কাৰ্বি আংলং জিলা কংগ্ৰেছৰ নেতৃবর্গই আজি গুৱাহাটীত প্রদেশ কংগ্ৰেছৰ মুখ্য কাৰ্যালয়ত কাৰ্বি আংলং জিলাত বিজেপি চৰকাৰৰ দিনত অবাধ হাৰত দুর্নীতি-ভ্রষ্টাচাৰ সন্দৰ্ভত এখন সংবাদমেল সম্বোধন কৰিছিল। আনহাতে, আজি বিয়লি কার্বি আংলং জিলা বিজেপিয়ে ডিফুত এখন সংবাদমেল সম্বোধন কৰি জিলা কংগ্ৰেছৰ নেতৃবৰ্গক উভতি দৰে। বিজেপি দলৰ মুখপত্ৰসকলে সংবাদমাধ্যমৰ আগত কয় যে- কার্বি আংলং জিলাত কংগ্ৰেছৰ আমোলত অবাধ দুর্নীতি সংঘটিত হৈছিল।
বিজেপিৰ আমোলত এতিয়া দুয়োখন পার্বত্য জিলাত তুলিৰাম ৰংহাঙৰ নেতৃত্বত অভূতপূর্ব উন্নয়ন সাধন হৈছে বুলি দাবী কৰে। দুয়োখন পার্বত্য জিলাত ২২ হাজাৰ কোটি টকাৰে এতিয়া পথ নির্মাণ হৈ থকা বুলি দাবী কৰি কংগ্ৰেছৰ আমোলত জিলাখনৰ উন্নয়নৰ খতিয়ান দাঙি ধৰিবলৈ কংগ্ৰেছ নেতৃবর্গক প্রত্যাহ্বান জনায়। ক্রীড়া ক্ষেত্রত বিশেষকৈ আন্তঃগাঁথনি নির্মাণত এতিয়া কার্বি আংলং জিলা অসমৰ ভিতৰতে আগস্থানত থকা বুলি উল্লেখ কৰি কংগ্ৰেছৰ আমোলত এয়া সম্ভব হোৱা নাছিল বুলি দাবী কৰে। প্রাক্তন বিধায়ক তথা জিলা কংগ্ৰেছৰ উপ-সভাপতি জগতছিং ইংতিক আক্ৰমণৰ লক্ষ্য কৰি কয় যে- জগতছিং ইংতি বিজেপি দলত কার্যবাহী সদস্য হৈ থাকোতে তেওঁব সৰুপথাৰ পৰিষদীয় সমষ্টিত মিনি স্টেডিয়ামৰ নিৰ্মাণ কৰা হৈছিল।
এই স্টেডিয়াম নির্মাণত যদি কিবা অনিয়ম সংঘটিত হৈছে তেনেহ’লে তাৰ বাবে দায়ী জগতছিং ইংতি। কংগ্ৰেছৰ আমোলত সমগ্র পার্বত্য জিলা দুখনত কেৱল ভাতৃঘাতী সংঘাত হোৱা বুলি উল্লেখ কৰি বিজেপিৰ আমোলত এতিয়া দুয়োখন পার্বত্য জিলালৈ শান্তিৰ পৰিৱেশ ঘুৰি অহা বুলি বিজেপি দলে দাবী কৰে। তুলিৰাম ৰংহাঙৰ ব্যক্তিগত ফার্ম আৰু বাসগৃহ সন্দর্ভত প্রতিক্রিয়া প্রকাশ কৰি বিজেপি দলৰ মুখপত্র সকলে কয় যে, এই ফাৰ্মৰ ভূমি তুলিৰাম ৰংহাঙে পৰিষদলৈ নির্বাচিত হোৱাৰ পূর্বেই লোৱা।
ইয়াত কোনো দুর্নীতি-অনিয়ম হোৱা নাই বুলি দাবী কৰি তেওঁৰ ডায়েৰী ফার্ম আৰু আন ব্যক্তিগত ফাৰ্মৰ জৰিয়তে নতুন প্রজন্মক কৃষি কর্মৰ প্রতি উৎসাহিত কৰা বুলি দাবী কৰে। বিজেপিৰ আমোলত হোৱা উন্নয়নক স্বীকাৰ কৰি ল’বলৈ কংগ্ৰেছ নেতৃবর্গক আহ্বান জনাই কেবল ৰাজনীতি কৰাৰ স্বাৰ্থতে অপপ্ৰচাৰত লিপ্ত নহ’বলৈ সকিয়াই দিয়ে।
