কাৰ্বি আংলং জিলা কংগ্ৰেছৰ সভাপতি হিচাপে অলপতে দায়িত্ব লাভ কৰা ৰতন ইংতিয়ে (Ratan Ingti) আজি জিলা কংগ্ৰেছৰ সভাপতি হিচাপে আনুষ্ঠানিকভাৱে দায়িত্বভাৰ গ্ৰহণ কৰে।
এই উদ্দেশ্যৰে ডিফুস্থিত কাৰ্বি আংলং জিলা কংগ্ৰেছৰ কাৰ্যালয়ত অনুষ্ঠিত হোৱা এক বিশেষ অনুষ্ঠানত নৱনিযুক্ত সভাপতিগৰাকীক দলৰ নেতা-কৰ্মীসকলে উষ্ম আদৰণি জনায়। দায়িত্ব গ্ৰহণৰ পিছতে সংবাদ মাধ্যমৰ সৈতে হোৱা বাৰ্তালাপত সভাপতি ইংতিয়ে জিলাখনৰ সকলো শ্ৰেণীৰ ৰাইজৰ আশীষ শিৰত লৈ দলৰ দায়িত্ব পালন কৰি যাব বুলি মন্তব্য কৰে।
সকলো জাতি-জনগোষ্ঠীৰ লোকক লগত লৈ দলৰ সাংগঠনিক দিশ অধিক শক্তিশালী কৰি তোলাৰ লগতে সমাগত বিধানসভা নিৰ্বাচনত কংগ্ৰেছ দলে পাহাৰীয়া জিলা কেইখনত কমেও চাৰিখন আসন দখল কৰিবলৈ সক্ষম হʼব বুলি দৃঢ়তা প্ৰকাশ কৰে। প্ৰদেশ কংগ্ৰেছৰ সভাপতি গৌৰৱ গগৈ কাৰ্বি আংলঙলৈ অহাৰ পিছতে জিলা বিজেপিত ভূমিকম্পৰ সৃষ্টি হোৱা বুলি লগতে মন্তব্য কৰে সভাপতি গৰাকীয়ে।
আজিৰ সভাতে বিজেপি, এ পি এইচ এল চি আৰু এএছডিচি দলৰ অৰ্ধ শতাধিক লোকে কংগ্ৰেছ দলত যোগদান কৰে। সভাত অসম প্ৰদেশ কংগ্ৰেছ কমিটীৰ সাধাৰণ সম্পাদক অশোক টেৰণ, ৰিতুপন শইকীয়া, সম্পাদিকা পূৰ্ণিমা ৰংহাংপী, কাৰ্বি আংলং জিলাৰ পৰ্যবেক্ষক শ্ৰৱণ ডেকা ৰজা আদি উপস্থিত থাকে।
