হৃদৰোগত আক্ৰান্ত হৈ কৰিশ্মা কাপুৰৰ প্ৰাক্তন স্বামী সঞ্জয় কাপুৰৰ (Sanjay Kapoor dies) মৃত্যু। ৫৩ বছৰীয়া সঞ্জয় কাপুৰে বৃহস্পতিবাৰে প’ল’ খেলি থকা অৱস্থাত হৃদৰোগত আক্ৰান্ত হয়। ২০০৩ চনত দিল্লীৰ ব্যৱসায়ী সঞ্জয় কাপুৰৰ সৈতে বিবাহপাশত আবদ্ধ হয় বলীউডৰ অভিনেত্ৰী কৰিশ্মা কাপুৰ।
তেওঁলোকৰ দুটা সন্তান চামাইৰা আৰু কিয়ান। দহ বছৰ একেলগে থকাৰ পিছত কৰিশ্মা আৰু সঞ্জয়ে পৃথকে পৃথকে থাকিবলৈ ধৰে। ২০১৬ চনত আনুষ্ঠানিকভাৱে বিবাহ বিচ্ছেদ হয় দম্পতীহালৰ। পৰৱৰ্তী সময়ত সঞ্জয়ে প্ৰিয়া সচদেৱৰ সৈতে বিবাহপাশত আবদ্ধ হয়।
২০১৪ চনত কৰিশ্মা কাপুৰে তেওঁৰ প্ৰাক্তন স্বামী সঞ্জয় কাপুৰৰ বিৰুদ্ধে শাৰীৰিক নিৰ্যাতনৰ অভিযোগ উত্থাপন কৰিছিল। আনকি তেওঁলোকৰ মধুচন্দ্ৰিকাৰ সময়ত তেওঁ তেওঁক নিলাম কৰিবলৈ চেষ্টা কৰা বুলিও অভিযোগ কৰে। যাৰ ফলত আলোড়নৰ সৃষ্টি হৈছিল।
জানিব পৰা মতে, মাতৃ ববিতা কাপুৰৰ অহৰহ জেদৰ বাবেই কৰিশ্মাই ব্যৱসায়ী সঞ্জয় কাপুৰৰ সৈতে বিবাহপাশত আবদ্ধ হয়। আনহাতে, তেওঁৰ পিতৃ ৰণধীৰ কাপুৰ সদায় এই বিবাহৰ বিৰোধী আছিল।
সংবাদ মাধ্যমৰ সৈতে হোৱা এক সাক্ষাৎকাৰত ৰণধীৰে সঞ্জয়ক ‘তৃতীয় শ্ৰেণীৰ ব্যক্তি’ বুলি অভিহিত কৰে। বিবাহ বিচ্ছেদৰ পিছত আদালতৰ নিৰ্দেশ অনুযায়ী কৰিশ্মাই নিজৰ সন্তানক নিজৰ লগত ৰাখিছিল।
