কাৰোবাৰ যদি ফোনৰ চুইচ অফ, কোনোবাই আকৌ ৰিং হৈ থকাৰ পিছতো ধৰা নাই। উদ্ধৱ থাকৰে নেতৃত্বাধীন শিৱসেনাৰ (ইউবিটি) (Shiv Sena UT Crisis) লোকসভাৰ সাংসদসকলৰ এি আচৰণক লৈ এতিয়া প্ৰশ্ন উত্থাপন হৈছে।
লগতে উদ্ধৱসেনা শিবিৰত আন এক বিভাজন হ’ব নেকি সেই বিষয়েও চৰ্চা চলিছে। একনাথ শিণ্ডেৰ পুত্ৰ শ্ৰীকান্তে বুধবাৰ বা বৃহস্পতিবাৰে দিল্লীৰ উদ্ধৱ শিবিৰৰ ‘বিদ্ৰোহী’ সাংসদসকলক সাক্ষাৎ কৰিব পাৰে বুলি জল্পনা-কল্পনাৰ সৃষ্টি হৈছে।
উদ্ধৱ শিবিৰত বৃহস্পতিবাৰে দিল্লীত সংসদীয় সমিতিৰ বৈঠক আহ্বান কৰা হৈছে। উক্ত বৈঠকত দলৰ কেইজন সাংসদ উপস্থিত থাকিব তাকে লৈ প্ৰশ্ন উত্থাপন হ’বলৈ আৰম্ভ কৰিছে। যদিও উদ্ধৱ শিবিৰৰ দাবী যে দলত বিভাজনৰ কোনো সম্ভাৱনা নাই, কিন্তু দলৰ ভিতৰত মতানৈক্য আছে।
সূত্ৰ অনুসৰি, উদ্ধৱ শিবিৰৰ সাংসদসকলে দিল্লীস্থিত শ্ৰীকান্তৰ বাসগৃহত বৈঠকত মিলিত হোৱাৰ কথা। উক্ত বৈঠকত উপস্থিত থাকিব পাৰে মহাৰাষ্ট্ৰৰ উপ-মুখ্যমন্ত্ৰী একনাথ শিণ্ডে। জানিব পৰা মতে, উক্ত বৈঠকৰ পাছত ‘বিদ্ৰোহী’ সাংসদসকলে লোকসভাৰ অধ্যক্ষ ওম বিৰলাক সাক্ষাৎ কৰিব পাৰে। তাত এক সুকীয়া ‘ব্লক’ গঠনৰ প্ৰস্তাৱ দিব পাৰে।
পৰৱর্তী সময়ত এই শিবিৰটো শিণ্ডেসেনাৰ সৈতে একত্ৰিত হ’ব পাৰে বুলি ধাৰণা কৰা হৈছে৷ সূত্ৰৰ উদ্ধৃতি দি এনডিটিভিয়ে প্ৰকাশ কৰা অনুসৰি, উদ্ধৱ শিবিৰৰ কমেও ছয়জন সাংসদ শিণ্ডেসেনাৰ সৈতে যোগাযোগত আছে। এই তালিকাত আছে সঞ্জয় দীনা পাটিল, সঞ্জয় দেশমুখ, নাগেশ পাটিল, উমৰাজে নিম্বালকাৰ, ভৌছাহেব ৱাকচৌৰ আৰু সঞ্জয় যাদৱ।
আন এক সূত্ৰই দাবী কৰিছে যে উদ্ধৱৰ ঘনিষ্ঠ সহযোগী অৰবিন্দ সাৱন্ত আৰু অনিল দেশাই বুধবাৰে দিল্লীত উপস্থিত হ’ব পাৰে। ইতিমধ্যে দিল্লীত উপস্থিত হৈছে দলটোৰ ৰাজ্যসভাৰ সাংসদ সঞ্জয় ৰাৱট। প্ৰশ্ন উত্থাপন হয় যে তেওঁ বিদ্ৰোহী সাংসদসকলক লগ কৰিব নেকি? অৱশ্যে এই সন্দৰ্ভত কোনো আনুষ্ঠানিক উত্তৰ পোৱা হোৱা নাই।
