ছত্তীশগড়ৰ চুকমাত মাওবাদীয়ে স্থাপন (Chattisgarh Maoist Attack) কৰা আই ই ডি বিস্ফোৰণত মৃত্যু হয় চুকমাৰ অতিৰিক্ত আৰক্ষী অধীক্ষক আকাশ ৰাও। গুৰুতৰভাৱে আঘাতপ্ৰাপ্ত অৱস্থাত তেওঁক চিকিৎসালয়ত ভৰ্তি কৰোৱা হয়।
সোমবাৰে চিকিৎসাধীন অৱস্থাত তেওঁৰ মৃত্যু হয়। আনহাতে, আন তিনিজন আৰক্ষীৰ অৱস্থা সংকটজনক। দেওবাৰে কোণ্টা-এৰাবৰ পথৰ সমীপৰ ডণ্ড্ৰা অঞ্চলত চাৰিজন আৰক্ষীয়ে টহল দি আছিল।
এ এছ পি আকাশৰ উপৰি দলটোত কণ্টা এছ ডি অ’ পি আৰু কণ্টা থানাৰ হাউছ অফিচাৰকে ধৰি আন তিনিজন আৰক্ষীৰ লোক আছিল। মঙলবাৰে মাওবাদী সংগঠনে আহ্বান জনোৱা দেশজোৰা বন্ধৰ পূৰ্বে নিৰাপত্তাৰ ব্যৱস্থা পৰীক্ষা কৰিবলৈ কোণ্টা অঞ্চলত তেওঁলোকে টহল দি আছিল।
সেই সময়ত মাওবাদীয়ে স্থাপন কৰা আই ই ডি বিস্ফোৰণত আকাশ গুৰুতৰভাৱে আহত হয়। আন কেইজনো আহত হয়। আটাইকেইজন আহতক শীঘ্ৰে উদ্ধাৰ কৰি কণ্টা হাস্পতালত ভৰ্তি কৰোৱা হয়। আকাশক উন্নত চিকিৎসাৰ বাবে ৰায়পুৰলৈও স্থানান্তৰৰ কথা বিবেচনা কৰা হয় যদিও তাৰ পূৰ্বেই তেওঁৰ মৃত্যু হয়।
চুকমা আৰক্ষী অধীক্ষক কিৰণ চাভানে আকাশৰ মৃত্যুৰ খবৰ নিশ্চিত কৰে। উল্লেখ্য যে ৰাজ্যখনৰ মাওবাদী বিৰোধী প্ৰচেষ্টাত বৃহৎ অগ্ৰগতি লাভ কৰাৰ মাত্ৰ কেইদিনমানৰ পিছতে এই ঘটনা সংঘটিত হৈছে। ২৭ মে’ত প্ৰথম বেটেলিয়নৰ চাৰিজন সদস্যকে ধৰি মুঠ ১৮জন মাওবাদীয়ে চুকমাত আৰক্ষীৰ ওচৰত আত্মসমৰ্পণ কৰে।
তদুপৰি, বিগত তিনিদিনত বিজাপুৰত যৌথ বাহিনীৰ অভিযানত কমেও ৭জন মাওবাদী নিহত হৈছে। নিহতসকলৰ ভিতৰত আছে চি পি আই (মাওবাদী)ৰ দুজন শীৰ্ষ নেতা । তেওঁলোক কেন্দ্ৰীয় সমিতিৰ নেতা সুধাকৰ আৰু তেলেংগানা ৰাজ্যিক সমিতিৰ নেতা ভাস্কৰ।
