শৰীৰ বুলিবলৈ বিশেষ একো নাই। পৰি আছে কেইটামান ছিন্নভিন্ন মৃতদেহ, জ্বলি যোৱা হাত-ভৰিৰ টুকুৰা। কোনটো শৰীৰ কাৰ সেইটোও চিনাক্ত কৰিব পৰা অৱস্থা নাই। সেয়ে ডি এন এ পৰীক্ষা কৰাটোৱেই একমাত্ৰ উপায়। আহমেদাবাদত বিমান দুৰ্ঘটনা সংঘটিত (Ahmedabad Flight) হোৱাৰ ৭ দিন উকলি গ’ল। সাত দিন ধৰি আপোনজনৰ শৰীৰৰ অংগ লাভৰ বাবে অপেক্ষা কৰি আছে আত্মীয়সকলে। মৃতদেহ চিনাক্তকৰণৰ প্ৰক্ৰিয়া চলি আছে।
বৃহস্পতিবাৰে গুজৰাটৰ স্বাস্থ্যমন্ত্ৰী হৃষিকেশ পেটেলে কয় যে বৃহস্পতিবাৰে পুৱা ৮.৩০ বজালৈকে ডি এন এ পৰীক্ষাৰ জৰিয়তে আহমেদাবাদত নিহত লোকৰ ২১০ টা মৃতদেহ চিনাক্ত কৰিবলৈ সক্ষম হৈছে। তেওঁলোকৰ সকলো পৰিয়ালৰ সৈতে যোগাযোগ কৰা হৈছে।
ইতিমধ্যে ১৮৭ টা মৃতদেহ সংস্কাৰ কৰাৰ বাবে পৰিয়ালক গতাই দিয়া হৈছে। বাকী থকা মৃতদেহসমূহো শীঘ্ৰে পৰিয়ালসমূহক গতাই দিয়া হ’ব। বাকী ৬৪ টা মৃতদেহ চিনাক্তকৰণৰ কাম এতিয়াও অব্যাহত আছে। আজিও আহমেদাবাদ অসামৰিক চিকিৎসালয়ৰ লগতে অন্যান্য স্থানত বহি আছে মৃত আৰু নিৰুদ্দেশ হোৱা লোকৰ পৰিয়াল।
উল্লেখ্য যে ১২ জুনত আহমেদাবাদ বিমানবন্দৰৰ পৰা লণ্ডনৰ গেটৱিকলৈ উৰা মাৰিছিল দুৰ্ভগীয়া এয়াৰ ইণ্ডিয়াৰ বিমান এআই১৭১। কিন্তু ৰাণৱেৰ পৰা ওলাই অহাৰ কেইছেকেণ্ডমানৰ ভিতৰতে বিমানখন ভূপতিত হয়। ইয়াৰ পিছতে এক বিস্ফোৰণ ঘটে। বিমানখনত মুঠ ২৪২ জন লোক আছিল। তাৰে ভিতৰত মাত্ৰ এজন যাত্ৰীহে আচৰিত ধৰণে ৰক্ষা পৰে। বাকী সকলোৰে মৃত্যু হয়।
এই পৰ্যন্ত আনুষ্ঠানিকভাৱে মৃত্যু হোৱা লোকৰ সংখ্যা ২৭৪ জন। দুৰ্ঘটনাটোৰ পিছত এআই ১৭১ত থকা প্ৰায়বোৰ যাত্ৰীৰ মৃতদেহ চিনাক্ত কৰিব পৰা নাই। তেনে অৱস্থাত প্ৰশাসনে ডি এন এ পৰীক্ষা কৰাৰ সিদ্ধান্ত লয়। যাত্ৰীসকলৰ আত্মীয়ৰ ডি এন এ নমুনা গুজৰাট ফৰেনছিক বিজ্ঞান পৰীক্ষাগাৰ (এফ এছ এল) আৰু দেশৰ ৰাষ্ট্ৰীয় ফৰেনছিক বিজ্ঞান পৰীক্ষাগাৰলৈ প্ৰেৰণ কৰা হয়।
এয়াৰ ইণ্ডিয়াৰ বিমানখনত গুজৰাটৰ প্ৰাক্তন মুখ্যমন্ত্ৰী বিজয় ৰূপানীও আছিল। দেওবাৰে ডি এন এ পৰীক্ষাৰ জৰিয়তে তেওঁৰ মৃতদেহো চিনাক্ত কৰা হয়। মৃতদেহটো পৰিয়ালৰ হাতত গতাই দিয়া হৈছে। সোমবাৰে ৰাজকোটত ৰূপানীৰ অন্তিম সংস্কাৰ সম্পূৰ্ণ ৰাষ্ট্ৰীয় মৰ্যাদাৰে কৰা হয়।
