জনপ্ৰিয় কণ্ঠশিল্পী গায়ত্ৰী হাজৰিকাৰ দেহাৱসান। কেইবাটাও কালজয়ী গানেৰে শ্ৰোতাৰ পৰা সমাদৰ লাভ কৰা কণ্ঠশিল্পীগৰাকীৰ শুকুৰবাৰে মৃত্যু হয়। শুকুৰবাৰে দিনৰ ২.১৫ বজাত গুৱাহাটীৰ এখন ব্যক্তিগত চিকিৎসালয়ত ৪৫ বছৰ বয়সত তেওঁ শেষ নিশ্বাস ত্যাগ কৰে। উল্লেখ্য যে গায়ত্ৰী হাজৰিকা দুৰাৰোগ্য ৰোগত আক্রান্ত হৈ আছিল আৰু ১২ মে’ ৰ পৰা তেওঁ চিকিৎসালয়ত চিকিৎসাধীন হৈ আছিল।
‘সৰা পাতে পাতে ফাগুণ আহে…’, ‘জোনাক নাছিল বনত…’ আদি কেইবাটাও মনপৰশা গীতেৰে শ্ৰোতাৰ মন-মগজুত স্থান দখল কৰিবলৈ সক্ষম হোৱা গায়ত্ৰী হাজৰিকাৰ জন্ম ১৯৮০ চনত। স্কুলীয়া শিক্ষা গুৱাহাটীৰ টি চি ছোৱালী হাইস্কুলত আৰম্ভ কৰি তেওঁ সন্দিকৈ কলেজৰ পৰা উচ্চতৰ মাধ্যমিকত উত্তীৰ্ণ হয়। মেট্ৰিকত তেওঁ সংগীত বিষয়ত অসমৰ ভিতৰত সৰ্বোচ্চ নম্বৰ লাভ কৰিছিল। তেওঁ ৰবীন্দ্ৰ ভাৰতী বিশ্ববিদ্যালয়ৰ পৰা শাস্ত্ৰীয় সংগীতত স্নাতক ডিগ্ৰী অৰ্জন কৰাৰ উপৰি ভাতখাণ্ডে, লক্ষ্ণৌৰ পৰা সংগীত বিষয়ত স্নাতকোত্তৰ ডিগ্ৰী লাভ কৰে।
তেওঁ শিশুশিল্পী হিচাপে ১৯৯২ চনত গুৱাহাটী অনাতাঁৰ কেন্দ্ৰ আৰু দূৰদৰ্শন কেন্দ্ৰতো গীত পৰিবেশন কৰিছিল। ‘ক্ৰোধ’, ‘ৰত্নাকৰ’, ‘কাঞ্চনজংঘা’ আদি ছবিত কণ্ঠদান কৰা গায়ত্ৰী হাজৰিকাৰ কণ্ঠত প্ৰাণ পাই উঠা কেইটামান জনপ্ৰিয় গীত হৈছে ‘আবেলিৰ হেঙুলী আকাশে…’, ;ইমান সেমেকা…’, ‘জোনাক নাছিল বনত…’, ‘তুমি অহাৰ বাতৰি পালে…’, ‘তোমালৈ মোৰ মৰম…’, ‘মন মোৰ উৰি ফুৰে….’, ‘মাথোঁ এজাক বৰষুণ…’, ‘যেতিয়া জোনাক নামিছিল…’, ‘সৰা পাতে পাতে…’, ‘সোণোৱালী সপোন আদি…’।
উল্লেখ্য যে ২০২১ চনত ৰত্নাকৰ ছবিৰ ‘ৰাতি ৰাতি’ শীৰ্ষক গীতটোৰ বাবে তেওঁ ‘প্ৰাগ চিনে এৱাৰ্ড’ লাভ কৰিছিল।
আনহাতে, অসমীয়া ধাৰাবাহিক বৈদেহী, ৰ’দালী, দামিনী, মমতা, পৰিণীতা, আল্পনা আদিৰ শীৰ্ষ গীতত কণ্ঠদান কৰা গায়ত্ৰী হাজৰিকাৰ শ্ৰব্য সংকলন দুটা হৈছে ২০১৪ চনত মুক্তিলাভ কৰা ‘মিঠা আৱেশেৰে’ আৰু ২০১৭ চনত মুক্তিলাভ কৰা ‘সুৰৰ আৱেশেৰে’।
