আন এটা দূৰ্ধৰ্ষ কেডাৰ আজি আৰক্ষীয়ে আটক কৰিবলৈ সক্ষম হৈছে ৷

ঘটনাৰ বিৱৰণী অনুসৰি এক নিৰ্ভৰযোগ্য তথ্যৰ ভিত্তিত আজি পুৱাৰ ভাগত বকলীয়াঘাট আৰক্ষী থানাৰ ভাৰপ্ৰাপ্ত বিষয়া বিজু কিংকৰ বসুমতাৰীৰ নেতৃত্বত লাহৰিজান আৰু ধনশিৰি আৰক্ষীৰ লগতে চিআৰপিএফৰ ২০নং বেটালিয়ান আৰু কোব্ৰা ৰেজিমেণ্টৰ এক অভিযানকাৰীৰ দলে জিলাখনৰ দলদলী সীমান্তৱৰ্তী এলেকাত অভিযান চলাই উগ্ৰপন্থী সদস্য গৰাকীক গ্ৰেপ্তাৰ কৰিবলৈ সক্ষম হয় ৷

ধৃত উগ্ৰপন্থী সদস্যজন বকলীয়াঘাট আৰক্ষী থানাৰ অন্তৰ্গত ৰজাপথাৰ নগৰজানৰ উজ্জল হাফলংবাৰ ওৰফে নগৰ বুলি চিনাক্ত কৰা হৈছে ৷ ধৃত উগ্ৰপন্থী সদস্যজনৰ পৰা কোনো অস্ত্ৰ-শস্ত্ৰ উদ্ধাৰ কৰিব পৰা হোৱা নাই যদিও আপত্তিজনক নথি- পত্ৰ উদ্ধাৰ কৰা বুলি জানিব পৰা গৈছে ৷

উল্লেখযোগ্য যোৱা লোক সভা নিৰ্বাচনৰ আগদিনা সন্ধিয়া বকলিয়াঘাটৰ এজন ব্যৱসায়ীৰ বাসগৃহত বেৰত উগ্ৰপন্থী সংগঠনটোৱে বোমা বিষ্ফোৰণ ঘটাই আতংকৰ সৃষ্টি কৰিছিল ৷ তেতিয়াৰ পৰাই উগ্ৰপন্থী সদস্যজন উক্ত বিষ্ফোৰণৰ অভিযোগত অভিযুক্ত আছিল ৷আৰক্ষীয়ে উক্ত গোছৰৰ ভিত্তিতে ধৃত সদস্য জনক গ্ৰেপ্তাৰ কৰি আদালতত হাজিৰ কৰে ৷