অম্বুবাচীৰ নিবৃত্তিৰ পিছত শনিবাৰে পুৱা সপৰিয়ালে কামাখ্যা মন্দিৰ দৰ্শন কৰে মুখ্যমন্ত্ৰী হিমন্ত বিশ্ব শৰ্মাই (Himantak Biswa Sarma)। প্ৰতিবছৰৰ দৰে এইবাৰো অম্বুবাচীৰ নিবৃত্তিৰ পাছত মুখ্যমন্ত্ৰীয়ে মা কামাখ্যাৰ আশীৰ্বাদ গ্ৰহণ কৰে। মুখ্যমন্ত্ৰীৰ সৈতে তেওঁৰ পত্নী ৰিণিকি ভূঞা শৰ্মা আৰু পুত্ৰ-কন্যাও আছিল। ইয়াৰ পিছতে মুখ্যমন্ত্ৰীয়ে সংবাদ মাধ্যমক সম্বোধন কৰে।
সংবাদ মাধ্যমৰ আগত মুখ্যমন্ত্ৰীয়ে কয় যে অম্বুবাচীৰ পিছত কামাখ্যা মাৰ দৰ্শন কৰাটো বহুদিনীয়া এক পৰম্পৰা। অম্বুবাচী দুদিন আগতেই হৈ গ’ল যদিও জনসমাগমৰ প্ৰতি লক্ষ্য ৰাখি তেওঁ শনিবাৰে মহামায়াৰ দৰ্শন কৰে আৰু সপৰিয়ালে মা কামাখ্যাক সেৱা কৰি অসমবাসীৰ কল্যাণ তথা সকলোৰে মংগল কামনা কৰে।
তেওঁ লগতে অম্বুবাচী মেলা নিয়াৰিকৈ পাৰ কৰাৰ বাবে মন্দিৰ কমিটী, পৰ্যটন বিভাগ, পৰ্যটন বিভাগৰ মন্ত্ৰী ৰণজিৎ কুমাৰ দাসৰ লগতে সকলোকে ধন্যবাদ জনায়। লগতে ৰোপৱে সন্দৰ্ভত তেওঁ কয় যে ইতিমধ্যে ইয়াৰ কাম বহুত আগবাঢ়িছে। কামাখ্যা ষ্টেচনৰ পৰা কামাখ্যালৈ এটা ৰোপৱে হ’ব আৰু সোণাৰাম খেলপথাৰৰ পৰাও কামাখ্যালৈ আন এটা ৰোপৱে হ’ব। দুয়োটাৰে কাম চলি থকা বুলিও তেওঁ উল্লেখ কৰে।
মুখ্যমন্ত্ৰীয়ে লগতে কয় যে প্ৰথমতে কামাখ্যা ষ্টেচনৰ পৰা কামাখ্যা মন্দিৰলৈ ৰোপৱেটো হ’ব। দ্বিতীয় পৰ্যায়ত সোণাৰাম খেলপথাৰৰ পৰা কামাখ্যালৈ হ’ব। ইয়াৰ কাম খুব সোনকালে কাম আৰম্ভ হ’ব বুলি উল্লেখ কৰি ৰাজ্যত কেইবাটাও ৰোপৱেৰ কাম চলি থকা বুলিও কয়।
