প্ৰধানমন্ত্ৰী নৰেন্দ্ৰ মোদীৰ (PM Modi Degree) ডিগ্ৰী ৰাজহুৱা কৰিবলৈ দিল্লী বিশ্ববিদ্যালয় বাধ্য নহয়। সোমবাৰে দিল্লী উচ্চ ন্যায়ালয়ে মুখ্য তথ্য আয়ুক্তৰ নিৰ্দেশ নাকচ কৰি এই কথা প্ৰকাশ কৰে।
দিল্লী উচ্চ ন্যায়ালয়ৰ ন্যায়াধীশ শচীন দত্তৰ একক বিচাৰপীঠে কয় যে ডিগ্ৰী ৰাজহুৱা কৰাৰ কোনো প্ৰয়োজন নাই। আদালতৰ এই নিৰ্দেশ পিছত বিতংভাৱে প্ৰকাশ কৰা হ’ব। প্ৰধানমন্ত্ৰী মোদীয়ে দাখিল কৰা শপতনামা অনুসৰি, ১৯৭৮ চনত তেওঁ দিল্লী বিশ্ববিদ্যালয়ৰ পৰা বিএ পৰীক্ষাত উত্তীৰ্ণ হৈছিল।
২০১৬ চনত তথ্যৰ অধিকাৰ আইনৰ অধীনত সেই বছৰ দিল্লী বিশ্ববিদ্যালয়ৰ পৰা স্নাতক ডিগ্ৰী লাভ কৰা সকলো ছাত্ৰ-ছাত্ৰীৰ শৈক্ষিক অৰ্হতাৰ নথি-পত্ৰ ৰাজহুৱা কৰিবলৈ অনুৰোধ জনোৱা হৈছিল। কিন্তু দিল্লী বিশ্ববিদ্যালয়ে ৰাজহুৱা কৰিবলৈ অস্বীকাৰ কৰে। এই গোচৰত বিশ্ববিদ্যালয় কৰ্তৃপক্ষই যুক্তি দিয়ে যে তেওঁলোকে প্ৰাসংগিক নথি-পত্ৰ কোনো তৃতীয় পক্ষক গতাই নিদিয়ে।
২০০৫ চনত তথ্যৰ অধিকাৰ আইনৰ অধীনত কেন্দ্ৰীয় তথ্য আয়োগ গঠন কৰা হৈছিল। মুখ্য তথ্য আয়ুক্তই ২০১৬ চনত দিল্লী বিশ্ববিদ্যালয়ক শিক্ষাগত অৰ্হতাৰ নথি ৰাজহুৱা কৰিবলৈ নিৰ্দেশ দিছিল। প্ৰধানমন্ত্ৰীৰ দৰে জনপ্ৰতিনিধিৰ শৈক্ষিক অৰ্হতাৰ নথি ৰাজহুৱা কৰিব লাগে বুলি আয়ুক্তগৰাকীয়ে যুক্তি আগবঢ়ায়।
এই নিৰ্দেশৰ বিৰুদ্ধে বিশ্ববিদ্যালয় কৰ্তৃপক্ষই দিল্লী উচ্চ ন্যায়ালয়লৈ যায়। কেন্দ্ৰৰ ছলিচিটৰ জেনেৰেল তুষাৰ মেহতাই আদালতত যুক্তি দিয়ে যে ইয়াৰ ফলত হাজাৰ হাজাৰ ছাত্ৰ-ছাত্ৰীৰ গোপনীয়তাৰ অধিকাৰ খৰ্ব হ’ব। একে সময়তে তেওঁ কয় যে বিশ্ববিদ্যালয়খনে আদালতত নথি-পত্ৰ গতাই দিবলৈ সাজু।
কিন্তু তুষাৰ মেহতাই যুক্তি দিয়ে যে ‘ৰাজনৈতিক কাৰণত জনপ্ৰিয়তা লাভ কৰিবলৈ’ ইয়াক পাব বিচৰাসকলৰ বাবে ইয়াক ৰাজহুৱা কৰা উচিত নহয়। কিন্তু তথ্যৰ অধিকাৰৰ ওপৰত কাম কৰা লোকসকলে প্ৰতিবাদী যুক্তি আগবঢ়ায় যে আৰ টি আই আইনত আবেদনকাৰীৰ পৰিচয় আৰু উদ্দেশ্যৰ কথা উল্লেখ কৰা হোৱা নাই। চৰকাৰে শৈক্ষিক ডিগ্ৰী প্ৰদান কৰে বুলিও যুক্তি আগবঢ়ায়। গতিকে ই ব্যক্তিগত বিষয় হ’ব নোৱাৰে।
প্ৰায় দশক ধৰি চলি থকা গোচৰ আৰু বিতৰ্কৰ অন্তত ২৭ ফেব্ৰুৱাৰীত দিল্লী উচ্চ ন্যায়ালয়ে ৰায় সংৰক্ষণ কৰি ৰাখিছিল। সোমবাৰে আদালতে কয় যে দিল্লী বিশ্ববিদ্যালয়ে শিক্ষাগত অৰ্হতাৰ নথি-পত্ৰ ৰাজহুৱা কৰিবলৈ বাধ্য নহয়। এই ৰায়ৰ বিৰুদ্ধে উচ্চতম ন্যায়ালয়ত আপীল কৰিব পৰা যাব বুলি উচ্চ ন্যায়ালয়ে প্ৰকাশ কৰে।
