এয়াৰ ইণ্ডিয়াৰ (Air India) এখন বিমানে তিনি ঘণ্টা ধৰি আকাশতে ঘূৰি ঘূৰি মুম্বাই বিমানবন্দৰলৈ উভতিল। শুকুৰবাৰে পুৱা ৫.৩৯ বজাত মুম্বাই বিমানবন্দৰৰ পৰা লণ্ডন অভিমুখে উৰা মাৰিছিল বিমানখন।
ফ্লাইট ট্ৰেকিং কোম্পানী Flightradar24ৰ তথ্য বিশ্লেষণ কৰি সংবাদ সংস্থা পিটিআয়ে প্ৰকাশ কৰা অনুসৰি, বিমানখনে প্ৰায় তিনি ঘণ্টা ধৰি আকাশতে ঘূৰি ফুৰিছিল। ইয়াৰ পিছত মুম্বাইলৈ ঘূৰি আহে। এয়াৰ ইণ্ডিয়াই এক বিবৃতি প্ৰকাশ কৰি কয় যে ইৰাণৰ বৰ্তমানৰ পৰিস্থিতিৰ বাবে দেশখনৰ আকাশমাৰ্গ বন্ধ হৈ আছে।
ফলত বিমানবোৰে সেই আকাশমাৰ্গ পাৰ হৈ ইউৰোপীয় দেশসমূহত উপনীত হ’ব নোৱাৰে। এনে পৰিস্থিতিত বহু বিমানৰ পথ সলনি কৰা হৈছে। বহু বিমান মাজপথতে ঘূৰাই দিয়া হৈছে। এয়াৰ ইণ্ডিয়াই জনোৱা মতে, ১৬খন বিমানৰ যাত্ৰাপথ সলনি কৰা হৈছে বা বিমানসমূহ ঘূৰাই অনা হৈছে।
যাত্ৰীসকলৰ অসুবিধাৰ বাবে দুখ প্ৰকাশ কৰিছে এয়াৰ ইণ্ডিয়াই। এই পৰিস্থিতিৰ সৈতে মোকাবিলা কৰাৰ বাবে প্ৰচেষ্টা চলোৱা হৈছে বুলি বিমান সংস্থাটোৱে জনায়। কোনোবাই যদি বিমানৰ টিকট বাতিল কৰে তেন্তে তেওঁলোকে ধন ঘূৰাই পাব বুলি জনোৱা হৈছে। যিবোৰ বিমানৰ পথ সলনি কৰা হৈছে, তাৰ যাত্ৰীক বিকল্প উপায়েৰে গন্তব্যস্থানলৈ নিয়াৰ আশ্বাস দিয়া হৈছে।
উল্লেখ্য যে শুকুৰবাৰে পুৱাৰে পৰা ইজৰাইলে ইৰাণৰ পাৰমাণৱিক আৰু সামৰিক ঘাটিত আক্ৰমণ আৰম্ভ কৰিছে, যাৰ ফলত এই আশংকা বাস্তৱায়িত হৈছে। ইজৰাইলৰ সেনাই কেৱল ইৰাণৰ ৰাজধানী তেহৰাণতে নহয়, কাষৰীয়া অঞ্চলসমূহতো বিমান আক্ৰমণ চলাইছে। ইৰাণৰ চৰকাৰী সংবাদ মাধ্যমে এই খবৰৰ সত্যতা স্বীকাৰ কৰিছে।
ইজৰাইলৰ আক্ৰমণৰ পিছত ইৰাণে সুৰক্ষামূলক ব্যৱস্থা হিচাপে দেশখনৰ আকাশমাৰ্গ বন্ধ কৰি দিয়ে। দেশখনৰ বিমান সেৱা সম্প্ৰতি বন্ধ কৰি দিয়া হৈছে।
আনহাতে, বৃহস্পতিবাৰে বিয়লিৰ পৰাই আলোচনাৰ কেন্দ্ৰবিন্দু হৈ পৰিছে এয়াৰ ইণ্ডিয়া।
বৃহস্পতিবাৰে দিনৰ ১.৩৮ বজাত আহমেদাবাদৰ চৰ্দাৰ বল্লভভাই পেটেল আন্তঃৰাষ্ট্ৰীয় বিমানবন্দৰৰ পৰা উৰণৰ কিছু সময়ৰ পিছতে লণ্ডন অভিমুখী এ আই ১৭১ নম্বৰৰ এয়াৰ ইণ্ডিয়াৰ বিমান দুৰ্ঘটনাগ্ৰস্ত হয়। দুৰ্ঘটনাগ্ৰস্ত বিমানখনত মুঠ ২৪২ জন লোক আছিল। ইয়াৰে ২৩২ জন যাত্ৰী, ১০ জন ক্ৰু মেম্বাৰ আৰু দুজন পাইলট। এজন যাত্ৰীৰ বাহিৰে বাকী সকলোৰে মৃত্যু হোৱা বুলি জানিব পৰা গৈছে।
