পশ্চিম ৰে’লৱেয়ে মুম্বাই চেণ্ট্ৰেল ৰে’লৱে ষ্টেচনত ভাৰতৰ প্ৰথমটো ডিজিটেল লাউঞ্জ (Digital lounge at Railway Station) মুকলি কৰিবলৈ ওলাইছে। ই হ’ব সম্পূৰ্ণ আধুনিক সুযোগ-সুবিধাসহ কো-ওৰ্কিং স্পেচ, য’ত ৰে’ল যাত্ৰী আৰু সাধাৰণ জনতাই ৰৈ থকাৰ সময়ত কাম কৰাৰ সুবিধা লাভ কৰিব।
প্ৰায় ১৭১২ বৰ্গফুট ঠাইত নিৰ্মিত এই লাউঞ্জটোত এয়াৰ কণ্ডিচনাৰ, হাইস্পীড ইণ্টাৰনেট, চাৰ্জিং পইণ্ট, প্ৰিন্টিং আৰু স্কেনিঙৰ সুবিধা, কনফাৰেন্স ৰুম, ভেণ্ডিং মেচিনৰ পৰা লঘু জলপান আদি থাকিব। ২০ৰ পৰা ৫০জন লোক বহিব পৰা এই লাউঞ্জটো ব্যৱহাৰৰ বাবে ঘণ্টা ভিত্তিত মাচুল দিব লাগিব আৰু ইয়াক ব্যক্তিগত অংশীদাৰিত্ব প্ৰকল্পৰ অধীনত গঢ়ি তোলা হৈছে।
পশ্চিম ৰে’লৱেৰ মুখপাত্ৰ বিনীত অভিষেকে কয় যে এই পদক্ষেপ ডিজিটেল ইণ্ডিয়া আৰু ষ্টেচন আধুনিকীকৰণৰ অংশ হিচাপে গ্ৰহণ কৰা হৈছে। মুম্বাই চেণ্ট্ৰেলৰ পিছত আন্ধেৰী, বৰিৱালি, বান্দ্ৰা টাৰ্মিনাছকে ধৰি একাধিক ষ্টেচনত একেধৰণৰ লাউঞ্জ স্থাপনৰ পৰিকল্পনা কৰা হৈছে।
